পাকিস্তানৰ পৰা কপিল শৰ্মালৈ মৃত্যুৰ ভাবুকি, লক্ষ্যত আছে আন ৩ গৰাকী তাৰকা…

ছেইফ আলী খানৰ ওপৰত হোৱা ছুৰী আক্ৰমণৰ ঘটনাৰ চাঞ্চল্য মাৰ নাযাওতেই এইবাৰ কৌতুক অভিনেতা কপিল শৰ্মাই লাভ কৰিছে মৃত্যুৰ ভাবুকি । কোৱা হৈছে যে কপিল শৰ্মাই ই-মেইলযোগে পাকিস্তানৰ পৰা মৃত্যুৰ ভাবুকি লাভ কৰিছে। কপিলৰ উপৰিও সুগন্ধা মিশ্ৰ, কোৰিঅ’গ্ৰাফাৰ ৰেম’ ডিচুজা আৰু ৰাজপাল যাদৱেও ভাবুকিপূৰ্ণ ই-মেইল লাভ কৰিছে। জানিব পৰা মতে ‘বিষ্ণু’ নামৰ এজন ব্যক্তিৰ পৰা পোৱা গৈছে ভাবুকিপূৰ্ণ ই-মেইল বাৰ্তা। য’ত দাবী কৰিছে যে তেওঁ সকলো তাৰকাসকলৰ কাৰ্যকলাপৰ ওপৰত নজৰ ৰাখি আছে।

ই-মেইলত কপিল শৰ্মা, আত্মীয় আৰু তেওঁৰ সৈতে জড়িত আশে-পাশে বাস কৰা লোকসকলকো মৃত্যুৰ ভাবুকি দিয়া হৈছে। এই সন্দৰ্ভত  ভাৰতীয় দণ্ডবিধিৰ ৩৫১ (৩) ধাৰাৰ অধীনত এটা গোচৰ ৰুজু কৰিছে মুম্বাই আৰক্ষীয়ে । আৰক্ষীয়ে জানিবলৈ চেষ্টা কৰি আছে যে এই ই-মেইলবোৰ কোনে প্ৰেৰণ কৰিছে। অৱশ্যে বিষয়টোক লৈ কপিল শৰ্মাই এতিয়ালৈকে কোনো ধৰণৰ প্ৰতিক্ৰিয়া প্ৰকাশ কৰা নাই।

ইয়াৰ উপৰিও অভিনেতা ৰাজপাল যাদৱে ভাবুকিপূৰ্ণ ই-মেইল সন্দৰ্ভত আৰক্ষীৰ ওচৰত এক অভিযোগ কৰিছে। তেওঁৰ অভিযোগৰ ওপৰত এখন এজাহাৰও পঞ্জীয়ন কৰা হৈছে। সুগন্ধা মিশ্ৰ আৰু ৰেম’ ডিচুজাইও ভাবুকিপূৰ্ণ ইমেইল পোৱাৰ পিছত আৰক্ষীৰ ওচৰত অভিযোগ কৰিছিল। কেৱল এয়াই নহয়, ভাবুকিভৰা ই-মেইলতো লিখা হৈছে যে সকলোৱে ৮ ঘণ্টাৰ ভিতৰত উত্তৰ দিব লাগিব। ই-মেইলত লিখা আছে যে আপোনাৰ প্ৰতিটো পদক্ষেপ নিৰীক্ষণ কৰা হৈছে। এইটো গুৰুত্বপূৰ্ণ যে আমি এটা সংবেদনশীল বিষয় আপোনাৰ দৃষ্টিগোচৰ কৰিম। এয়া ৰাজহুৱা ষ্টান্ট বা আপোনাক হাৰাশাস্তি কৰাৰ প্ৰয়াস নহয়।

ই-মেইলত, সকলো তাৰকাক এই বাৰ্তাটো গুৰুত্বসহকাৰে ল’বলৈ আৰু ইয়াক গোপন ৰাখিবলৈ কোৱা হৈছে। যদি তাৰকাসকলে এনে নকৰে, ইয়াৰ পৰিণাম গুৰুতৰ হ’ব পাৰে। যি তেওঁলোকৰ ব্যক্তিগত জীৱনক প্ৰভাৱিত কৰিব পাৰে। অৱশ্যে,  কোনো তাৰকাই ই-মেইলযোগে ভাবুকি লাভ কৰা এয়া প্ৰথম ঘটনা নহয়। যোৱা বছৰৰ আৰম্ভণিতে চলমান খানেও কেইবাবাৰো ভাবুকি লাভ কৰিছিল।