শ্বুটিং স্থলীত দুৰ্ঘটনাঃ ষ্টাণ্ট কৰি আঘাতপ্ৰাপ্ত অক্ষয় কুমাৰ, কেনে আছে খিলাড়ী!
বলীউডৰ খিলাড়ী অক্ষয় কুমাৰ সম্প্ৰতি নতুন ছবিৰ বাবে শ্বুটিঙত ব্যস্ত। পিছে শ্বুটিঙৰ সময়তে আজি সংঘটিত হৈছে এক অনাকাংক্ষিত পৰিস্থিতিৰ। শ্বুটিং কৰি থকাৰ সময়তে আজি এক দুৰ্ঘটনাৰ সন্মুখীন হয় অক্ষয়। এই দুৰ্ঘটনাত তেওঁ আঘাত পোৱা বুলি জানিব পৰা গৈছে।
একেলগে কেইবাখনো একচনধৰ্মী তথা চিৰিয়াছধৰ্মী ছবিত কাম কৰাৰ পিছত এইবাৰ পুনৰ কমেডি চৰিত্ৰ ৰূপায়নৰ বাবে সাজু হৈছে বলীউডৰ খিলাড়ী অক্ষয় কুমাৰ। আগন্তুক ছবি হাউচফুল ৫ৰ জৰিয়তে কমেডি ছবিলৈ প্ৰত্যাৱৰ্তনৰ বাবে সাজু হৈছে অভিনেতাগৰাকী। সম্প্ৰতি অক্ষয় কুমাৰ নতুন এই ছবিখনৰ বাবে শ্বুটিঙত ব্যস্ত। পিছে শ্বুটিঙৰ সময়তে আজি সংঘটিত হৈছে এক অনাকাংক্ষিত পৰিস্থিতিৰ। শ্বুটিং কৰি থকাৰ সময়তে আজি এক দুৰ্ঘটনাৰ সন্মুখীন হয় অক্ষয়। এই দুৰ্ঘটনাত তেওঁ আঘাত পোৱা বুলি জানিব পৰা গৈছে।
প্ৰকাশিত খবৰ অনুসৰি অক্ষয়ে ছবিখনৰ বাবে এটা একচনৰ দৃশ্যৰ শ্বুটিং কৰি থকাৰ সময়তে এই দুৰ্ঘটনা সংঘটিত হয়। দৃশ্যটোৰ বাবে অভিনয় কৰি থাকোঁতে হঠাতে তেওঁৰ ওপৰত কিছু বস্তু বাগৰি পৰে আৰু ইয়াৰ ফলত অক্ষয় কুমাৰ আঘাতপ্ৰাপ্ত হয়। সংবাদ মাধ্যমৰ বাতৰি মতে এই দুৰ্ঘটনাত চকুত আঘাত পাইছে অক্ষয় কুমাৰে। দুৰ্ঘটনা সংঘটিত হোৱাৰ পিছত লগে লগে অক্ষয়ক চিকিৎসালয়লৈ লৈ যোৱা হয়।
বৰ্তমান চিকিৎসকে তেওঁক জিৰণি ল’বলৈ পৰামৰ্শ দিছে বুলি জানিব পৰা গৈছে। নিজৰ কামৰ প্ৰতি অত্যন্ত চিৰিয়াছ হিচাপে অক্ষয় কুমাৰৰ এক বিশেষ পৰিচয় আছে। যিকোনো ছবিত কাম কৰাৰ সময়ত দৃশ্যাংশত থকা নিজৰ ষ্টাণ্টবোৰো তেওঁ প্ৰায় নিজেই কৰে। সম্ভাৱ্য যিকোনো পৰিস্থিতিৰ প্ৰতি লক্ষ্য ৰাখি শ্বুটিংস্থলীত প্ৰতিটো ধৰণৰ নিৰাপত্তাৰ দিশতে চকু দিয়া হয় যদিও কেতিয়াবা সৰু-সুৰা কিছু দুৰ্ঘটনাও ঘটে।
তথ্য অনুসৰি অক্ষয় কুমাৰ গুৰুতৰভাৱে আহত হোৱা নাই যদিও তেওঁক জিৰণি ল’বলৈ কোৱা হৈছে। খিলাড়ী কুমাৰৰ এই আঘাতৰ বাবে ছবিখনৰ শ্বুটিং স্বাভাৱিকতেই কিছুসময়ৰ বাবে বন্ধ হৈ পৰে। পিছে সাময়িক বিৰামৰ পিছত পুনৰ আৰম্ভ হয় শ্বুটিং। অৱশ্যে দুৰ্ঘটনাত লাভ কৰা আঘাতৰ বাবে বন্ধ হৈ পৰিছে অক্ষয়ৰ দৃশ্যৰ শ্বুটিং। এই দৃশ্যবোৰ তেওঁৰ সুস্থ হোৱাৰ পিছতহে শ্বুটিং কৰা হ’ব।
নিজৰ কামৰ প্ৰতি চিৰিয়াছ অক্ষয়ে সময়মতে নিজৰ ছবিৰ শ্বুটিং শেষ কৰি ভাল পায় বুলি সততে চৰ্চিত হয় আৰু প্ৰতিবাৰেই ইয়াৰ প্ৰমাণো দি আহিছে অভিনেতাগৰাকীয়ে। এনে পৰিস্থিতিত তেওঁ অতি সোনকালে সুস্থ হৈ শ্বুটিঙলৈ ঘূৰি অহাৰ সম্ভাৱনা আছে। উল্লেখ্য যে নিৰ্মিয়মান হাউচফুল ৫ত অক্ষয় কুমাৰৰ লগতে ইয়াত ৰিতেশ দেছমুখ, অভিষেক বচ্চন, শ্ৰেয়াছ তালপাড়ে, চাংকি পাণ্ডে, জেকুলিন ফাৰ্নাণ্ডেজ, নাৰ্গিছ ফাখৰী, ফাৰডিন খানকে ধৰি বহু তাৰকাক দেখা যাব।
তৰুণ মানসুখানীয়ে পৰিচালনা কৰিছে ছবিখন অহা বৰ্ষৰ ৬ জুনত মুক্তি পাব। চলিত বৰ্ষৰ আৰম্ভণিতে ইউৰোপত ছবিখনৰ শ্বুটিং আৰম্ভ হৈছিল। লক্ষণীয়ভাৱে ৪০ দিন ধৰি ক্ৰুজ জাহাজত ছবিখনৰ শ্বুটিং কৰিছিল অভিনেতা-অভিনেত্ৰীসকলে আৰু এইসময়ত নিউকেষ্টলৰ পৰা আৰম্ভ কৰি স্পেইন, নৰ্মাণ্ডি, হনফ্লেৰ আৰু প্লাইমাউথৰ পৰ্যন্ত ভ্ৰমণ কৰিছিল।
