বাৰ্ড ফ্লুৱে প্ৰাণ ল’লে ২ বছৰীয়া শিশুৰঃ কুকুৰাৰ মঙহৰ লোভে মাতিব নেকি বিপদ! কি কৈছে বিশেষজ্ঞই?

বিগত কিছুবছৰত বাৰ্ড ফ্লু ৰোগে সৃষ্টি কৰিছে আতংকৰ। শেহতীয়াকৈ এই ৰোগত আক্ৰান্ত হোৱাৰ ফলত অন্ধ্ৰ প্ৰদেশত এগৰাকী ২ বছৰীয়া শিশুৱে প্ৰাণ হেৰুৱাইছে। দেশত এই ৰোগৰ ফলত মানুহৰ মৃত্যুৰ এয়া দ্বিতীয়টো ঘটনা। ইয়াৰ পূৰ্বে ২০২১ চনত বাৰ্ড ফ্লুৰ ফলত এজন লোকৰ মৃত্যু হৈছিল। শিশুটিৰ মৃত্যুৰ পিছতে স্বাস্থ্য বিভাগে প্ৰকাশ কৰিছে প্ৰতিক্ৰিয়া। শিশুটিয়ে ভালকৈ নিসিজা কুকুৰাৰ মঙহ খোৱাৰ বাবেই বাৰ্ড ফ্লুত আক্ৰান্ত হয় আৰু তাৰ পিছত এইদৰে মৃত্যু হোৱা বুলি স্বাস্থ্য বিভাগে উল্লেখ কৰিছে।

প্ৰকাশিত খবৰ অনুসৰি, মৃত্যুৰ পূৰ্বে শিশুটিৰ কিছুদিন ধৰি সামান্য জ্বৰ হৈছিল। ইয়াৰ পিছতে তেওঁক চিকিৎসালয়ত ভৰ্তি কৰোৱা হয়। কিন্তু চিকিৎসকৰ আপ্ৰাণ চেষ্টাৰ পিছতো তেওঁৰ স্বাস্থ্যৰ কোনো উন্নতি দেখা নগ’ল আৰু মৃত্যু ঘটে। বাৰ্ড ফ্লুৰ বাবে এই শিশুটিৰ মৃত্যু হোৱা বুলি নিশ্চিত কৰিছে পুনেৰ নেশ্যনেল ইনষ্টিটিউট অৱ ভাইৰ’লজীৰ বিজ্ঞানীসকলে। লক্ষণীয়ভাৱে এই ভাইৰাছে পৰিয়ালটোৰ আন কোনো সদস্যক সংক্ৰমিত কৰা নাই।

এই ঘটনাৰ পিছতে ৰাজ্য চৰকাৰে জনসাধাৰণক সতৰ্ক কৰি দিছে আৰু সাৱধানতা অৱলম্বন কৰিবলৈ পৰামৰ্শ দিছে। ইফালে চৰকাৰৰ এনে পৰামৰ্শৰ পিছত সাধাৰণ লোকৰ মাজত কুকুৰা মঙহ খোৱা উচিত নে অনুচিত, সেই সন্দৰ্ভত প্ৰশ্ন উত্থাপন হৈছে। ৰাজস্থানৰ পশু বিজ্ঞান বিভাগৰ চিকিৎসকৰ ডাঃ এন আৰ ৰাৱাটে এই সন্দৰ্ভত কয় যে বাৰ্ড ফ্লু হৈছে ভাইৰাছৰ সংক্ৰমণ। ই চৰাইৰ ক্ষেত্ৰত, প্ৰধানকৈ কুকুৰাত পোৱা যায়।

কিন্তু এই ভাইৰাছ আন জীৱ-জন্তু আৰু মানুহলৈও বিয়পিব পাৰে বুলি তেওঁ জানিবলৈ দিয়ে। যোৱা কেইবছৰমানৰ পৰা গৰু-মেকুৰীকে ধৰি আন বহু জীৱ-জন্তুও এই ভাইৰাছৰ বলি হৈছে আৰু মানুহৰ ক্ষেত্ৰতো এই ভাইৰাছত আক্ৰান্ত ৰোগী বৃদ্ধি পাইছে। ভাইৰাছত ঘটি থকা পৰিৱৰ্তনৰ বাবেই এনে হৈছে বুলি বিশেষজ্ঞসকলে ধাৰণা কৰিছে। ডাঃ ৰাৱাটে বাৰ্ড ফ্লুৰ সংক্ৰমণ আক্ৰান্ত চৰাই বা জীৱ-জন্তুৰ পৰা মানুহলৈ বিয়পে বুলি দোহাৰে।

কিন্তু এজন ব্যক্তিৰ পৰা আন এজন ব্যক্তিলৈ এই ভাইৰাছৰ সংক্ৰমণ বিৰল বুলিও তেওঁ লগতে কয়। কিন্তু কোনো ব্যক্তি যদি কোনো সংক্ৰমিত প্ৰাণী বা চৰাইৰ সংস্পৰ্শলৈ আহে তেতিয়া তেওঁৰ দেহত ভাইৰাছৰ প্ৰৱেশৰ আশংকা যথেষ্ট বৃদ্ধি পায়। এই ভাইৰাছ কুকুৰাৰ জৰিয়তেও সংক্ৰমিত হ’ব পাৰে। ডাঃ ৰাৱাটে উল্লেখ কৰা মতে, কুকুৰা মঙহ খালে বাৰ্ড ফ্লু হোৱাৰ আশংকা থাকে, কিন্তু কুকুৰাটো ভালদৰে সিজোৱা নহ’লে বা কুকুৰাটোত বাৰ্ড ফ্লু ভাইৰাছ থাকিলেহে এনে হয়।

যদি কুকুৰা ভালকৈ ৰান্ধি খোৱা হয়, তেতিয়া ভাইৰাছ সংক্ৰমণৰ কোনো আশংকা নাথাকে বুলি চিকিৎসকগৰাকীয়ে স্পষ্ট কৰি দিয়ে। কিন্তু যি অঞ্চলত এই ভাইৰাছ বিয়পা অঞ্চলৰ লোকসকলে কিছু দিনৰ বাবে কুকুৰা খোৱাৰ পৰা বিৰত থকা উচিত বুলি তেওঁ লগতে কয়। জ্বৰ, কাহ, উশাহ লোৱাত অসুবিধা, পেটৰ বিষ আদি বাৰ্ড ফ্লুৰ লক্ষণ হ’ব পাৰে। গতিকে এনে লক্ষণে দেখা দিলে চিকিৎসকৰ কাষ চপাই শ্ৰেয়।