Maha Kumbh 2025: ইটোৰ পিছত সিটো প্ৰশ্ন; ধৈৰ্যৰ বান্ধ ছিঙাত চিমটা দাঙি ইউটিউবাৰক প্ৰহাৰ এজন সাধুৰ

মহাকুম্ভ মেলাত ইউটিউবাৰক প্ৰহাৰ সাধুৰ

উত্তৰ প্ৰদেশৰ প্ৰয়াগৰাজত চলি আছে মহাকুম্ভ মেলা । এই কুম্ভমেলাত গৈ বিভিন্নজনে স্নান কৰিছে, বিভিন্নজনে সাধুসকলৰ পৰা আশীৰ্বাদ লৈছে । দেশৰ ভিন্ন ঠাইৰ পৰা সাংবাদিকৰ লগতে ইউটিউবাৰো গৈছে কুম্ভমেলা ৰাইজক দেখুৱাবলৈ । পিছে কুম্ভমেলাত গৈ এজন ইউটিউবাৰে খালে পিটন । কিন্তু কিয় পিটন খালে এই ইউটিউবাৰজনে ? তেওঁনো কোন ? সবিশেষ জানিবলৈ পঢ়ক এই প্ৰতিবেদন ।

কুম্ভমেলালৈ অহা সাধু-সন্তসকলক বিভিন্নজন সাংবাদিক আৰু ইউটিউবাৰে কৰিছে বিভিন্ন প্ৰশ্ন । কিয় সন্যাসীৰ জীৱন ল’লে, কেনেকৈ চলে এজন সন্যাসী বা সাধুৰ জীৱন ইত্যাদি অনেক প্ৰশ্ন । বিদেশৰ পৰা অহা সন্তসকলকো বিভিন্নজনে বিভিন্ন ধৰণে প্ৰশ্ন কৰি জানিবলৈ বিচাৰিছে তেওঁলোকৰ বিষয়ে । তাৰ মাজতেই এজন সাধুৰ পৰা মাৰ খালে এজন ইউটিউবাৰে ।

সাধুবাবাৰ চিমটাৰ কোব খাই সেই ঠাইৰ পৰা পলাই পত্ৰং দিলে ইউটিউবাৰজন । এটাৰ পিচত আন এটা প্ৰশ্ন কৰি থকা ইউটিবাৰজনৰ প্ৰতি এটা সময়ত বিৰক্ত হৈ পৰিছিল সাধুবাবাজন । সেয়ে হাতত থকা চিমটাডালেৰে কোবাবলৈ ধৰে ইউটিউবাৰজনক ।

বাৰ বছৰৰ পাচত এইবাৰ যিহেতু মহাকুম্ভৰ আয়োজন কৰা হৈছে, গতিকে নিৰাপত্তাৰ দিশটো যথেষ্ট কটকটীয়া কৰি তোলা হৈছে। এ আইৰ দ্বাৰা পৰিচালিত চিচি কেমেৰা, ড্ৰোণ, ডিজিটেল কেমেৰা সকলোবোৰ সংস্থাপন কৰা হৈছে ঠায়ে ঠায়ে । কুম্ভমেলাত যেন পৰিছে ডিজিটেল প্ৰক্ৰিয়াৰ ছাঁয়া । এই কুম্ভমেলা চাবলৈয়ে দেশৰ ভিন্ন ঠাইৰ পৰা সাধাৰণ ভক্তৰ লগতে ইউটিউবাৰ, ছচিয়েল মিডিয়া ইনফ্লুৱেনচাৰসকলো আহিছে । আজিৰ পৰা প্ৰায় ১০০ বছৰ আগতে কুম্ভমেলাই এনে ৰূপ পাব বুলি হয়তো কোনেও কল্পনাই কৰিব পৰা নাছিল । ১০০ বছৰ দূৰৰে কথা প্ৰায় ১০ বছৰ আগতেও কিজানি কোনেও ভবা নাছিল কুম্ভমেলা আজিৰ পৰ্যায় পাবহি বুলি ।

মহাকুম্ভ উপলক্ষে ত্ৰিবেণী সংগম ইতিমধ্যে সাধু-সন্যাসী, অঘৰী আদিৰে ভৰি পৰিছে । তেওঁলোকৰ বেশ-ভূষা, জীৱন প্ৰণালী আদি দেখি সাধাৰণ মানুহৰ চকু কপালত উঠাটো স্বাভাৱিক । সেয়ে, তেওঁলোকৰ বিষয়ে জানিবলৈ সকলো যেন উবুৰি খাই পৰিছে শিবিৰবোৰত । সাধুসকলৰ জীৱন সন্দৰ্ভত তথ্য সংগ্ৰহৰ আশাৰে সকলো ঢাপলি মেলিছে ।

এনেকৈ সাধুৰ জীৱনৰ বিষয়ে জানিবলৈকে তেওঁলোকৰ কাষ চাপিছিল এজন ইউটিউবাৰ । কিন্তু প্ৰশ্ন সুধিবলৈ গৈ বিপদতহে পৰিল তেওঁ । এটা ভাইৰেল ভিডিঅ’ত দেখা গৈছে এজন সাধুক ইটোৰ পিচত সিটো প্ৰশ্ন কৰিছে এজন ইউটিউবাৰে । কিন্তু অলপ সময়ৰ পাচত প্ৰশ্নত বিৰক্ত হৈ পৰে সাধুবাবাজন । তাৰ পাছতেই তেওঁ ইউটিউবাৰজনক মাৰ সোধাই সাধুজনে । সাধুবাবাৰ চিমটাৰ কোব খাই কোনোমতে সেই স্থানৰ পৰা আঁতৰি প্ৰাণ বচাবলৈ সক্ষম হয় ইউটিউবাৰজন । (এই ভাইৰেল ভিডিঅ’ৰ সত্যাসত্য টিভি৯ অসমে নিৰূপণ কৰা নাই ।)

ভিডিঅ’টোত শুনা মতে, ইউটিউবাৰজনে সাধুবাবাক কৰিছিল এক অদ্ভুত প্ৰশ্ন । তেওঁ বাবাজনক সুধিছিল, “আপুনি কোনজন ভগৱানক আৰাধনা কৰে ?” এই প্ৰশ্ন শুনি খঙত অগ্নিশৰ্মা হৈ পৰে সাধুবাবাজন । তাৰ পাচতেই তেওঁ হাতত থকা চিমটাৰে প্ৰহাৰ কৰে ইউটিউবাৰজনক ।