Rafale Marine Jet: আহি আছে ২৬খন ৰাফেল যুদ্ধ বিমান! এইবাৰ ভাৰতে শক্তি দেখুৱাব চীন আৰু পাকিস্তানক!
Rafale Marine Jet: ভাৰতে কিয় হঠাতে ইমান টকা খৰচ কৰি ২৬খন যুদ্ধ বিমান ক্ৰয় কৰিছে? এই সকলোবোৰ বিমান কেতিয়া লাভ কৰিব? এই বিমানখনৰ পৰা কি লাভ হ’ব জানেনে?
আহি আছে ২৬খন ৰাফেল যুদ্ধ বিমান!
প্ৰতিৰক্ষা বিভাগক শক্তিশালী কৰাত ব্যস্ত মোদী চৰকাৰ। সেই প্ৰকল্পৰ অধীনত ভাৰতে ভাৰতীয় নৌসেনাৰ শক্তি বৃদ্ধিৰ বাবে ২৬ খন ৰাফেল-এম যুদ্ধ বিমান ক্ৰয় কৰিছে। যাৰ বাবে ব্যয় হৈছে প্ৰায় ৬৪ হাজাৰ কোটি টকা। এই চুক্তিত বিমানখনৰ ৰক্ষণাবেক্ষণ, প্ৰশিক্ষণ আৰু প্ৰযুক্তি হস্তান্তৰ অন্তৰ্ভুক্ত কৰা হৈছে, যিয়ে দেশৰ প্ৰতিৰক্ষা উদ্যোগৰ উন্নয়নত সহায় কৰিব। এই যুদ্ধ বিমানকেইখনে দেশৰ সামৰিক শক্তিক এক নতুন স্তৰলৈ লৈ যাব। কিন্তু আপুনি জানেনে, ভাৰতে কিয় হঠাৎ ইমান টকা খৰচ কৰি ২৬ খন যুদ্ধ বিমান ক্ৰয় কৰিছে?
এই বিশেষ ৰাফেল এম যুঁজাৰু বিমানখন বিমানবাহী জাহাজত ব্যৱহাৰৰ বাবে ডিজাইন কৰা হৈছে। ইয়াত শক্তিশালী লেণ্ডিং গিয়াৰ, এৰেষ্টাৰ হুক, আৰু এটা উন্নত চেন্সৰ চিষ্টেম আছে। যিটো সাগৰৰ বুকুৰ পৰা অপাৰেচনৰ বাবে উপযোগী। এই বিমানসমূহে মিটিঅ’(Meteor)ৰ আৰু এক্স’চেট (Exocet) মিছাইলকে ধৰি বিভিন্ন আধুনিক অস্ত্ৰ-শস্ত্ৰও কঢ়িয়াই নিবলৈ সক্ষম।
এই চুক্তিৰ জৰিয়তে ভাৰতীয় নৌসেনাই নিজৰ বিমানবাহী জাহাজ আই এন এছ বিক্ৰান্ত আৰু আই এন এছ বিক্ৰমাদিত্যৰ (INS Vikramaditya) সামৰ্থও কেইবাগুণো বৃদ্ধি কৰিব। প্ৰতিৰক্ষা বিশেষজ্ঞসকলে দাবী কৰিছে যে, বৰ্তমান ব্যৱহৃত MiG-29K বিমানতকৈ ৰাফেল এম বিমান প্ৰযুক্তিগতভাৱে অধিক উন্নত।
এই ২৬খন বিমানে ভাৰত মহাসাগৰ অঞ্চলত দেশৰ সবল সামৰিক উপস্থিতি নিশ্চিত কৰাৰ ক্ষেত্ৰত বিশেষ ভূমিকা গ্ৰহণ কৰিব। চীন আৰু পাকিস্তানৰ দৰে চুবুৰীয়া দেশৰ সামৰিক কাৰ্যকলাপ বৃদ্ধিৰ প্ৰেক্ষাপটত এই শক্তিশালীকৰণ বিশেষভাৱে গুৰুত্বপূৰ্ণ।
বিমানখনত কি কি বৈশিষ্ট্য আছে?
ৰাফেল যুঁজাৰু বিমানখনে নৌসেনাৰ যুদ্ধ ক্ষমতাক আধুনিকীকৰণ আৰু শক্তিশালী কৰিব, য’ত আছে:
- শত্ৰুৰ লক্ষ্যত সঠিকভাৱে আঘাত কৰাৰ ক্ষমতা।
- পাৰমাণৱিক ভাবুকিৰ বিৰুদ্ধে প্ৰতিৰোধ গঢ়ি তোলাৰ ক্ষমতা ভাৰতৰ পাৰমাণৱিক ত্ৰিভুজৰ এক গুৰুত্বপূৰ্ণ সংযোজন।
- ৰাফেল যুঁজাৰু বিমান অন্তৰ্ভুক্ত কৰিলে নৌসেনাৰ শক্তি প্ৰক্ষেপ কৰাৰ ক্ষমতাত এক বৃহৎ পৰিৱৰ্তন ঘটিব। যিটো জটিল পৰিস্থিতিত বিশেষভাৱে গুৰুত্বপূৰ্ণ।
- ৰাফেল যুদ্ধ বিমানে ভাৰতক কৌশলগত সুবিধা প্ৰদান কৰিব, ইয়াৰ দ্বাৰা ভাৰতৰ আঞ্চলিক স্বাৰ্থ ৰক্ষা আৰু নিৰাপত্তাজনিত প্ৰত্যাহ্বানসমূহ মোকাবিলা কৰাত সহায় হ’ব।
- ৰাফেল যুদ্ধ বিমানে ৭৮০-১৮৫০ কিলোমিটাৰ দূৰত্বৰ পাৰমাণৱিক ক্ষমতাসম্পন্ন অস্ত্ৰ কঢ়িয়াই নিব আৰু নিক্ষেপ কৰিব পাৰে।
এই চুক্তিৰ জৰিয়তে ভাৰতীয় নৌসেনা আধুনিক প্ৰযুক্তি আৰু অস্ত্ৰ-শস্ত্ৰৰে সজ্জিত এক শক্তিশালী শক্তি হিচাপে আত্মপ্ৰকাশ কৰিব, যিয়ে দেশৰ নিৰাপত্তা আৰু সাৰ্বভৌমত্ব ৰক্ষাৰ ক্ষেত্ৰত গুৰুত্বপূৰ্ণ ভূমিকা পালন কৰিব।