PM Modi : ‘বাজেটে অহা ৫ বছৰৰ বাবে ৰোডমেপ নিৰ্ধাৰণ কৰিব’, বাজেটৰ পূৰ্বে আৰু কি ক’লে প্ৰধানমন্ত্ৰী মোদীয়ে ?
Budget Session 2024: ২৩ জুলাইত সংসদত কেন্দ্ৰীয় বিত্ত মন্ত্ৰী নিৰ্মলা সীতাৰমনে দাখিল কৰিব কেন্দ্ৰীয় বাজেট । ইয়াৰ পূৰ্বে আজি সোমবাৰে দেশবাসীক সম্বোধন কৰে দেশৰ প্ৰধানমন্ত্ৰী নৰেন্দ্ৰ মোদীয়ে । সংসদৰ বাহিৰত সাংসদ আৰু দেশবাসীক সম্বোধন কৰি প্ৰধানমন্ত্ৰী মোদীয়ে কয়, 'দেশবাসীয়ে আমাক দেশৰ সেৱাৰ বাবে নিৰ্বাচিত কৰিছে, দলৰ সেৱাৰ বাবে নহয় । এই সংসদ দলৰ বাবে নহয়, দেশৰ বাবেহে । গতিকে সকলো সাংসদে নিজৰ দায়িত্ব পালন কৰিব লাগে।'
প্ৰধানমন্ত্ৰী নৰেন্দ্ৰ মোদী
আজিৰে পৰা আৰম্ভ হৈছে সংসদৰ বৰ্ষাকালীন অধিৱেশন । কাইলৈ অৰ্থাৎ ২৩ জুলাইত সংসদত কেন্দ্ৰীয় বিত্ত মন্ত্ৰী নিৰ্মলা সীতাৰমনে দাখিল কৰিব কেন্দ্ৰীয় বাজেট । ইয়াৰ পূৰ্বে আজি সোমবাৰে দেশবাসীক সম্বোধন কৰে দেশৰ প্ৰধানমন্ত্ৰী নৰেন্দ্ৰ মোদীয়ে । সংসদৰ বাহিৰত সাংসদ আৰু দেশবাসীক সম্বোধন কৰি প্ৰধানমন্ত্ৰী মোদীয়ে কয়, ‘দেশবাসীয়ে আমাক দেশৰ সেৱাৰ বাবে নিৰ্বাচিত কৰিছে, দলৰ সেৱাৰ বাবে নহয় । এই সংসদ দলৰ বাবে নহয়, দেশৰ বাবেহে । গতিকে সকলো সাংসদে নিজৰ দায়িত্ব পালন কৰিব লাগে।’
ইয়াৰ লগতে বিৰোধীৰ মতামত বেয়া নহয় বুলিও কয় প্ৰধানমন্ত্ৰী মোদীয়ে । প্ৰধানমন্ত্ৰী মোদীয়ে কয়, ‘বিৰোধী মতামত বেয়া নহয়। প্ৰগতিৰ ন্যায়িক ব্যৱস্থাক আমি আগবঢ়াই নিব লাগিব। আশাকৰোঁ এই গণতন্ত্ৰৰ মন্দিৰটো ৰাইজৰ আশা পূৰণৰ বাবে আমি ব্যৱহাৰ কৰিম।’ ইয়াৰ সমান্তৰালভাৱে তেওঁ কয়, ‘যিসকল সংসদলৈ নতুনকৈ সাংসদ হিচাপে নিৰ্বাচিত হৈছে, তেওঁলোকক সংসদত সুযোগ দিয়ক ।’
ইফালে, প্ৰধানমন্ত্ৰী মোদীয়ে কয়, প্ৰথম অধিৱেশনত চৰকাৰে পৰিচালনাৰ দায়িত্ব অৰ্পণ কৰা ১৪ কোটি লোকৰ কণ্ঠ দমনৰ প্ৰয়াস কৰা হৈছিল। ডেৰ ঘণ্টা ধৰি দেশৰ প্ৰধানমন্ত্ৰীৰ কণ্ঠ দমন কৰাৰ প্ৰয়াস কৰা হৈছিল। এই লৈ তেওঁলোকৰ মাজত কোনো অনুশোচনা নাই বুলি দাবী কৰে প্ৰধানমন্ত্ৰী মোদীয়ে । তেওঁ কয়,’অতি দুখৰ বিষয় যে ২০১৪ চনৰ পিছত যিকোনো সাংসদে ৫ বছৰ কাম কৰিছিল বা ১০ বছৰ কাম কৰিছিল, কিন্তু কিছু দলীয় ৰাজনীতিৰ বাবে সংসদত নিজৰ ক্ষেত্ৰখনৰ বিষয়ে ক’বলৈ সুযোগ নাপালে। নষ্ট হ’ল সংসদৰ গুৰুত্বপূৰ্ণ সময়।’
লগতে পঢ়ক: Budget 2024: আজি সংসদত দাখিল কৰা হ’ব অৰ্থনৈতিক জৰীপঃ বাজেটৰ পূৰ্বে কিয় দাখিল কৰা হয় এই জৰীপ?
