৫৯ বছৰ বয়সত তৃতীয়বাৰৰ বাবে প্ৰেমত পৰিছে আমিৰ খান! ৰহস্যময়ী নাৰীগৰাকী কোন জানেনে?

আকৌ প্ৰেমত পৰিছে আমিৰ খান!

প্ৰেম, পৰিয়াল আৰু কেৰিয়াৰ… বৰ্তমান এই তিনিটা বিষয়ক লৈ শিৰোনাম দখল কৰিছে আমিৰ খানে। সম্প্ৰতি পুত্ৰ জুনাইদ খানৰ লগত ব্যস্ত হৈ পৰিছে আমিৰে। কাৰণ ছবিগৃহলৈ আহিব ‘Loveyapa’। যাৰ প্ৰচাৰত এতিয়া ব্যস্ত হৈ পৰিছে অভিনেতাগৰাকী। ইয়াৰ উপৰিও চলিত বৰ্ষৰ শেষৰ ফালে তেওঁৰ কামবেক ছবিয়ো আহি আছে। এই কামৰ মাজতে আমিৰ খানৰ জীৱনত এগৰাকী ৰহস্যময়ী নাৰীৰ প্ৰৱেশ ঘটা বুলি চৰ্চা চলিছে। এই খবৰ দীৰ্ঘদিন ধৰি চলি আহিছে। তেওঁ কোন আৰু বলীউডৰ লগত তেওঁৰ কিবা সম্পৰ্ক আছে নেকি? অনুৰাগীৰ এই প্ৰশ্নৰ মাজতে প্ৰকাশ পাইছে আমিৰ খানৰ ৰহস্যময়ী মহিলাগৰাকীৰ নাম।

৫৯ বছৰ বয়সত তৃতীয়বাৰৰ বাবে প্ৰেমত পৰিছে আমিৰ খান। পিংকভিলাৰ প্ৰতিবেদন অনুসৰি তেওঁ এই ৰহস্যময়ী মহিলাগৰাকীক পৰিয়ালৰ সদস্যৰ সৈতেও চিনাকি কৰাই দিছে। একে সময়তে পৰিয়ালৰ সৈতে তেওঁৰ প্ৰথম সাক্ষাৎ ভালদৰেই হৈছিল। ইয়াৰ পৰা এইটো স্পষ্ট যে তেওঁলোকৰ  এই সম্পৰ্ক অতি গুৰুতৰ, সেয়েহে পৰিয়ালকো অন্তৰ্ভুক্ত কৰা হৈছে।

আমিৰৰ ৰহস্যময়ী মহিলাগৰাকীৰ নাম কি?

শেহতীয়াকৈ এক নতুন প্ৰতিবেদনত প্ৰকাশ পাইছে যে আমিৰ খানৰ ৰহস্যময়ী মহিলাগৰাকীৰ নাম গৌৰী। অৱশ্যে বলীউডৰ সৈতে গৌৰীৰ কোনো সম্পৰ্ক নাই।  ইণ্টাৰনেটত ভাইৰেল হৈ পৰিছে এই খবৰ। জানিব পৰা মতে, তেওঁ মুম্বাইত নাথাকে। বৰঞ্চ আমিৰ খানৰ ৰহস্যময়ী মহিলাগৰাকী বাংগালুৰুৰ বাসিন্দা। অৱশ্যে তেওঁ নিজৰ এই সম্পৰ্কক ব্যক্তিগতভাৱে ৰাখিব বিচাৰে। এই সন্দৰ্ভত তেওঁ এতিয়ালৈ কোনো আনুষ্ঠানিক ঘোষণা কৰা নাই।

অৱশ্যে  যদি আমিৰ খানৰ বাবে এই সম্পৰ্কত সকলো ঠিকে থাকে, তেন্তে অনুৰাগীসকলে হয়তো অতি সোনকালে এটা ডাঙৰ খবৰ লাভ কৰিব। ১৯৮৬ চনত ৰীনা দত্তৰ সৈতে হৈছিল আমিৰ খানৰ প্ৰথম বিবাহ । ১৬ বছৰ বিবাহৰ অন্তত ২০০২ চনত তেওঁলোকৰ বিবাহ বিচ্ছেদ হয়। তেওঁলোকৰ দুটাকৈ সন্তানো আছে। কন্যা- ইৰা আৰু পুত্ৰ- জুনাইদ। আচলতে তেওঁৰ প্ৰথম বিবাহ আদালতত হৈছিল। যাৰ বিষয়ে পৰিয়ালৰ লোকসকল অৱগত নাছিল।

আমিৰ খানৰ দ্বিতীয় বিবাহ

২০০৫ চনত আমিৰে দ্বিতীয়বাৰৰ বাবে কিৰণ ৰাওৰ সৈতে বিবাহপাশত আবদ্ধ হয়। অৱশ্যে ২০২১ চনত দুয়োজনে পৃথক হোৱাৰ সিদ্ধান্ত লয়। দ্বিতীয় বিবাহৰ পৰা তেওঁৰ এটি পুত্ৰ আছে, যাৰ নাম আজাদ। বিশেষ কথাটো হ’ল আমিৰৰ দ্বিতীয় পত্নী কিৰণৰ লগতো আছে ভাল বন্ধুত্ব।  এতিয়াও দুয়োজনৰ যোগাযোগ আছে। ইয়াৰ মাজতে তৃতীয়বাৰৰ বাবে প্ৰেমত পৰিছে আমিৰ খান।