চাৰিধামৰ যাত্ৰাৰ পূৰ্বে বেয়া খবৰ! কেদাৰনাথ পথত বিয়পি পৰিছে ভয়ংকৰ ভাইৰাছ…
শীঘ্ৰেই আৰম্ভ হ'ব চাৰি ধামৰ যাত্ৰা। কিন্তু ইয়াৰ পূৰ্বে আছে এক বেয়া খবৰ। কিয়নো কেদাৰনাথৰ যাত্ৰা পথত ব্যৱহাৰ হোৱা ঘোঁৰা আৰু খচ্চৰৰ মাজত বিয়পি পৰিছে এক ভাইৰাছ। যিয়ে চিন্তিত কৰি তুলিছে চৰকাৰক।
চাৰি ধামৰ যাত্ৰা আৰম্ভ হ’বলৈ মাজত মাত্ৰ কেইটামান দিন বাকী। কিন্তু ইয়াৰ পূৰ্বে আহিছে এক বেয়া খবৰ। কেদাৰনাথৰ যাত্ৰা কৰা স্থানত বিয়পি কৰিছে এক ভাইৰাছ। একাংশ ভক্তই যাত্ৰা কৰা ঘোঁৰা আৰু খচ্চৰসমূহৰ মাজত এই ভাইৰাছ বিয়পি পৰিছে। তথ্য অনুসৰি ১২ টা ঘোঁৰা আৰু খচ্চৰত ইকুইন ইনফ্লুৱেঞ্জা ভাইৰাছ ধৰা পৰিছে। উত্তৰাখণ্ডৰ চৰকাৰৰ বাবে ই এক চিন্তাৰ কাৰণ হৈ পৰিছে। এই সন্দৰ্ভত বুধবাৰে উত্তৰাখণ্ড চৰকাৰৰ পশুপালন বিভাগৰ মন্ত্ৰী সৌৰভ বহুগুণাই এক বৈঠক অনুষ্ঠিত কৰে।
মন্ত্ৰীগৰাকীয়ে বিভাগীয় কৰ্তৃপক্ষক নিৰ্দেশ দি কয় যে, এই ভাইৰাছৰ দ্বাৰা আক্ৰান্ত কোনো ঘোঁৰা বা খচ্চৰ যাত্ৰাত অন্তৰ্ভুক্ত কৰিব নালাগে। ইযাৰ বাবে চাৰিধাম যাত্ৰা আৰম্ভ হোৱাৰ পূৰ্বে ঘোঁৰা আৰু খচ্চৰৰ ভালদৰে পৰীক্ষা কৰিবলৈ নিৰ্দেশ জাৰি কৰে। লগতে মন্ত্ৰীগৰাকীয়ে সকীয়াই দিয়ে যে, যদিহে ভ্ৰমণত ভাইৰাছত আক্ৰান্ত হোৱা ঘোঁৰা বা খচ্চৰ ব্যৱহাৰ কৰা দেখা যায় তেন্তে সংশ্লিষ্ট বিষয়াই ইয়াৰ বাবে জৰিমনা ভৰিব লাগিব। গতিকে সকলোকে এই বিষয়টো গুৰুত্ব সহকাৰে লৈ ঘোঁৰা আৰু খচ্চৰৰ পৰীক্ষা কৰিবলৈ অনুমতি দিয়ে মন্ত্ৰীগৰাকীয়ে।
১২ টা ঘোঁৰা আক্ৰান্ত
সংবাদ মাধ্যমৰ আগত মত ব্যক্ত কৰি মন্ত্ৰীগৰাকীয়ে জানিবলৈ দিয়ে যে, বৰ্তমান ১২ টা ঘোঁৰা আৰু খচ্চৰৰ দেহত এই ভাইৰাছৰ সংক্ৰমণ দেখিবলৈ পোৱা গৈছে। গতিকে সকলো ঘোঁৰা আৰু খচ্চৰৰ পৰীক্ষা কৰিবলৈ নিৰ্দেশ প্ৰদান কৰা হৈছে। ইয়াৰোপৰি আশে-পাশে থকা সকলো ঘোঁৰা আৰু খচ্চৰ পৰীক্ষা কৰিবলৈ দিয়া হৈছে। ইয়াৰোপৰি যিসমূহ জীৱ-জন্তুৰ দেহত এই ভাইৰাছ পোৱা গৈছে সেইসমূহ কোৱাৰেন্টাইন কৰা হৈছে। এই ভাইৰাছৰ সংক্ৰমণ ৰোধ কৰিবলৈ কোৱাৰেন্টাইন চেন্টাৰ নিৰ্মাণ কৰা হৈছে।
মন্ত্ৰীগৰাকীয়ে কয় যে, চাৰি ধামৰ যাত্ৰাৰ সময়ত যাতে ভাইৰাছত আক্ৰান্ত হোৱা ঘোঁৰা বা খচ্চৰ ব্যৱহাৰ কৰা নহয় তাৰ বাবে চৰকাৰে সকলো ধৰণৰ চেষ্টা চলাব। তেওঁ কয় যে, ঘোঁৰাৰ স্বাস্থ্য পৰীক্ষাৰ বাবে প্ৰয়োজনীয় সকলো সুবিধা বা ঔষধ যোগান ধৰিবলৈ নিৰ্দেশ জাৰি কৰা হৈছে। মুক্তেশ্বৰ ইনষ্টিটিউটত সকলো ঘোঁৰা আৰু খচ্চৰৰ চেৰ’লজিকেল নমুনা পৰীক্ষা কৰা হ’ব।
উল্লেখ্য যে, চাৰি ধামৰ যাত্ৰাৰ দিন ইতিমধ্যে ঘোষণা কৰা হৈছে। ৩০ এপ্ৰিলত গংগোত্ৰী আৰু যমুনোত্ৰি ধামৰ দুৱাৰ খোলা খাব। ইয়াৰ লগতে ৪ মে’ত বদ্ৰীনাথ ধামৰ দুৱাৰ আৰু ২ মে’ত কেদাৰনাথ ধামৰ দুৱাৰ খোল খাব। একেদৰে ২৫ মে’ত শ্ৰী হেমকুণ্ড চাহাবৰ দুৱাৰ মুকলি হ’ব।
