Assam By-Elections 2024: কাইলৈ উপ-নিৰ্বাচনৰ ভোটগ্ৰহণ…কোন সমষ্টিত কিমান সংখ্যক ভোটাৰে কিমান জন প্ৰাৰ্থীৰ ভাগ্য নিৰ্ণয় কৰিব ?

উপ-নিৰ্বাচন ২০২৪

১৩ নৱেম্বৰ বুধবাৰে ৰাজ্যৰ পাঁচটা সমষ্টিৰ উপ-নিৰ্বাচনৰ ভোটগ্ৰহণ অনুষ্ঠিত হ’ব । নিৰ্বাচন আয়োগৰ তথ্য় অনুসৰি, পুৱাৰ ৭ বজাৰ পৰা আৰম্ভ হ’ব ভোটগ্ৰহণ প্ৰক্ৰিয়া । ইতিমধ্যে ৫ টা সমষ্টিৰ প্ৰতি ভোট কেন্দ্ৰ ভোটগ্ৰহণৰ বাবে সম্পূৰ্ণৰূপে সাজো হৈছে । নিৰাপত্তা ব্যৱস্থাও কটকটীয়া কৰা হৈছে । ইয়াৰ সমান্তৰালভাৱে কাইলৈ ভোটগ্ৰহণ বাবে প্ৰতিটো ভোটগ্ৰহণ কেন্দ্ৰত প্ৰিজাইডিং, প’লিং বিষয়াসকলো উপস্থিত হৈছেগৈ । উল্লেখ্য যে, উপ-নিৰ্বাচন অনুষ্ঠিত হ’বলগীয়া ৰাজ্যৰ পাঁচটা বিধানসভা সমষ্টি হৈছে- বিহালী, বঙাইগাঁও, চিদলী, ধলাই আৰু চামগুৰি ।

পাঁচ সমষ্টিত কিমান সংখ্যক ভোটাৰে ভোটদান কৰিব ?

অহা কাইলৈ ৰাজ্যৰ পাঁচ সমষ্টিৰ উপ-নিৰ্বাচনত ৯, ১০, ৬৬৫ গৰাকী ভোটাৰে সাব্যস্ত কৰিব ভোটাধিকাৰ । ইয়াৰ ভিতৰত পুৰুষ ভোটাৰৰ সংখ্যা হৈছে ,৫৪,৭২২ জন আৰু মহিলা ভোটাৰ সংখ্যা হ’ল ৪,৫৫,৯২৪ গৰাকী ৷ পাঁচ সমষ্টিৰ মুঠ ভোটগ্ৰহণ কেন্দ্ৰৰ সংখ্যা হৈছে ১০৭৮ টা ।

নিৰ্বাচন আয়োগৰ তথ্য অনুসৰি, চিদলী সমষ্টিত মুঠ ২,১৭,২৩৬ গৰাকী ভোটাৰে সাব্যস্ত কৰিব ভোটাধিকাৰ । একেদৰে বঙাইগাঁৱত ১,৮২,৩৫৪ গৰাকী, বিহালীত ১,৩২,৫৭৯ গৰাকী আৰু চামগুৰি সমষ্টিত ১,৮০,৮৫৪ গৰাকী ভোটাৰে সাব্যস্ত কৰিব ভোটাধিকাৰ । অন্যহাতে ধলাই বিধানসভা সমষ্টিৰ মুঠ ভোটাৰৰ সংখ্যা হৈছে ১,৯৭,৬৪২ গৰাকী ।

ভোটগ্ৰহণ কেন্দ্ৰৰ সংখ্যা কিমান ?

নিৰ্বাচন আয়োগৰ তথ্য অনুসৰি, ৰাজ্যৰ পাঁচ সমষ্টিৰ উপ-নিৰ্বাচনৰ ভোটগ্ৰহণৰ বাবে মুঠ ১০৭৮ টা কেন্দ্ৰৰ ব্যৱস্থা কৰা হৈছে । ধলাইত ২০৮ টা, চিদলীত ২৭৩টা, বঙাইগাঁৱত ২৪৬টা ভোটগ্ৰহণ কেন্দ্ৰৰ ব্যৱস্থাৰ কৰাৰ সমান্তৰালভাৱে বিহালীত ১৫৪টা আৰু চামগুৰিত ১৯৭টা ভোটগ্ৰহণ কেন্দ্ৰৰ ব্যৱস্থা কৰা হৈছে ৷

কোন সমষ্টিত কিমানজন প্ৰাৰ্থীয়ে প্ৰতিদ্বন্দ্বিতা কৰিছে ?