প্ৰধানমন্ত্ৰী মোদীয়ে ৰাজনীতিৰ পৰা আঁতৰত থাকি দেশৰ জনতাৰ বাবে কৰিবলৈ আহ্বান জনাই কয় যে, ‘মই সকলো ৰাজনৈতিক দলকে ক’ম যে আগন্তুক ৪ বছৰলৈ দেশৰ বাবে সমৰ্পিততাৰে কাম কৰক । ২০২৯ চনৰ জানুৱাৰী মাহত যেতিয়া নিৰ্বাচন অনুষ্ঠিত হ’ব, তেতিয়া সংসদক ব্যৱহাৰ কৰক । বৰ্তমানে দেশৰ দুখীয়া, যুৱক, কৃষক আৰু মহিলাৰ বাবে কাম কৰক।’
সাংসদসকলক উদ্দেশ্যি প্ৰধানমন্ত্ৰী মোদীয়ে কয়,’যোৱা জানুৱাৰী মাহৰ পৰা মই যিমান পাৰো যুঁজিছো । কোনোবাই বাট দেখুৱাবলৈ চেষ্টা কৰিছে, কোনোবাই বিপথে পৰিচালিত কৰিবলৈ চেষ্টা কৰিছে। এতিয়া সেই অধ্যায় শেষ হ’ল। দেশবাসীয়ে নিজৰ মতামত প্ৰকাশ কৰিছে । এতিয়া আগন্তুক ৫ বছৰ দেশৰ বাবে এক হিচাপে যুঁজ দিয়াটো সাংসদ আৰু ৰাজনৈতিক দলৰ দায়িত্ব।’
ভাৰতৰ অৰ্থনীতি দ্ৰুতগতিত বৃদ্ধি পাইছে বুলি দাবী কৰি প্ৰধানমন্ত্ৰী মোদীয়ে কয়, যোৱা ৩ বছৰত ৮ শতাংশ বৃদ্ধি পাইছে। ইতিবাচক দৃষ্টিভংগী, বিনিয়োগ আৰু কৰ্মক্ষমতাই সুযোগৰ সৰ্বোচ্চ সীমাত উপনীত হৈছে । ই ভাৰতৰ উন্নয়নমূলক যাত্ৰাৰ অন্যতম গুৰুত্বপূৰ্ণ পদক্ষেপ বুলি কয় প্ৰধানমন্ত্ৰীয়ে ।
ইয়াৰ লগতে প্ৰধানমন্ত্ৰীমোদীয়ে বাজেটৰ প্ৰসংগত কয়, ‘এই বাজেট অমৃতকালৰ অন্যতম গুৰুত্বপূৰ্ণ অংশ। আমি ৫ বছৰ পাইছো, আজিৰ বাজেটে সেই ৫ বছৰৰ পথ নিৰ্ধাৰণ কৰিব । ২০৪৭ চনত যেতিয়া স্বাধীনতাৰ ১০০ বছৰ হ’ব, তেতিয়া আমি এখন উন্নত ভাৰতৰ বাবে এক শক্তিশালী ভেটি গঢ়ি তোলাৰ লক্ষ্যৰে এই বাজেটখন দাখিল কৰিম।’
‘এই সংসদ অধিৱেশনক মই অতি গুৰুত্বপূৰ্ণ মঞ্চ হিচাপে দেখিছোঁ। প্ৰায় ৬০ বছৰৰ পাছত তৃতীয়বাৰৰ বাবে এখন চৰকাৰে ক্ষমতালৈ আহি বাজেট দাখিল কৰাৰ সুযোগ পাইছে । দেশবাসীয়ে ইয়াক অতি গৌৰৱৰ বিষয় বুলি ভাবে। মই যি নিশ্চয়তা দিছো সেয়া পূৰণ কৰাৰ লক্ষ্যৰে আমি আগবাঢ়িছো।’ বাজেট দাখিলৰ পূৰ্বে আজি সংসদৰ বাহিৰত দেশবাসীক সম্বোধন কৰি এই মন্তব্য প্ৰকাশ কৰে দেশৰ প্ৰধানমন্ত্ৰী নৰেন্দ্ৰ মোদীয়ে ।
লগতে পঢ়ক : আজিৰ পৰা আৰম্ভ সংসদৰ বৰ্ষাকালীন অধিবেশন, চৰকাৰে দাখিল কৰিব ৬ খনকৈ বিধেয়ক