নতুন বৰ্ষত অ’টিটিয়ে দিব দৰ্শকক অফুৰন্ত আমোদঃ চাওক কেইখনমান ৱেব ছিৰিজৰ বিষয়ে…

ক’ভিডৰ সময়ত অতি ব্যাপকভাৱে দৰ্শকৰ কাষ চাপিছিল অ’টিটি প্লেটফৰ্মসমূহ। বিভিন্ন অ’টিটি প্লেটফৰ্মত মুক্তি পোৱা ৱেব ছিৰিজসমূহে চিনে ৰসিকসকলক এক অনন্য সোৱাদ দিছিল। ইয়াৰ পিছৰ পৰাই সাধাৰণ দৰ্শকৰ মাজত ৱেব ছিৰিজৰ জনপ্ৰিয়তা অধিক বৃদ্ধি পোৱা বুলি একপ্ৰকাৰে ক’ব পাৰি। এই নতুন বৰ্ষতো অ’টিটি প্লেটফৰ্মসমূহ নতুন সম্ভাৰেৰে দৰ্শকৰ কাষ চাপিবলৈ সাজু হৈছে। চাওঁ আহক মুক্তিৰ অপেক্ষাত থকা কেইখনমান চৰ্চিত ছিৰিজৰ বিষয়ে।

পাতল লোক

২০২০ চনত মুক্তি লাভ কৰিছিল ‘পাতল লোক’ নামৰ ৱেব ছিৰিজখনে। জয়দীপ আহলাৱত, অনিন্দিতা বসু, অভিষেক বেনাৰ্জী আৰু স্বস্তিকা মুখাৰ্জীৰ দৰে অভিনেতা-অভিনেত্ৰীসমৃদ্ধ এই ৱেব ছিৰিজে ব্যাপক সমাদৰ লাভ কৰিছিল। এতিয়া অহা ১৭ জানুৱাৰীত এই ছিৰিজৰ ছিকুৱেল ‘পাতল লোক ছিজন ২’ প্ৰাইম ভিডিঅ’ত মুক্তি পাব।

দ্য ফেমিলি মেন

মনোজ বাজপেয়ীয়ে অভিনীত ‘দ্য ফেমিলি মেন’ দৰ্শকৰ মাজত জনপ্ৰিয় হোৱা অন্যতম এক ৱেব ছিৰিজৰ। এই ছিৰিজৰ ইতিমধ্যে মুক্তিপ্ৰাপ্ত দুয়োটা ছিজন দৰ্শকে আদৰি লৈছিল। ইয়াৰ তৃতীয় ছিজনৰ শ্বুটিং সম্পূৰ্ণ হৈছে আৰু ইয়াৰ মুক্তিৰ তাৰিখ অতি সোনকালে ঘোষণা কৰা হ’ব। এই বৰ্ষতে মুক্তি পাবলগীয়া এই ছিৰিজটো প্ৰাইম ভিডিঅ’ত ষ্ট্ৰীম কৰা হ’ব।

দিল্লী ক্ৰাইম ৩

অপৰাধ ভিত্তিক ৱেব ছিৰিজ ‘দিল্লী ক্ৰাইম ৩’ৰ দুটা ছিজন ইতিমধ্যে মুক্তি পাইছে আৰু এই দুয়োটা ছিজনেই দৰ্শকৰ দ্বাৰা সমাদৃত হৈছে। এতিয়া এই ৱেব ছিৰিজটোৰ তৃতীয় খণ্ডও এই বৰ্ষৰে মাজভাগত মুক্তি লাভ কৰিব। নেটফ্লিক্সত সম্প্ৰচাৰিত এই ৱেব ছিৰিজটোত পূৰ্বৰ দুবাৰৰ দৰেই শ্বেফালী শ্বাহক মুখ্য চৰিত্ৰত দেখা যাব।

মটকা কিং

এই সময়ৰ দৰ্শকৰ এগৰাকী প্ৰিয় অভিনেতা বিজয় ভাৰ্মাই অভিনয় কৰা ৱেব ছিৰিজ ‘মটকা কিং’ ও চলিত বৰ্ষতে দৰ্শকৰ মাজলৈ আহিব। প্ৰাইম ভিডিঅ’ত মুক্তি লাভ কৰিব এই ৱেব ছিৰিজটোৱে। বিজয়ৰ লগতে এই ছিৰিজত দেখা যাব কৃতিকা কামৰা, গুলচন গ্ৰ’ভাৰৰ দৰে অভিনেতা-অভিনেত্ৰীক।

ব্লেক ৱাৰেণ্ট

জাহান কাপুৰ আৰু ৰাহুল ভাট অভিনীত ৱেব ছিৰিজ ‘ব্লেক ৱাৰেণ্ট’ অহা ১০ জানুৱাৰীত নেটফ্লিক্সত মুক্তি পাব। ইতিমধ্যে ইয়াৰ ট্ৰেইলাৰ মুক্তি পাইছে আৰু এই ট্ৰেইলাৰটোৱে দৰ্শকক কিছু আকৰ্ষণ কৰা পৰিলক্ষিত হৈছে। এতিয়া দৰ্শকে এই ছিৰিজটোৰ মুক্তিৰ বাবে অপেক্ষা কৰি আছে।