হৃদৰোগত আক্ৰান্ত প্ৰখ্যাত অভিনেতা টিকু তালছানিয়াঃ সংকটজনক অৱস্থাত চিকিৎসাধীন

বলীউডৰ জনপ্ৰিয় অভিনেতা টিকু তালছানিয়া প্ৰতিগৰাকী চিনেপ্ৰেমীৰে এখন চিনাকি মুখ। বিশেষকৈ হাস্যৰসাত্মক চৰিত্ৰৰে দৰ্শকৰ মনত বাৰুকৈয়ে সাঁচ বহুৱাই ৰাখিছে প্ৰবীণ অভিনেতাগৰাকীয়ে। পিছে দৰ্শকৰ প্ৰিয় এই অভিনেতাগৰাকীৰ জীৱন এতিয়া সংকটাপন্ন হৈ পৰিছে। শাৰীৰিক অসুস্থতাৰ বাবে এতিয়া চিকিৎসালয়ৰ বিচনাত কঠিন যুঁজ দিছে টিকু তালছানিয়াই। প্ৰকাশিত খবৰ অনুসৰি আজি হৃদৰোগত আক্ৰান্ত হৈছে টিকু তালছানিয়াৰ। হাৰ্ট এটেকৰ বাবে অভিনেতাগৰাকীক চিকিৎসালয়ত ভৰ্তি কৰোৱা হৈছে।

জনপ্ৰিয় অভিনেতাগৰাকীৰ স্বাস্থ্যৰ অৱস্থা সম্প্ৰতি সংকটজনক বুলি জানিব পৰা গৈছে। এই খবৰ প্ৰকাশ পোৱাৰ পিছত এতিয় চিন্তিত হৈ পৰিছে অভিনেতাগৰাকীৰ গুণমুগ্ধ তথা অনুৰাগী। অৱশ্যে চিকিৎসালয়ত ভৰ্তি হোৱাৰ পিছৰে পৰা টিকু তালছানিয়াৰ স্বাস্থ্যৰ অৱস্থা সন্দৰ্ভত কোনো তথ্য পোহৰলৈ অহা নাই। তেওঁৰ হাৰ্ট এটেকৰ খবৰ প্ৰকাশৰ পিছত সকলোৱে অভিনেতা গৰাকীৰ আশু আৰোগ্যৰ বাবে প্ৰাৰ্থনা কৰিছে।

লগতে চিকিৎসালয়ৰ পৰা তেওঁৰ স্বাস্থ্যৰ অৱস্থা সন্দৰ্ভত নিশ্চিত তথ্যৰ বাবে অপেক্ষা কৰি আছে সকলোৱে। উল্লেখ্য যে নিজৰ বৰ্ণাঢ্য অভিনয় জীৱনত টিকু তালছানিয়াই ২৫০খনতকৈও অধিক ছবিত কাম কৰিছে। বলীউডৰ কিং খান খ্যাত শ্বাহৰুখ খানৰ পৰা আৰম্ভ কৰি মিষ্টাৰ পাৰ্ফেক্টনিষ্ট আমিৰ খান আৰু ভাইজান খ্যাত ছলমান খানলৈকে সকলোৰে সৈতে ছবিত কাম কৰিছে টিকু তালছানিয়াই।

প্ৰবীণ অভিনেতাগৰাকীয়ে ৯০ৰ দশকৰ পৰাই বলীউডত কাম কৰি আহিছে। ছবিজগতৰ লগতে টেলিভিছনতো নিজৰ অভিনয়েৰে দৰ্শকৰ প্ৰিয় হৈ পৰা টিকু তালছানিয়াই ছলমান খান আৰু আমিৰ খানৰ আন্দাজ আপনা আপনা, শ্বাহৰুখ খানৰ দেৱদাস, অক্ষয় কুমাৰৰ স্পেচিয়েল ২৬ আৰু জনপ্ৰিয় টিভি শ্ব’ উত্তৰণ আদি বহু জনপ্ৰিয় ছবি আৰু শ্ব’ত কাম কৰি আহিছে।

টিকু তালছানিয়াই ১৯৮৪ চনত টিভি শ্ব’ ‘য়েহ জো হ্যে জিন্দাগী’ৰ জৰিয়তে নিজৰ কেৰিয়াৰ আৰম্ভ কৰিছিল। দুবছৰৰ পাছত প্যাৰ কে দো পল, ডিউটি ​​আৰু আছলি নকলী আদি ছবিৰে বলীউডত প্ৰৱেশ কৰে। নিজৰ অভিনয়েৰে সকলোকে আপ্লুত কৰা অভিনেতাগৰাকীয়ে ‘বোল ৰাধা বোল’, ‘কুলি নম্বৰ ৱান’, ‘ৰাজা হিন্দুস্তানী’, ‘হিৰো নম্বৰ ৱান’ আৰু ‘বড়ে মিয়া ছোটে মিয়া’ আদি বিখ্যাত ছবিত কাম কৰিছিল।