জল সংকটৰ লগতে ৰাষ্ট্ৰীয় সুৰক্ষাৰ প্ৰতিও আহিব পাৰে ভাবুকি; ব্ৰহ্মপুত্ৰত চীনৰ নদীবান্ধ সন্দৰ্ভত ৰাজনাথ সিঙলৈ পত্ৰ গৌৰৱ গগৈৰ

কংগ্ৰেছ সাংসদ তথা লোকসভাৰ বিৰোধী উপ-দলপতি গৌৰৱ গগৈয়ে দেশৰ প্ৰতিৰক্ষা মন্ত্ৰী ৰাজনাথ সিঙলৈ চীনৰ বৃহৎ নদীবান্ধ সন্দৰ্ভত এখন পত্ৰ প্ৰেৰণ কৰিছে । পত্ৰযোগে ভাৰতত ব্ৰহ্মপুত্ৰ নামেৰে পৰিচিতি লাভ কৰা য়াৰলুং ছাংপো নদীত চীনে শেহতীয়াকৈ বিশ্বৰ সৰ্ববৃহৎ জলবিদ্যুৎ বান্ধ নিৰ্মাণৰ বাবে লোৱা সিদ্ধান্তক লৈ তীব্ৰ উদ্বেগ প্ৰকাশ কৰিছে ।

২৫ ডিচেম্বৰত চীনে অনুমোদন জনোৱা এই প্ৰকল্পই ভাৰতৰ বাবে বিশেষকৈ অসম আৰু উত্তৰ-পূবৰ অন্যান্য ৰাজ্যসমূহৰ বাবে ৰাষ্ট্ৰীয় নিৰাপত্তা আৰু জল সুৰক্ষাৰ ক্ষেত্ৰত গুৰুতৰ চিন্তাৰ উদ্ৰেগ ঘটাইছে ।

গগৈয়ে তেওঁৰ পত্ৰত এনে এক গুৰুত্বপূৰ্ণ জল উৎসৰ ওপৰত চীনৰ নিয়ন্ত্ৰণৰ প্ৰভাৱৰ ওপৰত আলোকপাত কৰি ইয়াৰ ফলত পানীৰ প্ৰবাহক লৈ কৌশলগতভাৱে চক্ৰান্ত ৰচনা কৰা, অসমৰ ঋতুভিত্তিক বানপানীৰ তীব্ৰতা আৰু খৰালি কালত পানীৰ নাটনি হ’ব পাৰে বুলি সকীয়াই দিয়ে ।

২০১৭ চনত ডোকলাম ষ্টেণ্ডঅফৰ কথাও তেওঁ প্ৰতিৰক্ষা মন্ত্ৰীক সোঁৱৰাই দিয়ে, য’ত চীনে ব্ৰহ্মপুত্ৰৰ জলবিজ্ঞানৰ তথ্য ভাগ-বাটোৱাৰা কৰাটো বন্ধ কৰি দিছিল, যাৰ ফলত নামনিৰ অঞ্চলসমূহ বিপদত পৰিছিল ।

China’s recent decision to construct the world’s largest dam across the Yarlung Tsangpo-Brahmaputra River raises serious concerns for India’s water security. The project puts the northeastern states, particularly Assam, in a vulnerable position. Despite the gravity of the… pic.twitter.com/De3hicZQ0k

— Gaurav Gogoi (@GauravGogoiAsm) January 15, 2025

গগৈয়ে বান্ধটোৰ পৰা উদ্ভৱ হ’ব পৰা যিকোনো ভাবুকিৰ প্ৰতি সঁহাৰি জনাবলৈ ভাৰতৰ প্ৰস্তুতিৰ প্ৰস্তুতি ওপৰত গুৰুত্ব আৰোপ কৰি প্ৰতিৰক্ষা মন্ত্ৰালয়ক ইয়াৰ কৌশলগত প্ৰভাৱৰ মূল্যায়ন কৰিবলৈ আৰু আঞ্চলিক নিৰাপত্তা বাহিনী আৰু বাংলাদেশৰ দৰে চুবুৰীয়া দেশৰ সৈতে সমন্বয় স্থাপন কৰিবলৈ আহ্বান জনায় ।

এই বৃহৎ প্ৰকল্পৰ পৰা ভাৰতৰ জলসম্পদ সুৰক্ষিত কৰাৰ লগতে ৰাষ্ট্ৰীয় নিৰাপত্তা সুনিশ্চিত কৰাৰ বাবে তেওঁ তাৎক্ষণিক ব্যৱস্থা গ্ৰহণৰ আহ্বান জনায় । তিব্বতত চীনৰ বৰ্ধিত আন্তঃগাঁথনি প্ৰকল্প আৰু ভাৰতৰ জল সুৰক্ষা আৰু আঞ্চলিক স্থিতিশীলতাৰ ওপৰত ইয়াৰ সম্ভাৱ্য দীৰ্ঘম্যাদী প্ৰভাৱৰ ওপৰত ক্ৰমাৎ উদ্বেগ প্ৰতিফলিত হৈছে এই পত্ৰখনে ।