অজয় দেৱগণৰ বাবেই আজিও জীৱিত আমিৰ খান! এইদৰে ৰিয়েলত হিৰ’ হৈছিল ‘সিংঘাম’…

চিনেমা হল বা মোবাইল-টেলিভিচনৰ স্ক্ৰীণত হিৰ’ অজয় দেৱগণক আপুনি দেখিছে। চিনেমা চলি থকাৰ সময়ত কাহিনীৰ পট আৰু হিৰ’ অজয়ৰ ভূমিকা দেখি কেতিয়াবা হয়তো কোনো মুহূৰ্তত ৰোমাঞ্চিত হৈ চিঞৰিও উঠিছে! চিনেমাৰ কাহিনীয়ে দাবী কৰাৰ দৰে ভিলেইনৰ হাতৰ পৰা কোনো নিৰ্দোষী লোকক ৰক্ষা কৰিছে হিৰ’ অজয় দেৱগণে, দৃশ্য দেখি চিনেমা হলত বহি থকা দৰ্শকে দিছে আনন্দৰ চিৎকাৰ। এই দৃশ্য চিনেমা প্ৰসঙ্গত। পিছে বাস্তৱ জীৱনতো এনে কাৰ্যৰ দ্বাৰা হিৰ’ হৈ পৰিছিল অজয় দেৱগণ।

পিছে অজয়ে প্ৰাণৰক্ষা কৰা লোকজনো তেনে কোনো অখ্যাত লোক নহয়। বলীউডৰ জনপ্ৰিয় অভিনেতা ‘মিষ্টাৰ পাৰফেক্টনিষ্ট’ আমিৰ খানৰ জীৱন ৰক্ষা কৰি ৰিয়েল লাইফত হিৰ’ হৈ পৰিছিল অজয় দেৱগণ। অৱশ্যে এই ঘটনা এতিয়াৰ নহয়। বলীউডৰ এখন পুৰণি ছবি ‘ইছক’ৰ শ্বুটিঙৰ সময়ত ঘটিছিল এই ঘটনা। এই কমেডী ছবিখনত আছিল অজয় ​​দেৱগন, আমিৰ খান, জুহি চাওলা আৰু কাজলে অভিনয় কৰিছিল।

শেহতীয়াকৈ এটা অনুষ্ঠানৰ সময়ত দুয়োগৰাকী অভিনেতাই ‘ইছক’ চিনেমাখনৰ শ্বুটিঙৰ কথা অনুৰাগীৰ আগত প্ৰকাশ কৰিছিল। ‘তেৰা য়াৰ হুঁ মেই’ৰ মহুৰত অনুষ্ঠানত একেলগে উপস্থিত থাকে আমিৰ খান আৰু অজয় ​​দেৱগণ। সেই সময়ছোৱাত দুয়ো ইছক ছবিৰ শ্বুটিঙৰ এটা বিশেষ ঘটনাৰ কথা উল্লেখ কৰিছে। আমিৰ খানে উল্লেখ কৰা মতে ছবিখনৰ এটা দৃশ্যৰ শ্বুটিং কৰাৰ সময়ত এটা চিম্পাঞ্জীয়ে তেওঁক আক্ৰমণ কৰিছিল।

আমিৰ খানে এই ঘটনাৰ প্ৰসঙ্গ উল্লেখ কৰাৰ লগে লগে অজয় ​​দেৱগনে কয় যে আমিৰ খানে সেই চিম্পাঞ্জীটোৰ ওপৰত পানী পেলাইছিল আৰু তাৰ পিছতে চিম্পাঞ্জীটোৱে আমিৰক পিছে পিছে খেদি গৈছিল। তাৰ পিছতে আমিৰ খানে কয় যে চিম্পাঞ্জীটোৰ ভয়ত তেওঁ ইফালে সিফালে দৌৰিবলৈ আৰম্ভ কৰিছিল আৰু সেই স্থানত উপস্থিত থকা লোকসকলৰ পৰা সহায় বিচাৰে।

এনে ভয়ানক বিপদৰ পৰা আমিৰক উদ্ধাৰ কৰিছিল অজয় দেৱগণে। আমিৰ খানৰ ভাষাত সেই সময়ত অজয় ​​দেৱগণৰ একচন স্কিল কামত আহিছিল আৰু অজয়ে চলন্ত গাড়ী এখনত উঠি আমিৰক টানি গাড়ীখনত উঠাই তেওঁৰ প্ৰাণৰক্ষা কৰিছিল। এই ঘটনা উল্লেখ কৰি আমিৰ খানে লগতে কয় যে যেতিয়াই তেওঁ অজয় দেৱগণক লগ পায় তেতিয়াই তেওঁ বহুত সুখী অনুভৱ কৰে।

আমিৰে লগতে অনুষ্ঠানত অজয় দেৱগণৰ প্ৰতি তেওঁৰ স্নেহো প্ৰকাশ কৰে। তেওঁ লগতে দুয়োগৰাকীৰ মাজত সঘনাই সাক্ষাৎ নহয় যদিও যেতিয়াই সাক্ষাৎ হয়, দুয়ো আন্তৰিকতাৰে মিলিত হয় বুলি উল্লেখ কৰে। যি কি নহওক আমিৰ আৰু অজয়ৰ এই ঘটনাই অনুৰাগীৰ মাজত এতিয়া ব্যাপক চৰ্চাৰ সৃষ্টি কৰিছে।