Zubeen Garg: নিৰাশ দৰ্শক, হতাশ জুবিন অনুৰাগী! খানাপাৰাৰ ‘ৰঙালী’ত কিয় অনুষ্ঠান নকৰিলে জুবিন গাৰ্গে?

জুবিন মানেই যেন চৰ্চা! প্ৰায়ে সামাজিক মাধ্যমত ভাইৰেল হৈ পৰে জুবিনৰ মন্তব্য বা ফটো। নিজৰ মনৰ কথাখিনি ক’বলৈ কাকো ভয় নকৰে জুবিনে। এইবাৰ তিনিদিনীয়াকৈ খানাপাৰাত অনুষ্ঠিত হোৱা ‘ৰঙালী’ত অনুষ্ঠানত জুবিন গাৰ্গ অহাৰ কথা আছিল। ইয়াৰ বাবে নিশা প্ৰায় ৭ বজাৰ পৰা ১১ বজালৈ জুবিন অনুৰাগীয়ে জুবিন গাৰ্গে সংগীত পৰিৱেশন কৰিবলৈ নাহিল।

ইয়াৰ পিছতে অনুৰাগীয়ে প্ৰশ্ন কৰিছিল জুবিন আহিব নে নাহে! ইয়াৰ পিছতে সৃষ্টি হয় খানাপাৰাত ৰঙালী অনুষ্ঠানত অপ্ৰীতিকৰ পৰিস্থিতিৰ।জুবিন গাৰ্গৰ অনুষ্ঠান চাবলৈ অহা অনুৰাগীক দাঙি লৈ গ’ল বাউঞ্চাৰে। জুবিনৰ অনুষ্ঠান হ’ব নেকি বুলি সোধাত ক্ষুণ্ণ হৈ পৰে বাউঞ্চাৰ।

