এই সময়লৈকে যেন আছিল অপেক্ষা ! টাটা মটৰ্ছৰ জেনেৰেল মেনেজাৰৰ পদত শান্তনু নাইডু
প্ৰখ্যাত ব্যৱসায়ী প্ৰয়াত ৰতন টাটাৰ বিশ্বস্ত সহযোগী শান্তনু নাইডু পুনৰ টাটাৰ সান্নিধ্যলৈ আহিছে । টাটা মটৰ্ছৰ জেনেৰেল মেনেজাৰ হিচাপে নিযুক্তি দিয়া হৈছে শান্তনুক । লগতে ষ্ট্ৰেটেজিক ইনিচিয়েটিভৰো মুৰব্বী নিযুক্ত কৰা হৈছে তেওঁক ।
ৰতন টাটাৰ সৈতে শান্তনু নাইডু
প্ৰখ্যাত ব্যৱসায়ী প্ৰয়াত ৰতন টাটাৰ ছাঁৰ দৰে আছিল যুৱকজন । যেতিয়া ৰতন টাটাৰ দেহাৱসান ঘটে, শোকত ভাগি পৰিছিল এইজন যুৱক । তেওঁৰ নাম শান্তনু নাইডু । ৰতন টাটাৰ বিয়োগত শোকত ভাগি পৰা শান্তনুক দেখি সকলোৱে অনুভৱ কৰিছিল আপোনজনক হেৰুওৱাৰ দুখ কিমান গভীৰ । এতিয়া পুনৰ শান্তনু নাইডু টাটাৰ সান্নিধ্যলৈ আহিছে । টাটা মটৰ্ছৰ জেনেৰেল মেনেজাৰ হিচাপে নিযুক্তি দিয়া হৈছে শান্তনুক । লগতে ষ্ট্ৰেটেজিক ইনিচিয়েটিভৰো মুৰব্বী নিযুক্ত কৰা হৈছে তেওঁক ।
টাটা মটৰ্ছৰ শীৰ্ষ পদত অধিষ্ঠিত হৈ এটা আবেগিক পোষ্ট কৰে শান্তনুৱে । লিংকড ইনত তেওঁ লিখিছে, “আনন্দেৰে জানাওঁ যে টাটা মটৰ্ছৰ জেনেৰেল মেনেজাৰ আৰু ষ্ট্ৰেটেজিক ইনিচিয়েটিভৰ মুৰব্বী হিচাপে দায়িত্ব পালন কৰিবলৈ লৈছোঁ । মোৰ মনত আছে, মোৰ দেউতাই যেতিয়া বগা চাৰ্ট আৰু নীলা পেন্ট পিন্ধি টাটা মটৰ্ছৰ প্লান্টৰ পৰা খোজ কাঢ়ি ঘৰলৈ আহে, মই খিৰিকীৰ কাষত ৰৈ অপেক্ষা কৰিছিলোঁ । সেই বৃত্ত সম্পূৰ্ণ হ’ল ।”
২০১৪ চনত সাবিত্ৰীবাই ফুলে পুনে ইউনিভাৰ্চিটিৰ পৰা ইঞ্জিনিয়াৰিং ডিগ্ৰী গ্ৰহণ কৰে শান্তনুৱে । তাৰ পাছত ২০১৬ চনত কৰ্ণেল ইউনিভাৰ্চিটিৰ পৰা এমবিএ কৰে । এই সময়তেই তেওঁৰ দেখা হৈছিল ৰতন টাটাৰ সৈতে । ২০১৪ চনত শান্তনুৱে উদ্ভাৱন কৰিছিল বাটৰ কুকুৰবোৰক দুৰ্ঘটনাৰ পৰা ৰক্ষা কৰা এক বিশেষ কৌশল । ৰতন টাটাৰ চকু পৰিছিল সেই কৌশলত ।
প্ৰথম সাক্ষাতৰ পৰাই দুয়োৰে মাজত গঢ়ি উঠে বন্ধুত্ব । শান্তনু যিদৰে ৰতন টাটাৰ কথা-বতৰা আৰু ব্যৱহাৰত মুগ্ধ হৈছিল, ৰতন টাটাও শান্তনুৰ চিন্তাধাৰা আৰু ভৱিষ্যত পৰিকল্পনাৰ প্ৰতি আকৰ্ষিত হৈছিল । দুয়োজনৰেই আছিল কুকুৰৰ প্ৰতি অগাধ প্ৰেম । এইদৰেই শান্তনু ৰতন টাটাৰ সৈতে ঘনিষ্ঠ হৈ পৰে । ২০১৮ চনত ৰতন টাটাৰ সহকাৰী হিচাপে তেওঁ কাম আৰম্ভ কৰে ।
ৰতন টাটাক শান্তনুৱে মৰমতে মাতিছিল লাইট হাউছ । নিজৰ গ্ৰন্থ, “আই কেম আপন এ লাইটহাউছ” ত তেওঁলোকৰ বন্ধুত্ব, এডভেঞ্চাৰ আদিৰ কথা উল্লেখ কৰিছে শান্তনুৱে । ৰতন টাটা ব্যক্তিগত জীৱনত কেনে আছিল সেয়াও উল্লেখ কৰিছে ।
২০২৪ চনৰ ৯ অক্টোবৰত ৮৬ বছৰ বয়সত ৰতন টাটাই শেষ নিশ্বাস ত্যাগ কৰে । তেওঁ নিজৰ উইলত শান্তনুৰ বাবেও বিশেষ উপহাৰ প্ৰদান কৰি যায় । ২০২১ বৰ্ষত ৰতন টাটা আৰু শান্তনুৰ যৌথ উদ্যোগত প্ৰতিষ্ঠা কৰা গুডফেল’ৰ পৰা নিজৰ স্বত্বাধিকাৰ পৰিহাৰ কৰে ৰতন টাটাই । লগতে মাফ কৰা হয় শান্তনুৱে অধ্যয়নৰ বাবে লোৱা সমস্ত ঋণ ।