পুৱা ভাগতে কাছাৰত সৰবৰাহকাৰীৰ সহ ২০ কোটি টকাৰ ড্ৰাগছ জব্দ…
দেওবাৰে পুৱা ভাগতে অবৈধ ড্ৰাগছ সৰবৰাহৰ বিৰুদ্ধে চলোৱা এক অভিযানত প্ৰায় ২০ কোটি টকাৰ ড্ৰাগছ জব্দ কৰে কাছাৰ আৰক্ষীয়ে । সূত্ৰৰ খবৰ অনুসৰি, গোপন সূত্ৰৰ তথ্য ভিত্তিত চলোৱা হৈছিল এই অভিযান ।
প্ৰতীকী ফটো
বৰদিনৰ পূৰ্বেই ডাঙৰ সফলতা লাভ কৰিবলৈ সক্ষম হৈছে কাছাৰ আৰক্ষীয়ে । দেওবাৰে পুৱা ভাগতে অবৈধ ড্ৰাগছ সৰবৰাহৰ বিৰুদ্ধে চলোৱা এক অভিযানত প্ৰায় ২০ কোটি টকাৰ ড্ৰাগছ জব্দ কৰে আৰক্ষীয়ে । সূত্ৰৰ খবৰ অনুসৰি, গোপন সূত্ৰৰ তথ্য ভিত্তিত চলোৱা হৈছিল এই অভিযান । ইফালে এই অভিযান ড্ৰাগছ সৰবৰাহৰ সৈতে জড়িত থকা অপৰাধত এজন লোককো আটক কৰিছে আৰক্ষীয়ে ।
সূত্ৰ খবৰ অনুসৰি, এক গোপন সূত্ৰৰ তথ্য ভিত্তিত বিশেষ টাস্ক ফ’ৰ্চে (এছ টি এফ) এক অভিযান আৰম্ভ কৰে । আই জি পি পাৰ্থসাৰথি মহন্তৰ তত্বাৱধানত দেওবাৰে পুৱা ছিলকুৰি ৰোডত চলোৱা হৈছিল এই অভিযান । এই অভিযান কালতে মটৰ চাইকেলেৰে আহি থকা এজন ব্যক্তিৰ পৰা আৰক্ষীয়ে ইয়াবা টেবলেট আৰু হেৰ’ইন জব্দ কৰে বুলি জানিব পৰা গৈছে ।
পিটিআইৰ প্ৰতিবেদন অনুসৰি, এই ড্ৰাগছ বিৰোধী অভিযানত ৬০ হাজাৰ ইয়াবা টেবলেট আৰু ১২৫ গ্ৰাম হেৰ’ইন জব্দ কৰা হয় বুলি আৰক্ষীৰ বিষয়া গৰাকীয়ে জানিবলৈ দিছে । ইয়াৰ লগতে আৰক্ষীয়ে চাহিল আহমেদ লস্কৰ নামৰ এজন ব্যক্তিক আটক কৰে আৰু তেওঁ চলাই অহা মটৰ চাইকেলখন জব্দ কৰে আৰক্ষীয়ে । জব্দ কৰা নিচাজাতীয় সামগ্ৰীৰ মূল্য প্ৰায় ২০ কোটি টকা বুলি জানিব পৰা গৈছে।
উল্লেখ্য যে, অসম আৰক্ষীয়ে ৰাজ্যখনত অবৈধ ড্ৰাগছ সৰবৰাহ ৰোধ কৰাৰ বাবে অবিৰতভাৱে প্ৰচেষ্টা অব্যাহত ৰাখিছে । বিশেষকৈ এই উৎসৱৰ বতৰ যাতে ৰাজ্যখনত নিষিদ্ধ নিচাজাতীয় সামগ্ৰী সৰবৰাহ নহয় তাৰ প্ৰতি অধিক নজৰ ৰাখিছে অসম আৰক্ষীয়ে ।
ইয়াৰ অংশ হিচাপে যোৱা ১২ ডিচেম্বৰতো শ্ৰীভূমি জিলাৰ আৰক্ষীয়ে অভিযান চলাই এখন গাড়ীৰ এটা গোপন চেম্বাৰৰ পৰা ৫০ হাজাৰ ইয়াবা টেবলেট জব্দ কৰাৰ লগতে পাঁচজন ব্যক্তিক আটক কৰিবলৈ সক্ষম হৈছিল । প্ৰকাশিত খবৰ অনুসৰি, গোপন সূত্ৰ তথ্য ভিত্তিত চলোৱা হৈছিল এই অভিযান ।