আল্লু অৰ্জুনলৈ ডাঙৰ সকাহ, সন্ধ্যা থিয়েটাৰ গোচৰত জামিন মঞ্জুৰ আদালতৰ

সন্ধ্যা থিয়েটাৰ গোচৰৰ সন্দৰ্ভত দক্ষিণৰ চুপাৰষ্টাৰ আল্লু অৰ্জুনক নিয়মীয়া জামিন প্ৰদান কৰিছে নামপল্লী আদালতে। আদালতে তেওঁক ৫-৫০ হাজাৰ টকাৰ দুটা জামানত বণ্ডত জামিন প্ৰদান কৰিছে। ইয়াৰ লগতে আদালতে তেওঁক প্ৰতি দেওবাৰে চিক্কাড়পাল্লি আৰক্ষী চকীত হাজিৰ হ’বলৈ নিৰ্দেশ দিছে। ইয়াৰ পূৰ্বে, তেলেংগানা উচ্চ ন্যায়ালয়ে তেওঁক অন্তৱৰ্তীকালীন জামিন প্ৰদান কৰিছিল।

আল্লু অৰ্জুনৰ নিয়মীয়া জামিন আবেদনৰ শুনানি ৩০ ডিচেম্বৰত হৈছিল। কিন্তু সেইদিনা ৰায়টো সংৰক্ষিত ৰখা হৈছিল। ইয়াৰ পাছত জানুৱাৰী ৩ তাৰিখে, আদালতে ইয়াৰ ৰায়দান দিয়ে। ইয়াৰ লগতে সন্ধ্যা থিয়েটাৰ গোচৰৰ  সকাহ লাভ কৰে দক্ষিণৰ চুপাৰষ্টাৰগৰাকীয়ে।

সমগ্ৰ বিষয়টো কি?

প্ৰকৃততে, ৪ ডিচেম্বৰত ‘পুষ্পা ২ চলচ্চিত্ৰখনৰ প্ৰিমিয়াৰৰ সময়ত হায়দৰাবাদৰ সন্ধ্যা থিয়েটাৰত পদপিষ্টৰ ঘটনা সংঘটিত হৈছিল। সেই সময়ছোৱাত পদপিষ্ট হৈ প্ৰাণ হেৰুৱাইছিল এগৰাকী মহিলাই। লগতে তেওঁৰ কিশোৰ পুত্ৰও এই ঘটনাত গুৰুতৰভাৱে আহত হৈছিল।  ইয়াৰ পিছতে একেদিনাই নিম্ন আদালতে অভিনেতাগৰাকীক ১৪ দিনৰ বাবে জিম্মালৈ প্ৰেৰণ কৰিছিল। নিম্ন ন্যায়ালয়ৰ নিৰ্দেশৰ পিছতে কটকটীয়া নিৰাপত্তাৰ ব্যৱস্থাৰ মাজত আল্লু অৰ্জুনক চাঞ্চলগুড়া কাৰাগাৰলৈ প্ৰেৰণ কৰা হৈছিল। অৱশ্যে, একেদিনাই তেলেংগানা উচ্চ ন্যায়ালয়ে তেওঁক অন্তৱৰ্তীকালীন জামিন প্ৰদান কৰে। আৰু এতিয়া তেওঁ নিয়মীয়া জামিন লাভ কৰিছে।

পুষ্পা ২’য়ে সৃষ্টি কৰিছে ইতিহাস

ইফালে যদি আমি আল্লু অৰ্জুনৰ ছবিখনৰ কথা কওঁ, শেহতীয়াকৈ ‘পুষ্পা 2’য়ে যথেষ্ট সফলতা লাভ কৰিছে। ই দেশৰ দ্বিতীয় সৰ্বাধিক উপাৰ্জন কাৰী ছবি হৈ পৰিছে। আগতে এই অভিলেখ প্ৰভাসৰ ‘বাহুৱলী ২’ৰ নামত আছিল। কিন্তু ২৮ দিনত, ‘পুষ্পা 2’য়ে বিশ্বজুৰি ১৭৯৯ কোটি উপাৰ্জন কৰি ইতিহাস সৃষ্টি কৰি এই অভিলেখ দখল কৰিছিল।

এতিয়াও অব্যাহত আছে ‘পুষ্পা ২’ৰ উপাৰ্জন। ৫ ডিচেম্বৰত মুক্তি দিয়া হৈছিল ছবিখন । একে সময়তে, মুক্তিৰ প্ৰায় এমাহ পিছত, মানুহে এতিয়াও এই ছবিখনৰ উপভোগ কৰিবলৈ থিয়েটাৰলৈ গৈ থকা দেখা গৈছে। উপাৰ্জনৰ ক্ষেত্ৰত, ‘পুষ্পা 2’ৰ আগত এতিয়া মাত্ৰ আমিৰ খানৰ ‘দংগল’ আছে, যিয়ে ২০৭০ কোটি টকা উপাৰ্জন কৰিছিল।