Bigg Boss OTT 2ৰ বিজয়ী এলভিছ যাদৱৰ বিৰুদ্ধে EDৰ চমন! মানি লণ্ডাৰিং গোচৰত চলাব সোধা-পোছা

এলভিছ যাদৱ

ইউটিউবাৰ আৰু বিগ বছ অটিটি ২ বিজয়ী সিদ্ধাৰ্থ যাদৱ ওৰফে এলভিছ যাদৱৰ সমস্যা বৃদ্ধি পাইছে । EDয়ে এলভিছক তেওঁৰ দলত নিষিদ্ধ সাপৰ বিষ ব্যৱহাৰ সম্পৰ্কীয় এটা মানি লণ্ডাৰিং গোচৰৰ সন্দৰ্ভত চমন জাৰি কৰিছে। ২৩ জুলাইত সোধা-পোছাৰ বাবে ইউটিউবাৰক লক্ষ্ণৌলৈ মাতিছে EDয়ে। ইয়াৰ আগতে, ইডিয়ে জাননী দি এলভিছক ৮ জুলাইত মাতি পঠিয়াইছিল। কিন্তু তেওঁ বিদেশত আছে বুলি কৈ কেইদিনমানৰ সময় বিচাৰিছিল। কিছুমাহৰ পূৰ্বে পাৰ্টিত নিষিদ্ধ সাপৰ বিষ ব্যৱহাৰ কৰাৰ সন্দৰ্ভত ধৰা পৰিছিল এলভিছ যাদৱ। যাৰ বাবে কাৰাগাৰলৈ যাব লগা হৈছিল এলভিছ। এতিয়া এই গোচৰটোৰ সৈতে সম্পৰ্কিত মানি লণ্ডাৰিং গোচৰত। এলভিছ যাদৱক সোধা-পোছাৰ বাবে চমন জাৰি কৰিছে EDয়ে।

EDয়ে মে মাহত যাদৱৰ বিৰুদ্ধে মানি লণ্ডাৰিং আইনৰ অধীনত এটা গোচৰ ৰুজু কৰিছিল। উত্তৰ প্ৰদেশ আৰক্ষীয়ে এলভিছ যাদৱ আৰু সংশ্লিষ্ট আনসকলৰ বিৰুদ্ধে এখন এজাহাৰ পঞ্জীয়ন কৰিছিল আৰু অভিযোগপত্ৰও দাখিল কৰিছিল। এই বিষয়ে বিবেচনা কৰি EDয়ে এটা গোচৰ ৰুজু কৰিছিল।

এই ক্ষেত্ৰত, এলভিছ যাদৱৰ সৈতে সম্পৰ্কিত ৰাহুল যাদৱ ওৰফে ৰাহুল ফৈজালপুৰীয়াক চলিত সপ্তাহত EDয়ে সোধা-পোছা কৰিছিল। বিষয়াসকলে কৈছে যে ফৈজালপুৰীয়াক পুনৰ সোধা-পোছাৰ বাবে মাতি অনা হ’ব পাৰে। EDয়ে ৰেভ পাৰ্টিৰ বাবে অবৈধ ধনৰ ব্যৱহাৰ আৰু অপৰাধৰ দ্বাৰা ধন উপাৰ্জন সন্দৰ্ভত তদন্ত কৰি আছে।

এলভিছ যাদৱক চলিত বছৰৰ ১৭ মাৰ্চত নয়ডা আৰক্ষীয়ে ৰেভ পাৰ্টিত সাপৰ বিষক ড্ৰাগ হিচাপে ব্যৱহাৰ কৰাৰ অভিযোগত গ্ৰেপ্তাৰ কৰিছিল। আৰক্ষীয়ে এনডিপিএছ আইনৰ অধীনত এলভিছৰ বিৰুদ্ধে এটা গোচৰ ৰুজু কৰিছিল। বিগত বৰ্ষৰ নৱেম্বৰত, নয়দা চেক্টৰ 49 আৰক্ষী থানাত এলভিছকে ধৰি ৬জন লোকৰ বিৰুদ্ধে এটা গোচৰ ৰুজু কৰা হৈছিল। এই গোচৰটো এটা বেচৰকাৰী সংগঠন পিপল ফৰ এনিমেলছৰ দ্বাৰা দাখিল কৰা হৈছিল। গোচৰটোৰ বাকী ৫ জন অভিযুক্তকো গ্ৰেপ্তাৰ কৰা হৈছিল আৰু পাছত জামিনত মুক্তি দিয়া হৈছিল।

এলভিছ যাদৱ এজন বিখ্যাত ইউটিউবাৰ। ইউটিউবত তেওঁৰ ১৫ মিলিয়নতকৈও অধিক ছাবস্ক্ৰাইবাৰ আছে। এলভিছ বিগত বছৰত ছলমান খানৰ ৰিয়েলিটি শ্ব’ বিগ বছ অ’টিটি চিজন ২ত অংশগ্ৰহণ কৰিছিল। তেওঁ অভিষেক মালহানক পৰাস্ত কৰি ৰিয়েলিটি শ্ব’ৰ ট্ৰফী জিকিছিল।