আত্মীয়ৰ তিলনিৰ বাবে নাছিল টকা! উপাৰ্জন কৰিবলৈ গৈ ঘৰলৈ উভতিল একেটা পৰিয়ালৰ ১১ টা মৃতদেহ…

এক ভয়ংকৰ অগ্নিকাণ্ডই প্ৰাণ কাঢ়িলে প্ৰায় ২১ জন লোকৰ, লগতে আহত হয় বহুতো। অবৈধ ফটকা ফেক্টৰীত অগ্নিসংযোগ হোৱাৰ ফলত এই কাণ্ড সংঘটিত হয় য’ত এটা পৰিয়ালৰে ১১ জন লোকে প্ৰাণ হেৰুয়ায়। এই ১১ জনলোকে পৰিয়ালৰ এজন সদস্যৰ তিলনিৰ বাবে টকা সংগ্ৰহ কৰিবলৈ গৈছিল আৰু তেতিয়াই মৃত্যুক সাৱতি লয়।  ১ এপ্ৰিলত গুজৰাটৰ বনাছকাণ্ডাস্থিত ফটকা ফেক্টৰীত এই কাণ্ড সংঘটিত হৈছে।

জানিব পৰা মতে, এই বিস্ফোৰণত মৃত্যু হোৱা ২১ জন লোকৰ ভিতৰত ১১ জন এটা পৰিয়ালৰ। তেওঁলোক মধ্যপ্ৰদেশ দেবাসৰ খাতেগাঁৱৰ তেহছীলৰ বাসিন্দা আছিল। মৃত লখনৰ সম্পৰ্তীয় ভগৱান নামৰ লোকজনে কয় যে প্ৰথমে আটাইকেইজন লোক মধ্য়প্ৰদেশৰ চন্দলপুৰত থাকি কাম কৰিছিল। ইয়াৰ মাজতে হোলীৰ সময়ত তেওঁলোকৰ পৰিয়ালৰ এজন ব্যক্তিৰ মৃত্যু হয়। মৃত্যুৰ পাছত ৰীতি-নীতিৰ বাবে তেওঁলোকৰ হাতত পইচা নাছিল যাৰ বাবে তেওঁলোক টকা বিচাৰি ফটকা ফেক্টৰীলৈ কাম কৰিব আহিছিল। কিন্তু নিষ্ঠুৰ নিয়তি, এই আটাইগৰাকীয়ে হেৰুৱালে প্ৰাণ।

তেওঁ কয় যে হৰডাৰ হাণ্ডিয়া নিবাসী গুড্ডি বাই তেওঁৰ আত্মীয়। ইতিমধ্যে তেওঁ সেই ফটকা বনোৱা কাৰখানাটোত কাম কৰি আছিল। প্ৰায় ডেৰ মাহ পূৰ্বে গুড্ডি বাইৰ সৈতে কন্যা ৰাধা আৰু আন এগৰাকী মহিলা তাত কাম কৰিব গৈছিল । হোলীত মহিলাগৰাকীয়ে ঘৰলৈ ঘূৰি গৈ আটাইকে নিজৰ উপাৰ্জনৰ কথা কৈছিল আৰু পাছত পৰিয়ালৰ আন সদস্যসকলো তেওঁৰ লগত কাম কৰিবলৈ ৰাজি হৈছিল।  জানিব পৰা মতে, ঘৰৰ এজন সদস্যৰ মৃত্যুৰ পাছত অনুষ্ঠিত কৰিবলগীয়া ৰীতি নীতিৰ বাবে তেওঁলোকৰ হাতত টকা নাছিল। যাৰ বাবে আটায়ে এই কাম কৰিব গৈছিল।

একেটা পৰিয়ালৰ ১১ জন সদস্যৰ মৃত্যুৰ খবৰ পাই বিধায়ক আশীষ শৰ্মা আৰু বিজেপি মণ্ডলৰ সভাপতি ললিত গুৰজাৰ মৃত পৰিয়ালটোৰ ঘৰত উপস্থিত হয়। তেওঁ কয় যে, এই সন্দৰ্ভত মুখ্যমন্ত্ৰী মোহন যাদৱৰ সৈতে আলোচনা কৰা হৈছে।  সাংসদ আৰু গুজৰাটৰ মুখ্যমন্ত্ৰীসকলৰ সৈতেও কথা পাতিছে প্ৰাক্তন মুখ্যমন্ত্ৰী শিৱৰাজ সিং চৌহানে। ইতিমধ্যে এই আটাইকেইটা মৃতদেহ চন্দলপুৰলৈ অনা হৈছে। ইয়াৰ বিপৰীতে মৃত পৰিয়ালটোক গুজৰাট চৰকাৰৰ পৰা ৪ লাখ আৰু মধ্যপ্ৰদেশ চৰকাৰৰ পৰা ২ লাখ টকাৰ আৰ্থিক সাহায্য প্ৰদান কৰা হৈছে। ইয়াৰ উপৰিও মৃতদেহ দাহ কৰাৰ বাবে গ্ৰাম পঞ্চায়তলৈও ৫০ হাজাৰ টকা প্ৰেৰণ কৰা হৈছে।