‘কিং খান’লৈ কিয় ১০০ কোটি টকাৰ আইনী জাননী প্ৰেৰণ কৰিছিল মনোজ কুমাৰে!
মনোজ কুমাৰৰ মৃত্যুৰ খবৰে চিনে জগতক আজি স্বাভাৱিকতেই শোকাহত কৰি তুলিছে। পিছে চিৰসেউজ এই অভিনেতাগৰাকীয়ে এসময়ত বৰ্তমানৰ বলীউডৰ বাদশ্বাহ খ্যাত শ্বাহৰুখ খানৰ বিপক্ষে গ্ৰহণ কৰিছিল আইনী পন্থা। কিং খান শ্বাহৰুখৰ এক ভুলৰ বাবে খৰ্গহস্ত হৈ পৰিছিল মনোজ কুমাৰ আৰু শ্বাহৰুখ খানৰ বিৰুদ্ধে আইনী ব্যৱস্থা লোৱাৰ সিদ্ধান্ত লৈছিল।
ভাৰতীয় ছবি জগতৰ বাবে আজি এক দুখৰ দিন। ভাৰতীয় চিনেমা জগতৰ সোণালী যুগৰ তাৰকা জনপ্ৰিয় অভিনেতা মনোজ কুমাৰে আজি চিৰদিনৰ বাবে চকু মুদিলে। মনোজ কুমাৰৰ মৃত্যুৰ খবৰে চিনে জগতক আজি স্বাভাৱিকতেই শোকাহত কৰি তুলিছে। পিছে চিৰসেউজ এই অভিনেতাগৰাকীয়ে এসময়ত বৰ্তমানৰ বলীউডৰ বাদশ্বাহ খ্যাত শ্বাহৰুখ খানৰ বিপক্ষে গ্ৰহণ কৰিছিল আইনী পন্থা। কিং খান শ্বাহৰুখৰ এক ভুলৰ বাবে খৰ্গহস্ত হৈ পৰিছিল মনোজ কুমাৰ আৰু শ্বাহৰুখ খানৰ বিৰুদ্ধে আইনী ব্যৱস্থা লোৱাৰ সিদ্ধান্ত লৈছিল।
পিছে কিয় আৰু কেতিয়া উদ্ভৱ হৈছিল এনে পৰিস্থিতিৰ! চিনেমা জগতৰ খবৰৰ প্ৰতি আগ্ৰহীসকলৰ বাবে নিশ্চিতভাৱে এয়া এক উৎসুকতাপূৰ্ণ বিষয়। এই ঘটনাৰ সূত্ৰপাত হৈছিল ২০০৭ চনত। সেই বৰ্ষত বলীউডৰ জনপ্ৰিয় ছবি ‘ওম শান্তি ওম’- এ মুক্তি লাভ কৰিছিল। শ্বাহৰুখ খান অভিনীত ছবিখনৰ এক বিতৰ্কিত দৃশ্যক লৈ আপত্তি উত্থাপন কৰিছিল অভিনেতাগৰাকীয়ে।
ফাৰাহ খানৰ পৰিচালনাত নিৰ্মিত ছবিখনৰ এটা দৃশ্যত শ্বাহৰুখ খানক মনোজ কুমাৰৰ স্বাক্ষৰ ইংগিত অৰ্থাৎ তেওঁৰ বিখ্যাত ‘ফেচপাম’ (ইংগিত) অনুকৰণ কৰা দেখা গৈছে। এই দৃশ্যটো মনোজ কুমাৰে তেওঁৰ বাবে অপমানজনক যেন বোধ কৰে আৰু লগে লগে তেওঁ প্ৰযোজকসকলক দৃশ্যটো আঁতৰাই দিবলৈ অনুৰোধ জনায়। শ্বাহৰুখ খান আৰু ফাৰাহ খানে তেওঁৰ আপত্তি মানি লৈ ছবিখনৰ দৃশ্যটো আঁতৰাই দিয়ে।
এই দৃশ্যটোৰ বাবে আনকি শ্বাহৰুখে মনোজ কুমাৰৰ ওচৰত ব্যক্তিগতভাৱে ক্ষমাও বিচাৰিছিল। এক সাক্ষাৎকাৰত শ্বাহৰুখ খানে এই বিষয়ে সুঁৱৰি উল্লেখ কৰা মতে তেওঁ নিজে মনোজ কুমাৰলৈ ফোন কৰি ক্ষমা বিচাৰিছিল। শ্বাহৰুখৰ মতে, তেতিয়া মনোজ কুমাৰে ফোনতে এই লৈ কোনো সমস্যা নাই বুলি উল্লেখ কৰিছিল আৰু এইদৰে বিষয়টো সমাধান কৰা হৈছিল।
কিন্তু ২০১৩ চনত জাপানত ছবিখন পুনৰ মুক্তি পোৱাৰ লগে লগে বিতৰ্কিত দৃশ্যটো পুনৰ ছবিখনত অন্তৰ্ভুক্ত কৰা হয়। এই কথাই মনোজ কুমাৰক পুনৰ ক্ষুব্ধ কৰি তুলিলে। তাৰ পিছতে তেওঁ শ্বাহৰুখ খান আৰু ইৰ’ছ এণ্টাৰটেইনমেণ্টৰ বিৰুদ্ধে ১০০ কোটি টকা ক্ষতিপূৰণৰ দাবীত গোচৰ তৰে। অৱশ্যে পিছত মনোজ কুমাৰে আইনী যুঁজৰ পৰা আঁতৰি যোৱাৰ সিদ্ধান্ত লয়।
উল্লেখ্য যে বলীউডৰ একালৰ জনপ্ৰিয় অভিনেতাগৰাকীয়ে মুম্বাইৰ কোকিলাবেন ধীৰুভাই আম্বানী হাস্পতালত শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৮৭ বছৰ। বলীউডক কেইবাখনো উল্লেখযোগ্য ছবি উপহাৰ দিয়া মনোজ কুমাৰ ‘পূৰব ঔৰ পশ্চিম’, ‘ক্ৰান্তি’, ‘শ্বহীদ’ আদি দেশপ্ৰেমমূলক ছবিৰ বাবে পৰিচিত।
