Congress-NC Alliance: জম্মু-কাশ্মীৰৰ নতুন চৰকাৰক বাহিৰৰ পৰাহে সমৰ্থন কৰিব কংগ্ৰেছে !

ফাৰুক আৰু ওমৰ আব্দুল্লাৰ সৈতে ৰাহুল গান্ধী, মল্লিকাৰ্জুন খৰ্গে

১০ বছৰৰ পাছত জম্মু-কাশ্মীৰে লাভ কৰিব এখন নিৰ্বাচিত চৰকাৰ । ৩৭০ অনুচ্ছেদ প্ৰত্যাহাৰ কৰাৰ পাছত কেন্দ্ৰীয় শাসিত অঞ্চল জম্মু-কাশ্মীৰৰ মুখ্যমন্ত্ৰী হিচাপে আজি শপত গ্ৰহণ কৰিব ওমৰ আব্দুল্লাই। মনকৰিবলগীয়া যে, জম্মু-কাশ্মীৰৰ ওমৰ আব্দুল্লা চৰকাৰৰ অংশহৈ থাকিব বিচৰা নাই কংগ্ৰেছে । নেচনেল কনফাৰেন্স আৰু কংগ্ৰেছে মিত্ৰতাৰে জম্মু-কাশ্মীৰৰ বিধানসভা নিৰ্বাচনত প্ৰতিদ্বন্দ্বিতা কৰিছিল যদিও নেচনেল কনফাৰেন্স দলৰ চৰকাৰৰ লগত প্ৰত্যক্ষভাৱে নাথাকে কংগ্ৰেছে ।

সূত্ৰ অনুসৰি, প্ৰত্যক্ষভাৱে ওমৰ আব্দুল্লা চৰকাৰৰ সৈতে নাথাকিলেও বাহিৰৰ পৰা নেচনেল কনফাৰেন্স দলৰ চৰকাৰক সমৰ্থন আগবঢ়াব কংগ্ৰেছে । কংগ্ৰেছেৰ এই সিদ্ধান্তই ৰাজনৈতিক মহলত ব্যাপক চৰ্চা লাভ কৰিছে । অৱশ্যে কংগ্ৰেছে এতিয়ালৈ এই সিদ্ধান্ত সন্দৰ্ভত আনুষ্ঠানিকভাৱে কোনো কথা ঘোষণা কৰা নাই ।

উল্লেখ্য যে, ১০ বছৰৰ পাছত অনুষ্ঠিত হোৱা নিৰ্বাচনটোত নেচনেল কনফাৰেন্স দলে ৯০ খন আসনৰ ভিতৰত ৪২ খন আসন লাভ কৰে । ইয়াৰ বিপৰীতে তেওঁলোকৰ মিত্ৰদল কংগ্ৰেছে ৬ খন আসন লাভ কৰে । আজি মুখ্যমন্ত্ৰী হিচাপে ওমৰ আব্দুল্লাই শপত গ্ৰহণ কৰাৰ পূৰ্বেই এই খবৰে ৰাজনৈতিক মহলত জোকাৰণি সৃষ্টি কৰিছে ।

প্ৰকাশিত খবৰ অনুসৰি, নেচনেল কনফাৰেন্স দলৰ চৰকাৰত নাথাকিলেও কংগ্ৰেছে বাহিৰৰ পৰা সম্পূৰ্ণ সমৰ্থন আগবঢ়োৱাৰ আশ্বাস দিছে। জানিব পৰা মতে, আনকি চৰকাৰৰ কোনো মন্ত্ৰী পদও গ্ৰহণ নকৰে কংগ্ৰেছে ।

ইফালে, দলীয় সূত্ৰৰ পৰা জানিব পৰা মতে, জম্মু-কাশ্মীৰ নিৰ্বাচনত আশা কৰা ধৰণে ফলাফলৰ নোপোৱাৰ বাবেই কংগ্ৰেছে চৰকাৰৰ অংশ নোহোৱাৰ সিদ্ধান্ত লৈছে। নেচনেল কনফাৰেন্স দলে যিহেতু বৃহৎ সংখ্যক আসন লাভ কৰিছে । গতিকে চৰকাৰৰ সকলো ক্ষমতা দলটোৰ হাতত থাকিব। তদুপৰি আশানুৰূপ মন্ত্ৰী পদ নোপোৱাৰ বাবেই কংগ্ৰেছে এই সিদ্ধান্ত লৈছে বুলি কোৱা হৈছে ।

আজিৰ শপতগ্ৰহণৰ অনুষ্ঠানৰ বাবে নেচনেল কনফাৰেন্স দলে ইণ্ডিয়া মিত্ৰজোঁটৰ নেতাসকলক আমন্ত্ৰণ জনাইছে। জানিব পৰা মতে, ওমৰ আব্দুল্লাৰ শপতগ্ৰহণ অনুষ্ঠানত ৰাহুল গান্ধী, প্ৰিয়ংকা গান্ধী আৰু মল্লিকাৰ্জুন খৰ্গে উপস্থিত থাকিব ।