Arijit Singh: আজি বলীউডৰ কণ্ঠশিল্পী অৰিজিৎ সিঙৰ জন্মদিন, কেনেকৈ আৰম্ভ হৈছিল সংগীত যাত্ৰা?

সুমধুৰ কণ্ঠৰে সকলোৰে হৃদয় জয় কৰা গায়ক অৰিজিৎ সিঙৰ আজি জন্মদিন ৷ জীৱনৰ ৩৮ টা বসন্ত গৰকিলে কণ্ঠশিল্পীগৰাকীয়ে ৷ ১৯৮৭ চনৰ ২৫ এপ্ৰিলত পশ্চিম বংগৰ মুৰ্ছিদাবাদ জিলাৰ জিয়াগঞ্জ চহৰত পাঞ্জাবী শিখ পিতৃ কক্কৰ সিং আৰু বাঙালী হিন্দু মাতৃ অদিতি সিঙৰ ঘৰত জন্মগ্ৰহণ কৰে। দেশ বিভাজনৰ সময়ত তেওঁৰ পূৰ্বপুৰুষসকল লাহোৰৰ পৰা পশ্চিম বংগলৈ আহিছিল। অতি কম বয়সতে ঘৰতে সংগীতৰ প্ৰশিক্ষণ ল’বলৈ আৰম্ভ কৰিছিল।

তেওঁৰ মামীয়ে ভাৰতীয় শাস্ত্ৰীয় সংগীতৰ প্ৰশিক্ষণ লৈছিল, আৰু আইতাই (মাতৃৰ ফালৰ) গান গাইছিল। তেওঁৰ মামাই তবলা বজাইছিল আৰু মাকেও তবলা বজাই গান গাইছিল। প্ৰথমে ৰাজা বিজয় সিং হাইস্কুলত আৰু পিছলৈ তেওঁ কল্যাণী বিশ্ববিদ্যালয়ৰ অন্তৰ্গত শ্ৰীপদ সিং কলেজত অধ্যয়ন কৰে। তেওঁৰ মতে তেওঁ “এজন মান্য ছাত্ৰ আছিল, কিন্তু সংগীতৰ প্ৰতি অধিক গুৰুত্ব দিছিল” আৰু তেওঁৰ পিতৃ-মাতৃয়ে তেওঁক পেছাদাৰীভাৱে প্ৰশিক্ষণ দিয়াৰ সিদ্ধান্ত লৈছিল। ৰাজেন্দ্ৰ প্ৰসাদ হাজাৰীয়ে ভাৰতীয় শাস্ত্ৰীয় সংগীত আৰু ধীৰেন্দ্ৰ প্ৰসাদ হাজাৰীয়ে তেওঁক তবলাৰ প্ৰশিক্ষণ দিয়ে। বীৰেন্দ্ৰ প্ৰসাদ হাজাৰীয়ে তেওঁক ৰবীন্দ্ৰ সংগীত (ৰবীন্দ্ৰনাথ ঠাকুৰৰ দ্বাৰা ৰচিত আৰু সুৰাৰোপিত গীত) আৰু পপ সংগীত শিকাইছিল। তিনি বছৰ বয়সত হাজাৰী ভাতৃদ্বয়ৰ অধীনত প্ৰশিক্ষণ আৰম্ভ কৰে, আৰু ন বছৰ বয়সত ভাৰতীয় শাস্ত্ৰীয় সংগীতৰ কণ্ঠৰ প্ৰশিক্ষণৰ বাবে চৰকাৰৰ পৰা এটি বৃত্তি লাভ কৰে।

ডাঙৰ হোৱাৰ পাছত তেওঁ মোজাৰ্ট, বিথোভেন আৰু বাংলা শাস্ত্ৰীয় সংগীত শুনিছিল। বড়ে গুলাম আলি খাঁ, উস্তাদ ৰছিদ খান, জাকিৰ হুছেইন আৰু আনন্দ চেটাৰ্জীৰ দৰে সংগীতজ্ঞক তেওঁ নিজৰ আদৰ্শ বুলি গণ্য কৰিছিল আৰু কিশোৰ কুমাৰ, হেমন্ত কুমাৰ, মান্না দেৰ গীত শুনি ভাল পাইছিল।

কেনেকৈ আৰম্ভ হৈছিল যাত্ৰা

অৰিজিৎ সিং এগৰাকী ভাৰতীয় নেপথ্য গায়ক আৰু সংগীত সুৰকাৰ। এটা ৰাষ্ট্ৰীয় চলচ্চিত্ৰ বঁটা আৰু সাতটা ফিল্মফেয়াৰ বঁটাকে ধৰি কেইবাটাও প্ৰশংসা তেওঁ লাভ কৰিছে। হিন্দী আৰু বাংলা ভাষাৰ উপৰি কেইবাটাও ভাৰতীয় ভাষাত তেওঁ গীত বাণীবদ্ধ কৰিছে। নম্ৰ ব্যক্তিত্ব আৰু সৰল জীৱনশৈলীৰ বাবেও তেওঁ পৰিচিত।

২০০৫ চনত সমসাময়িক ৰিয়েলিটি শ্ব’ ফেম গুৰুকুলত অংশগ্ৰহণ কৰি সিঙে তেওঁৰ কৰ্মজীৱনৰ আৰম্ভণি কৰিছিল। ২০১১ চনত সিঙে ছৈম ভাট আৰু মহম্মদ ইৰফানৰ সৈতে মিথুনৰ দ্বাৰা ৰচিত মাৰ্ডাৰ ২ ছবিৰ “ফিৰ মহব্বত” গীতটোৰে হিন্দী চলচ্চিত্ৰ জগতত আত্মপ্ৰকাশ কৰে যদিও ২০০৯ চনত গীতটো বাণীবদ্ধ কৰা হৈছিল। একে বছৰতে তেওঁ এজেণ্ট বিনোদৰ “ৰাবতা”, ১৯২০: ইভিল ৰিটাৰ্নছৰ “উস্কা হি কলা” আৰু চাংহাইৰ “দুৱা” আদি জনপ্ৰিয় গীত গাইছিল।

২০১৩ চনত আছিকি ২ৰ সফল ট্ৰেক “তুম হি হো” আৰু “চাহু মেই ইয়া না” মুক্তি পোৱাৰ পাছত তেওঁ ব্যাপক স্বীকৃতি লাভ কৰে। স্পটিফাইয়ে তেওঁক ২০২০, ২০২১, ২০২২ আৰু ২০২৩ চনৰ সৰ্বাধিক ষ্ট্ৰীম হোৱা ভাৰতীয় শিল্পী হিচাপে ঘোষণা কৰে। তেওঁ বিশ্বজুৰি ২য় সৰ্বাধিক অনুসৰণ কৰা শিল্পী আৰু স্পটিফাইত সৰ্বাধিক অনুসৰণ কৰা এছিয়ান ব্যক্তি।