৬টা বিষয় লৈ হাৰিয়ানাৰ নিৰ্বাচনী যুদ্ধ জিকিবলৈ সাজু কংগ্ৰেছ , কি কি থাকিব ইস্তাহাৰত?

টিকট বিতৰণৰ পাছত কংগ্ৰেছে এতিয়া হাৰিয়ানাৰ নিৰ্বাচনী যুঁজত জয়ী হ’বলৈ ইস্তাহাৰ লৈ খেলপথাৰত নামিবলৈ সাজু হৈছে। কংগ্ৰেছে জনসাধাৰণৰ বাবে ৬টা ডাঙৰ ঘোষণা প্ৰস্তুত কৰিছে। দলটোৱে এই ৬টা ঘোষণাক গেৰাণ্টি হিচাপে প্ৰচাৰ কৰিব আৰু চৰকাৰ শাসনলৈ আহিলে সেইবোৰ পূৰণ কৰাৰ প্ৰতিশ্ৰুতি দিব। হাৰিয়ানাত ৯০খন আসনৰ বাবে ৫ অক্টোবৰত ভোটগ্ৰহণ অনুষ্ঠিত হ’ব। ৮ অক্টোবৰত ফলাফল ঘোষণা কৰা হ’ব।

হাৰিয়ানাৰ কংগ্ৰেছ ইস্তাহাৰ সমিতিৰ সমন্বয়ক অমিতাভ দুবেৰ মতে, ৰাজ্যিক টীমে ইস্তাহাৰ প্ৰস্তুত কৰি কংগ্ৰেছ হাইকমাণ্ডলৈ প্ৰেৰণ কৰিছে। হাইকমাণ্ডে মোহৰ লগোৱাৰ লগে লগে ইস্তাহাৰখন মুকলি কৰা হ’ব।

ইস্তাহাৰত কি আছে?

কংগ্ৰেছৰ সূত্ৰ অনুসৰি লোকসভাৰ দৰে হাৰিয়ানাৰ বাবে প্ৰস্তুত কৰা ইস্তাহাৰত ৫টা সম্প্ৰদায় (যুৱ, মহিলা, কৃষক, দলিত/জনজাতীয় আৰু শ্ৰমিক)ৰ ওপৰত বিশেষ গুৰুত্ব দিয়া হৈছে। প্ৰতিটো সম্প্ৰদায়ৰ বাবে বিভিন্ন ঘোষণা প্ৰস্তুত কৰা হৈছে।

কংগ্ৰেছে ইস্তাহাৰত নিৰ্বাচন সন্দৰ্ভত ৬টা ডাঙৰ বিষয় প্ৰস্তুত কৰিছে। ইয়াৰ ভিতৰত আছে মহিলাৰ সন্মান সহায়, ৫০০ টকাত প্ৰতিটো পৰিয়ালক গেছ চিলিণ্ডাৰ, বৃদ্ধসকলৰ বাবে ৬০০০ টকাৰ পেঞ্চন, ৩০০ ইউনিট বিনামূলীয়া বিদ্যুৎ , ২ লাখ চৰকাৰী চাকৰি আৰু কৃষকসকলৰ বাবে ঋণ ৰেহাই।

সূত্ৰ অনুসৰি, মহিলা সন্মানৰ ধনৰ পৰিমাণ এতিয়াও চূড়ান্ত কৰা হোৱা নাই। কংগ্ৰেছৰ শীৰ্ষ হাইকমাণ্ড আৰু ৰাজ্যিক গোটৰ বৈঠকৰ পাছত এইটো সিদ্ধান্ত লোৱা হ’ব। কংগ্ৰেছৰ একাংশই এই আঁচনিৰ অধীনত হাৰিয়ানাৰ প্ৰতিগৰাকী মহিলাক প্ৰতি মাহে ২ হাজাৰ টকা দিয়াৰ পক্ষপাতী।

কংগ্ৰেছে এই ইস্তাহাৰৰ সৈতে যুৱ, কৃষক, মহিলা আৰু দলিত সম্প্ৰদায়ৰ লোকসকলক একেলগে লক্ষ্য কৰি ল’ব বিচাৰিছে। অ’বিচি আৰু দলিতসকলকৰ বাবে কংগ্ৰেছৰ ইস্তাহাৰত সংশ্লিষ্ট সম্প্ৰদায়ৰ শিশুৰ শিক্ষাৰ বাবে জাতিগত লোকপিয়ল আৰু বৃত্তি ঘোষণা কৰা হ’ব।

