ৰাজধানী বা শতাব্দী নহয়! ভাৰতৰ প্ৰথমখন ডাবল ডেকাৰ ৰে’ল কি জানেনে?

ভাৰতীয় ৰে’লৱেই এশ বছৰতকৈও অধিক সময় ধৰি দেশ আৰু জনসাধাৰণৰ সেৱা আগবঢ়াই আহিছে । ক্ৰমাগতভাৱে বিকাশ সাধন হৈছে ৰে’লৱে খণ্ডৰ । ভাৰতীয় ৰে’লৱে বিশ্বৰ শীৰ্ষ ৫ টা বৃহৎ ৰে’লৱে নেটৱৰ্কৰ ভিতৰত অন্যতম । দৈনিক লাখ লাখ যাত্ৰীয়ে যাত্ৰা কৰে ৰে’লযোগে । ভাৰতীয় ৰে’লৱেই ৭,৩০৮টাতকৈও অধিক ষ্টেচন পৰিচালনা কৰে । য’ত দৈনিক প্ৰায় ১৩,০০০ ৰে’লে ২ কোটিতকৈ অধিক যাত্ৰী কঢ়িয়াই লৈ যায় । ভাৰতীয় ৰে’লৱেৰ ৰে’ল ষ্টেচনসমূহে দোকান বা বিজ্ঞাপন আৰু প্লেটফৰ্ম টিকটৰ দৰে বিভিন্ন ৰাজহৰ উৎসৰ জৰিয়তে প্ৰতি বছৰে কোটি কোটি টকা উপাৰ্জন কৰে । ভাৰতীয় ৰে’লৱে চৰকাৰৰ ৰাজহৰ অন্যতম বৃহৎ উৎস, যাৰ বাবে ই ভাৰতীয় অৰ্থনীতিৰ মেৰুদণ্ড হৈ পৰিছে ।

ইয়াত আমি আপোনালোকক ভাৰতৰ প্ৰথমখন ডাবল ডেকাৰ ৰে’লৰ বিষয়ে জনাম । ১৯৭৯ চনৰ ১৮ ডিচেম্বৰত ডাবল ডেকাৰ কোচৰ সৈতে সংযুক্ত হোৱা প্ৰথমখন ৰে’ল হিচাপে পৰিগণিত হয় ফ্লাইং ৰাণী এক্সপ্ৰেছ । ছুৰাট আৰু মুম্বাই চেণ্ট্ৰে’লৰ মাজত প্ৰায় ৪ ঘণ্টা ৪০ মিনিটত ২৬৩ কিলোমিটাৰ অতিক্ৰম কৰি ফ্লাইং ৰাণীয়ে চলাচল কৰে ।

ৰে’লখনত ১০টা দ্বিতীয় শ্ৰেণীৰ ডাবল ডেকাৰ ডবা আছিল, প্ৰত্যেকটো ডবাতে ১৪৮ জন যাত্ৰী কঢ়িওৱাৰ ক্ষমতা আছিল । পৰৱৰ্তী সময়ত ৰে’লখনৰ যাত্ৰী কঢ়িয়াব পৰা ক্ষমতা ২৯ শতাংশ বৃদ্ধি পায় ।

২০২৩ চনৰ জুলাই মাহত ডাবল ডেকাৰ সেৱা বন্ধ কৰা হয় আৰু ইয়াৰ ঠাইত নতুন একক ডেক ফ্লাইং ৰাণী এক্সপ্ৰেছৰ ব্যৱস্থা কৰা হয় । ইয়াত এয়াৰ কণ্ডিচনাৰযুক্ত চেয়াৰ কোচ, দ্বিতীয় শ্ৰেণীৰ আসনৰ কোচ, কেৱল মহিলাৰ বাবে কোচ আৰু সাধাৰণ কোচৰ উপৰিও মহিলাৰ বাবে ছিজন টিকটযুক্ত কোচ আদি উপলব্ধ কৰা হয় ।

ফ্লাইং ৰাণী বৰ্তমান লিংক-হফমেন-বুচ (এল এইচ বি) ৰেকৰ সৈতে পৰিচালিত হয় । য’ত ২টা সংৰক্ষিত এ চি চেয়াৰ কাৰ কোচ, ৭টা ৰিজাৰ্ভড চেয়াৰ কাৰ কোচ, ৬টা সাধাৰণ দ্বিতীয় শ্ৰেণীৰ কোচ, প্ৰথম শ্ৰেণীৰ এম এছ টি পাছধাৰীৰ বাবে নিৰ্ধাৰিত ১টা সাধাৰণ দ্বিতীয় শ্ৰেণীৰ কোচ, দ্বিতীয় শ্ৰেণীৰ এম এছ টি পাছধাৰীৰ বাবে নিৰ্ধাৰিত ১টা সাধাৰণ দ্বিতীয় শ্ৰেণীৰ কোচ, ১টা সাধাৰণ দ্বিতীয় শ্ৰেণীৰ লেডিজ কোচ, দ্বিতীয় শ্ৰেণীৰ এমএছটি লেডিজ পাছহোল্ডাৰৰ বাবে নিৰ্ধাৰিত ১টা দ্বিতীয় শ্ৰেণীৰ সাধাৰণ কোচ, ১ টা এণ্ড-অন জেনেৰেচন কোচ আৰু ১ টা ছিটিং তথা লাগেজ কোচ আছে ।

এই ৰে’লৰ ৰেকত পূৰ্বতে ডাবল ডেকাৰ নন-এচি ডবা অন্তৰ্ভুক্ত কৰা হৈছিল । ২০২৩ চনৰ জুলাই মাহত এল এইচ বি ৰেকেৰে ৰে’লখন উন্নীত কৰাৰ সময়ত এই ডবাবোৰ আঁতৰাই পেলোৱা হৈছিল ।