ৰাজ্যৰ পাঁচটা বিধানসভা সমষ্টিৰ উপ-নিৰ্বাচনৰ বাবে মুঠ ৩৮ গৰাকীয়ে প্ৰাৰ্থীয়ে প্ৰতিদ্বন্দ্বিতা আগবঢ়াইছে । ইয়াৰ ভিতৰত চিদলী সমষ্টিত তিনি গৰাকী প্ৰাৰ্থীয় প্ৰতিদ্বন্দ্বিতা আগবঢ়াইছে । ইউপিপিএলে নিৰ্মল কুমাৰ ব্ৰক্ষ্মক প্ৰাৰ্থী হিচাপে প্ৰক্ষেপ কৰাৰ বিপৰীতে বিপিএফে শুদ্ধ কুমাৰ বসুমতাৰীক প্ৰাৰ্থীত্ব দিছে । ইফালে চিদলীত কংগ্ৰেছে প্ৰাৰ্থীত্ব দিছে সঞ্জীৱ ৱাৰীক ৷

উপ-নিৰ্বাচন অনুষ্ঠিত হবলগীয়া আনটো সমষ্টি বঙাইগাঁৱত মুঠ ৮ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে । বিজেপিৰ মিত্ৰদল অগপৰ দীপ্তিময়ী চৌধুৰীয়ে সমষ্টিটোত প্ৰতিদ্বন্দ্বিতা আগবঢ়োৱাৰ বিপৰীতে কংগ্ৰেছে সমষ্টিটোত ব্ৰজেনজিৎ সিনহাক প্ৰাৰ্থী হিচাপে প্ৰক্ষেপ কৰিছে । ইফালে এছইউচিআইৰ হৈ মৃত্যুঞ্জয় ৰাভাই প্ৰতিদ্বন্দ্বিতা আগবঢ়োৱাৰ সমান্তৰালভাৱে নিৰ্দলীয় প্ৰাৰ্থী শৈলেন্দ্ৰ সৰকাৰ, অনুপ কুমাৰ কৰ্মকাৰ, ভদ্ৰেশ্বৰ বৰ্মন, গৌতম ৰায় লগতে দীপক দাসে প্ৰতিদ্বন্দ্বিতা আগবঢ়াইছে ৷

ইফালে বিহালীত মুঠ ৪ গৰাকী প্ৰাৰ্থী প্ৰতিদ্বন্দ্বিতা আগবঢ়াইছে । বিহালীত শাসকীয় বিজেপিয়ে দিগন্ত ঘাটোৱালক প্ৰাৰ্থীত্ব দিয়া বিপৰীতে কংগ্ৰেছৰ হৈ প্ৰতিদ্বন্দ্বিতা কৰিব জয়ন্ত বৰাই । ইফালে, চিপিআই(এমএল)ৰ প্ৰাৰ্থী লক্ষীকান্ত কুৰ্মীয়ে প্ৰতিদ্বন্দ্বিতা কৰাৰ লগতে আপৰ হৈ প্ৰতিদ্বন্দ্বিতা কৰিছে অনন্ত গগৈয়ে ।

ধলাই আৰু চামগুৰিত কিমানজন প্ৰাৰ্থীয়ে প্ৰতিদ্বন্দ্বিতা কৰিছে ?

একেদৰে ধলাই সমষ্টিত মুঠ ৮ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে । সমষ্টিটোত বিজেপিৰ নীহাৰ ৰঞ্জন দাসৰ বিপৰীতে কংগ্ৰেছৰ ধ্ৰুৱজ্যোতি পুৰুকায়স্থই প্ৰতিদ্বন্দ্বিতা আগবঢ়াইছে । মনকৰিবলগীয়া যে, সমষ্টিটোত মুঠ ৬ গৰাকী নিৰ্দলীয় প্ৰাৰ্থীয়ে প্ৰতিদ্বন্দ্বিতা আগবঢ়াইছে । তেওঁলোক হৈছে-অমলেন্দু দাস, ধীৰাজ দাস, পৰিমল দাস, ৰাজু দাস আৰু গৌৰ চন্দ্ৰ দাস, দিলীপ কুমাৰ ধুবী ৷

উল্লেখ্য যে, ৰাজ্যৰ এই উপ-নিৰ্বাচনটোত সৰ্বাধিক ১১ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে চামগুৰি সমষ্টিত । সমষ্টিটোত বিজেপিয়ে দিপ্লুৰঞ্জন শৰ্মাক প্ৰাৰ্থীত্ব দিয়া বিপৰীতে কংগ্ৰেছে সাংসদ ৰকিবুলৰ পুত্ৰ তাঞ্জিল হুছেইনক প্ৰাৰ্থীত্ব দিছে । ইফালে নিৰ্দলীয় হিচাপে ৯ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে সমষ্টিটোত । চামগুৰিৰ নিৰ্দলীয় প্ৰাৰ্থীসকল হৈছে-জেহিৰুল ইছলাম,নুৰুল আমিন চৌধুৰী,ৰবুল হক, ফাতেমা খাতুন, শশী তাতী,মুচাব্বিৰ আলি আহমেদ, আব্দুল মাজিদ,আব্দুছ চবুৰ মিঞা আৰু বীৰেন বচাক ।