পুনৰ Emergencyৰ মুক্তিত বাধা! শীঘ্ৰে নতুন দিন ঘোষণা কৰিব কংগনা ৰাণাৱটে

কংগনা ৰাণাৱটৰ ছবি ‘ইমাৰ্জেন্সি’ৰ মুক্তি সন্দৰ্ভত বিতৰ্ক অব্যাহত আছে। ছবিখন আগতে ৬ ছেপ্টেম্বৰত মুক্তি দিয়াৰ কথা আছিল। কিন্তু চেঞ্চৰ বোৰ্ডৰ পৰা প্ৰমাণ পত্ৰ নোপোৱা বাবে ছবিখনৰ মুক্তি পিছুৱাই দিয়া হৈছে। কংগনাই নিজেই ছ’চিয়েল মিডিয়া প্লেটফৰ্ম এক্সত এই তথ্য দিছে। কংগনাৰ চলচ্চিত্ৰখন ১৯৭৫ চনত দেশৰ ৰাজনৈতিক উত্থান-পতনৰ ওপৰত আধাৰিত। ছবিখনত কংগনাই ইন্দিৰা গান্ধীৰ চৰিত্ৰত অভিনয় কৰিছে।

কংগনা ৰাণাৱটে ছ’চিয়েল মিডিয়াত কৈছে, “গভীৰ দুখেৰে মই ঘোষণা কৰিলো যে মোৰ পৰিচালিত ছবি ইমাৰ্জেন্সিৰ মুক্তিৰ তাৰিখ পিছুৱাই দিয়া হৈছে। আমি এতিয়াও চেঞ্চৰ বোৰ্ডৰ নিশ্চিতিৰ বাবে অপেক্ষা কৰি আছোঁ। মুক্তিৰ নতুন তাৰিখ শীঘ্ৰেই ঘোষণা কৰা হ’ব। আপোনাকে বুজি পোৱা আৰু ধৈৰ্য্য ধৰাৰ বাবে ধন্যবাদ।”

With a heavy heart I announce that my directorial Emergency has been postponed, we are still waiting for the certification from censor board, new release date will be announced soon, thanks for your understanding and patience 🙏

— Kangana Ranaut (@KanganaTeam) September 6, 2024

‘Emergency’ ছবিখনে শিখ সম্প্ৰদায়ৰ সদস্যসকলৰ বিৰোধিতাৰ সন্মুখীন হৈছে। সম্প্ৰদায়টোৱে দাবী কৰিছে যে ছবিখনত শিখসকলক ভুলকৈ চিত্ৰিত কৰা হৈছে। তেওঁলোকৰ মতে, ছবিখনত তথ্যবোৰ ভুলকৈ দেখুওৱা হৈছে। তেওঁলোকে ছবিখনৰ মুক্তি বন্ধ কৰিবলৈ মধ্য প্ৰদেশ উচ্চ ন্যায়ালয়ত আবেদন দাখিল কৰিছিল। দাবী কৰিছিল যে ছবিখনে উত্তেজনা সৃষ্টিৰ লগতে আৰু ভুল বাৰ্তা প্ৰেৰণ কৰিব পাৰে। । দাখিল কৰা আবেদনৰ সন্দৰ্ভত মধ্য প্ৰদেশ উচ্চ ন্যায়ালয়ে বলীউডৰ অভিনেত্ৰী কংগনা ৰাণাৱট, কেন্দ্ৰীয় চৰকাৰ, চেঞ্চৰ বোৰ্ডলৈ জাননী প্ৰেৰণ কৰিছিল। জাননীখনৰ উত্তৰ দি চিবিএফচিয়ে আদালতক কয় যে তেওঁলোকে এতিয়ালৈকে ছবিখনক চেঞ্চৰ প্ৰমাণপত্ৰ দিয়া নাই আৰু ছবিখন এতিয়াও বিবেচনাধীন হৈ আছে। চেঞ্চৰ বোৰ্ডে আদালতক কৈছিল যে প্ৰমাণপত্ৰখন দিয়া হৈছিল, কিন্তু পাছত বৰ্ধিত উত্তেজনাৰ বাবে ইয়াক বন্ধ কৰা হৈছিল।

৬ ছেপ্টেম্বৰত ছবিখন মুক্তি দিবলৈ ‘জি ষ্টুডিঅ’ই বোম্বাই উচ্চ ন্যায়ালয়ত চেঞ্চৰ প্ৰমাণপত্ৰ বিচাৰি এখন আবেদন দাখিল কৰিছিল। তাৰ পাছত আদালতে ৪ ছেপ্টেম্বৰত কোনো আদেশ প্ৰদান কৰিবলৈ অস্বীকাৰ কৰে। আদালতে ১৮ ছেপ্টেম্বৰত শুনানিৰ পৰৱৰ্তী তাৰিখ হিচাপে নিৰ্ধাৰণ কৰিছে।