Cyclone Dana: ভক্তৰ বাবে বন্ধ থাকিব জগন্নাথ মন্দিৰ, জানক ‘ডানা’ৰ প্ৰভাৱৰ বিষয়ে…

'ডানা'ৰ প্ৰভাৱৰ বাবে বন্ধ থাকিব জগন্নাথ মন্দিৰ

ঘূৰ্ণীবতাহৰ ধুমুহা ডানাই ওড়িশা আৰু বংগত বিধ্বংসী ৰূপ ধাৰণ কৰিব পাৰে। এই ধুমুহাই বৃহস্পতিবাৰে ওড়িশাৰ উপকূলৰ ওচৰ পাইছে। যাৰ বাবে ওড়িশাৰ বহু অঞ্চলত ধাৰাসাৰ বৰষুণ হৈ আছে। ‘ডানা’ৰ ফলত জীৱন ব্যাহত হৈছে। শুকুৰবাৰে পুৱা ওড়িশা আৰু বংগত ঘূৰ্ণীবতাহৰ ধুমুহাৰ প্ৰচণ্ড প্ৰভাৱ দেখা গৈছে। এই সময়ছোৱাত ঘণ্টাত ১২০ কিলোমিটাৰ বেগত বতাহ বলিব পাৰে।

বতৰ বিজ্ঞান বিভাগে জনোৱা মতে, ২৫ অক্টোবৰৰ পুৱালৈকে ‘ডানা’ উত্তৰ-পশ্চিম দিশলৈ গৈ পুৰী আৰু সাগৰ দ্বীপৰ মাজত উত্তৰ ওড়িশা আৰু পশ্চিম বংগৰ উপকূল পাৰ হোৱাৰ সম্ভাৱনা আছে। ইয়াৰ পৰিপ্ৰেক্ষিতত বৃহস্পতিবাৰে বিষয়াসকলে ভক্তসকলক পুৰীৰ জগন্নাথ মন্দিৰলৈ নাযাবলৈ পৰামৰ্শ দিয়ে।

দ্বাদশ শতিকাৰ মন্দিৰটোত দুৰ্যোগৰ প্ৰভাৱ কম কৰাৰ বাবে প্ৰস্তুতি আৰম্ভ কৰিছে। পুৰী জিলা দণ্ডাধীশ সিদ্ধাৰ্থ এছ শ্বোৱাইনে কয় যে, নিৰাপত্তাজনিত কাৰণত মাহজোৰা কাতি মাহৰ উপবাস পালন কৰাকে ধৰি সকলো তীৰ্থযাত্ৰীয়ে মন্দিৰলৈ যোৱাৰ পৰা বিৰত থাকিব লাগে।

শ্ৰী জগন্নাথ মন্দিৰ প্ৰশাসনে এক বিবৃতিত কয় যে, দৈনন্দিন ৰীতি-নীতি বজাই ৰাখি মন্দিৰৰ সুৰক্ষা সুনিশ্চিত কৰাৰ বাবে প্ৰয়োজনীয় সকলো পদক্ষেপ গ্ৰহণ কৰা হৈছে। ভাৰতৰ বতৰ বিজ্ঞান বিভাগে জনোৱা মতে, শুকুৰবাৰে পুৱতি নিশা যেতিয়া ধুমুহা ‘ডানা’ উপকূলীয় অঞ্চললৈ আহিব, তেতিয়া পুৰী জিলাত ঘণ্টাত সৰ্বোচ্চ ৮০ কিলোমিটাৰ বেগত বতাহ বলিব পাৰে। লগতে জিলাখনত ধাৰাসাৰ বৰষুণ হোৱাৰ সম্ভাৱনা আছে।

প্ৰচণ্ড বতাহ আৰু বৰষুণৰ পৰা মন্দিৰটোক ৰক্ষা কৰিবলৈ প্ৰশাসনে মন্দিৰৰ দুৱাৰ-খিৰিকী পৰীক্ষা কৰিছে। লগতে পুৰীৰ বাহিৰৰ পৰা অহা ভক্তক সুৰক্ষিত স্থানত ৰখাৰ ব্যৱস্থা কৰিছে প্ৰশাসনে। বৃদ্ধা মহিলা আৰু কাতি মাহৰ ব্ৰত পালন কৰা সকলৰ বাবেও বিশেষ ব্যৱস্থা গ্ৰহণ কৰা হৈছে।

এই ঘূৰ্ণীবতাহৰ ফলত চিচিটিভি কেমেৰাৰ ক্ষতি হ’ব নোৱাৰে তাৰ বাবে প্ৰশাসনে ব্যৱস্থা গ্ৰহণ কৰিছে। এক চৰকাৰী বিবৃতিত কোৱা হৈছে যে বিদ্যুৎ কৰ্তনৰ ক্ষেত্ৰত অন্যান্য সঁজুলিৰ লগতে পাম্প আৰু জেনেৰেটৰ সাজু কৰি ৰখা হৈছে। শ্ৰী জগন্নাথ মন্দিৰৰ উপৰি কোনাৰ্কৰ ত্ৰয়োদশ শতিকাৰ সূৰ্য্য মন্দিৰলৈ অহা পৰ্যটকৰ সুৰক্ষাৰ বাবে জিলা প্ৰশাসন আৰু এ এছ আইয়ে পদক্ষেপ গ্ৰহণ কৰিছে। দুদিন ধৰি ক’নাৰ্ক মন্দিৰ বন্ধ কৰি দিয়াৰ বিপৰীতে জিলা আৰক্ষীয়ে বিললৈ যোৱা সকলো পৰ্যটকক বাধা প্ৰদান কৰিছে।

আজি নিশা আহিব পাৰে ডানা

বংগ উপসাগৰৰ পৰা উৎপত্তি হোৱা ঘূৰ্ণীবতাহ ধুমুহা ‘ডানা’ ২৪ অক্টোবৰৰ পুৱা প্ৰায় ২ বজাত ওড়িশাৰ উপকূলত আঘাত হানিব পাৰে। ইয়াৰ প্ৰভাৱ পশ্চিম বংগতো পৰিব। বৰ্তমান উপকূলীয় অঞ্চলত ঘণ্টাত ৭০ কিলোমিটাৰ বেগত বতাহ বলিছে। পুৱাৰে পৰা কলকাতা চহৰত ধাৰাবাহিকভাৱে অব্যাহত হৈ আছে বৰষুণ,বলিছে বতাহ ।

উল্লেখ্য যে, আঞ্চলিক বতৰ বিজ্ঞান কেন্দ্ৰৰ তথ্য অনুসৰি ‘ডানা’ৰ প্ৰভাৱ পৰিব অসমত। ৰাজ্যখনৰ ধুবুৰী, গোৱালপাৰা, কোকৰাঝাৰ, কামৰূপ, কামৰূপ মহানগৰ, কৰিমগঞ্জ, পশ্চিম কাৰ্বি আংলং, হাইলাকান্দি, কাছাৰ, ডিমা হাছাও আৰু গোলাঘাট জিলাত বৰষুণ হ’ব । আজি পুৱাৰে পৰা অসমৰ বিবিন্ন প্ৰান্তত কিনকিনিয়া বৰষুণ হৈ আছে।