ইফালে খানাপাৰালৈ আহিছিল জুবিন গাৰ্গ, কিন্তু পৰিবেশন নকৰিলে গীত। ইয়াকে লৈ একাংশই সামাজিক মাধ্যমত জুবিন গাৰ্গক কটাক্ষ কৰি বিভিন্ন ধৰণৰ পোষ্ট শ্বেয়াৰ কৰি আছে। তাৰ মাজতে ৰঙালীৰ আয়োজক শ্যামকানু মহন্তই সামাজিক মাধ্যমত দিয়ে এটা পোষ্ট। তেওঁ লিখিছে- “ৰঙালীত জুবিন গাৰ্গ নহা বা বাউন্সাৰৰ অভদ্ৰামী সন্দৰ্ভত কিছু বাতৰি প্ৰকাশ হোৱা দৃষ্টিগোচৰ হৈছে। আমাৰ শুভাকাংক্ষী জুবিন গাৰ্গ প্ৰতি বছৰেই ৰঙালীলৈ আহে, তেখেতৰ দলটো বেকষ্টেজত সাজু হৈ আছিল, বহুদিন চিনেমা ছুটিং কৰি অতি ভাগৰুৱা জুবিন অলপ অসুস্থ অনুভৱ কৰাত তেওঁক অনুষ্ঠান পৰিৱেশনৰ পৰা বিৰত থকাটো উচিত বুলি সকলোৱেই ভাবিলে। জুবিন ৰঙালীলৈ আকৌ আহিব। জুবিনৰ অনুৰাগীসকল আশাৰে ৰৈ আছিল, স্বাভাৱিকতেই জুবিনৰ অনুষ্ঠান নহয় বুলি শুনি পৰিস্থিতি কিছু উত্তপ্ত হৈছিল। ক্ষোভ আৰু খঙত কেইজনমানে শিলগুটি দলিয়াবলৈ আৰম্ভ কৰিলে। চলি থকা ভিডিঅটোত আগৰ কথাখিনি প্ৰকাশ পোৱা নাই, বাউন্সাৰে গতিয়াই দিয়াটো ওলাইছে। গতিকে পৰিস্থিতি নিয়ন্ত্ৰণ কৰিবলৈ বাউন্সাৰ কিছু কঠোৰ হ’বলগীয়া হ’ল। ৰঙালীত বৃহৎ দৰ্শক আহে, তাৰে বহু উদণ্ড, নিয়ন্ত্ৰণ কৰাটো সহজ নহয়। নহলে প্ৰচণ্ড মাৰপিট হ’ব।
লগতে ৰাইজক বহু দিনৰ পৰা আমি কৈ আছো, ৰঙালী বিহু অনুষ্ঠান নহয়। ৰঙালীত থলুৱা মাছৰ পৰা গাখীৰ, হস্তশিল্প ইত‍্যাদিৰ বৃহৎ বিপনী আছে, ৰঙালী এখন থলুৱা সামগ্ৰীৰ বজাৰ। খাদ্যৰ বৃহৎ আয়োজন হৈছে। ৰঙালীলৈ বিভিন্ন ঠাইৰ পৰা বিভিন্ন জাতি-জনগোষ্ঠীৰ বৃহৎ দল আহিছে। সত্ৰীয়া-কথক, উত্তৰ পুবৰো বহু নৃত্য হৈছে। ৰঙালী মিউজিক ফেষ্টিভেলৰূপে সমগ্ৰ দেশতে বিখ‍্যাত। ৰঙালীত কেইবাখনো ষ্টেজ থাকে, লগতে হিপ হপ ষ্টেজ থাকে। য’ত উত্তৰ-পূবৰ হিপ হপ আৰ্টিষ্টে যোগদান কৰে আৰু হিপ হপ চাবলৈ বহু বহু ডেকা ল’ৰা-ছোৱালী আহে। হিপ হপ চাবলৈ অহা ল’ৰা-ছোৱালীক আমি সত্ৰীয়া বা জনগোষ্ঠীয় নৃত্য দেখুৱাও। দ্বিতীয়তে আনখন ষ্টেজত অসম তথা দেশৰ অন্যান্য শিল্পীসকলে পৰিৱেশন কৰে। আজি তৰালী শৰ্মা, অৰূপজ্যোতি বৰুৱা, নীল আকাশ আৰু শেষত ভাৰতৰ এজন টপ ৰেপাৰ ডিন’ জেমছে গান গাব। এই বৃহৎ লাইন আপ, আৰু বিশাল আয়োজন তথা প্ৰৱেশ বিনামূলীয়া বাবে বৃহৎ সংখ্যক মানুহ আহে। সেয়ে আমি বাউন্সাৰ ৰাখিবলৈ বাধ্য, লগতে তেওঁলোকক সংবেদনশীলতাৰে অপৰিস্থিত পৰিৱেশ নিয়ন্ত্ৰণ কৰিবলৈ আমাৰ দলটোৱে নিৰ্দেশ দিছে। কোনো অপ্ৰীতিকৰ পৰিস্থিতিৰ আমাৰ কাম‍্য নহয়, তাৰ বাবে মই দুখ প্ৰকাশ কৰিছো।”

ইফালে এই অনুষ্ঠানত আহি উভতি যোৱা জুবিন গাৰ্গৰ এটি ভিডিঅ’ সামাজিক মাধ্যমত যথেষ্ঠ ভাইৰেল হৈছে। খানাপাৰাৰ খেলপথাৰত সময়মতে উপস্থিতো হৈছিল শিল্পীগৰাকী । উপস্থিত হোৱাৰ পিছতে তেওঁৰ আচৰণ দেখি অনুৰাগীসকল হতাশ হৈ পৰিছে।

কিছুদিনৰ পৰা নতুন অসমীয়া চলচ্চিত্ৰ ‘ৰৈ ৰৈ বিনালে’ ৰ শ্বুটিঙত ব্যস্ত আছিল জুবিন গাৰ্গ। সামাজিক মাধ্যমত পত্নী গৰিমাই শ্বেয়াৰ কৰিছিল ফটো। প্ৰতি মুহূৰ্ততে জুবিন সুস্থ হৈ থকাৰ কামনা অসমীয়াৰ। এতিয়ালৈ ৰঙালীৰ এই সন্দৰ্ভত জুবিন গাৰ্গে কোনো মন্তব্য দিয়া নাই।