‘ষ্ট্ৰীট মিল্ক’ বুলি বিদেশী পৰ্যটকে খালে ভাং! তাৰ পাছত ভৰ্তি হ’ল চিকিৎসালয়ত, চাওক ভিডিঅ’

ভাং খাই চিকিৎসালয়ত উপস্থিত হ'ল বিদেশী পৰ্যটক!

ভাৰতীয় সংস্কৃতি আৰু ইয়াৰ খাদ্যত ইমান আকৰ্ষণ আছে যে সমগ্ৰ বিশ্বৰ বিভিন্ন প্ৰান্তৰ লোকসকল ভাৰতলৈ আহে। বহুতো বিদেশী পৰ্যটকই আমাৰ সংস্কৃতি আৰু খাদ্য গ্ৰহণ কৰি ইয়াত বসতি স্থাপন কৰাৰ সিদ্ধান্ত লৈছে। অৱশ্যে ইয়াক গ্ৰহণ কৰাটো সকলোৰে বাবে সহজ নহয়। শেহতীয়াকৈ এজন বিখ্যাত ব্ৰিটিছ ছ’চিয়েল মিডিয়া ইনফ্লুয়েন্সাৰ চেম পেপাৰে ভাৰতত এক বিচিত্ৰ অভিজ্ঞতাৰ সাক্ষী হৈছিল। যাৰ বাবে তেওঁ আতংকিত হৈ পৰিছিল। দৰাচলতে ‘ইণ্ডিয়ান ষ্ট্ৰীট মিল্ক’ খোৱাৰ পাছত তেওঁৰ বদহজম হৈছিল আৰু তেওঁক চিকিৎসালয়ত ভৰ্তি কৰিব লগা হৈছিল।

ইনফ্লুয়েন্সাৰ চেম পেপাৰৰ সৈতে হোৱা ঘটনাই দেখুৱাই যে যিকোনো নতুন অভিজ্ঞতা গ্ৰহণ কৰাৰ আগতে এই সন্দৰ্ভত সম্পূৰ্ণভাৱে অৱগত আৰু বুজি পোৱা প্ৰয়োজন। চেমে ‘ইণ্ডিয়ান ষ্ট্ৰীট মিল্ক’ বুলি ভুলকৈ ভাবি যি খাইছিল সেয়া প্ৰকৃততে ভাং আছিল। তাৰ পাছত তেওঁৰ বিষক্ৰিয়া হৈছিল আৰু চিকিৎসালয়ত ভৰ্তি হ’ব লগা হৈছিল। চেমে তেতিয়া তেওঁৰ ভাৰতৰ পৰৱৰ্তী ভ্ৰমণ বাতিল কৰিছিল।

চেমে ইনষ্টা হেণ্ডেল @sampepperত এটা ভিডিঅ’ শ্বেয়াৰ কৰিছে। য’ত তেওঁ বৃদ্ধ দোকানী এজনে বনোৱা ভাং উপভোগ কৰা দেখা গৈছে। কিন্তু পিছমুহূৰ্তত তেওঁৰ স্বাস্থ্যৰ অৱনতি হ’বলৈ আৰম্ভ কৰে আৰু তেওঁক চিকিৎসালয়ত ভৰ্তি কৰিব লগা হয়।

ব্ৰিটিছ ইনফ্লুয়েন্সাৰ চেমে এক্স হেণ্ডেলৰ পৰা আন এটা ভিডিঅ’ শ্বেয়াৰ কৰিছে। য’ত তেওঁক চিকিৎসালয়ৰ বিচনাত থকা দেখা গৈছে। য’ত তেওঁ কান্দি কান্দি অভিযোগ উত্থাপন কৰে যে চিকিৎসালয়ৰ কৰ্মচাৰীসকলে তেওঁৰ আইভি ড্ৰিপ ভাল্ভ খুলি ৰাখিছিল, যাৰ ফলত তেওঁৰ সমস্যা বৃদ্ধি হৈছিল। ভিডিঅ’টোত, চেমক নাৰ্চসকলৰ ওপৰত ক্ষুব্ধ হৈ থকা দেখা গৈছে আনহাতে নাৰ্চবোৰে নীৰৱে থিয় হৈ সকলোবোৰ শুনি আছে।

বহুতো সামাজিক মাধ্যম ব্যৱহাৰকাৰীয়ে বিদেশী পৰ্যটকৰ সৈতে হোৱা এই ঘটনা সম্পৰ্কে তেওঁলোকৰ প্ৰতিক্ৰিয়া ব্যক্ত কৰিছে। কিছুমানে তেওঁৰ প্ৰতি সহানুভূতি প্ৰকাশ কৰিছে। আনহাতে বহুতে তেওঁক উপহাস কৰিছে। এজন ব্যৱহাৰকাৰীয়ে লিখিছিল, “এই লোকসকল এনে ঠাইলৈ যায় য’ত আনকি ভাৰতীয়সকলেও নাযায়। আৰু তেওঁলোকে অপৰিচ্ছন্নতাক লৈ কান্দে। আন এজন ব্যৱহাৰকাৰীয়ে কমেণ্টত লিখিছে, “আপোনাৰ ভিডিঅ’ৰ শিৰোনাম সলনি কৰক। এয়া ভাং, গাখীৰ নহয়। সকলোৱে ইয়াক হজম কৰিব নোৱাৰে।”  আন এজন ব্যৱহাৰকাৰীয়ে কয়, “প্ৰদৰ্শনৰ বাবে সস্তীয়া ঠাইলৈ যোৱা বন্ধ কৰক, আপোনাৰ কোনো সমস্যা নহ’ব।”