দলিতসকল হাৰিয়ানাৰ জনসংখ্যাৰ প্ৰায় ২০ শতাংশ। এই সম্প্ৰদায়ৰ বাবে বিধানসভাত ১৭খন আসন সংৰক্ষিত কৰা হৈছে। কংগ্ৰেছে ইস্তাহাৰৰ এই প্ৰতিশ্ৰুতিবোৰ গেৰাণ্টি হিচাপে প্ৰচাৰ কৰিব।ইস্তাহাৰ প্ৰকাশৰ পাছত কংগ্ৰেছৰ সমগ্ৰ নিৰ্বাচনী প্ৰচাৰত এই বিষয়সমুহ অন্তৰ্ভূক্ত কৰা হ’ব।

কংগ্ৰেছে ইস্তাহাৰ প্ৰস্তুত কৰিবলৈ হাৰিয়ানাৰ প্ৰায় ২০ লাখ লোকৰ সৈতে পৰামৰ্শ লৈছে। ইস্তাহাৰৰ বাবে মতামত লোৱাৰ কাম সংগঠন আৰু ব্যক্তিগত সংস্থাৰ জৰিয়তে কৰা হৈছে। এই মতামতত দলটোৱে প্ৰতিখন জিলা আৰু প্ৰতিটো শাখাক লক্ষ্য কৰি কৰিছে। এইবাৰ গীতা ভুক্কালৰ নেতৃত্বত গঠিত সমিতিক ইস্তাহাৰ প্ৰস্তুত কৰাৰ দায়িত্ব অৰ্পণ কৰিছে কংগ্ৰেছে । ছত্তীশগড়ৰ প্ৰাক্তন উপ মুখ্যমন্ত্ৰী টি এছ সিঙদেব আৰু কংগ্ৰেছৰ মুখপাত্ৰ অমিতাভ দুবে এই সমিতিৰ সমন্বয়ক।

যোৱা দুবছৰত হিমাচল প্ৰদেশ, তেলেংগানা আৰু কৰ্ণাটকত কংগ্ৰেছ জয়ী হৈছে। এই তিনিওখন ৰাজ্যতে কংগ্ৰেছে জয়লাভ কৰাৰ ক্ষেত্ৰত ইস্তাহাৰখনে গুৰুত্বপূৰ্ণ ভূমিকা পালন কৰিছে। হিমাচলত প্ৰথমবাৰৰ বাবে কংগ্ৰেছে গেৰাণ্টি পত্ৰ জাৰি কৰিছিল। তাত দলটোৱে পুৰণি পেঞ্চন আঁচনিক এটা ডাঙৰ বিষয় হিচাপে উত্থাপন কৰিছিল।

দলটোৱে কৰ্ণাটকৰ মহিলা আৰু যুৱসকলৰ ওপৰত গুৰুত্ব দি এখন ইস্তাহাৰ প্ৰস্তুত কৰিছিল। তেলেংগানাতো একেধৰণৰ ইস্তাহাৰ প্ৰকাশ কৰা হৈছিল। কংগ্ৰেছে দক্ষিণৰ দুয়োখন ৰাজ্যতে ডাঙৰ জয় লাভ কৰিছিল। কংগ্ৰেছে লোকসভা নিৰ্বাচনত ৫ ন্যায় আৰু ২৫ গেৰাণ্টিৰ নামত এখন সংকল্প পত্ৰ প্ৰকাশ কৰিছিল।

এই সংকল্প পত্ৰখনত দলটোৱে প্ৰতিটো পৰিয়ালক বছৰি ১ লাখ টকা দিয়াৰ কথা ঘোষণা কৰিছিল। লগতে যুৱসকলক ৩০ লাখ চৰকাৰী চাকৰি আৰু কৃষকসকলক এমএছপিৰ গেৰাণ্টি দিয়াৰ কথা ঘোষণা কৰিছিল। অৱশ্যে কংগ্ৰেছ কেন্দ্ৰত চৰকাৰ গঠন কৰিব নোৱাৰিলে।