চিকেন ম’ম’ত এয়া কি মাংস? ম’ম’ কাৰখানাৰ ফ্ৰীজত ওলাল কুকুৰৰ কটা মূৰ

সন্ধিয়া পৰত আপোনাৰো নিশ্চয় মন যায় মুখৰোচক কিবা এটা খাবলৈ । ঘৰত বনাই খোৱাৰ বাহিৰেও বহুতেই পছন্দ কৰে ষ্ট্ৰীট ফুডৰ সোৱাদ ল’বলৈ । চাওমিন, ম’ম’, ৰোল আদি বিভিন্ন সোৱাদ লগা খাদ্যৰ জুতি আপুনিও নিশ্চয় লৈছে । বিয়লি একাপ গৰম চুপৰ সৈতে এক প্লেট ম’ম’ যদি কোনোবাই আপোনাক খাবলৈ দিয়ে, আপুনি নিশ্চয় না নকৰে । চিকেন, ভেজ, পৰ্ক আদি বিভিন্ন ম’ম’ পোৱা যায় ফুড কৰ্ণাৰসমূহত ।

এইখিনিতে আপোনাক এটা বিশেষ খবৰ দিওঁ । এখন দোকানত চিকেন ম’ম’ৰ নামত যি কাণ্ড সংঘটিত কৰা হৈছে, সেয়া জানিলে আপুনিও ম’ম’ত কামোৰ মৰাৰ আগত দুবাৰ ভাবিব । প্ৰতিদিনেই দোকানখনত বিক্ৰী হয় ম’ম’ । গ্ৰাহকৰো ভিৰ থাকে ম’ম’ খাবলৈ । কিন্তু চিকেন ম’ম’ৰ নামত কি মাংস গ্ৰাহকক খুৱালে বিক্ৰেতাই জানিলে আপুনি ঘৃণাত নাক কোঁচাব ।

ম’ম’ (প্ৰতীকী ছবি)

মানুহে বিশ্বাসেৰে দোকানখনত ম’ম’ খায় । কিন্তু গ্ৰাহকৰ বিশ্বাসৰ সৈতে বিশ্বাসঘাতকতা কৰিলে বিক্ৰেতাই । ম’ম’ প্ৰস্তুত কৰা কাৰখানাত সোমোৱা লগে লগেই পোহৰলৈ আহিল এই ভয়ংকৰ ঘটনাৰ কথা । চিকেনৰ নামত ম’ম’ত ব্যৱহাৰ কৰা হৈছে কুকুৰৰ মাংস । ম’ম’ প্ৰস্তুত উদ্যোগত উদ্ধাৰ কুকুৰৰ কটা মূৰ ।

এই ঘটনা সংঘটিত হৈছে পঞ্জাবত । খাদ্যৰ মান তথা পৰিষ্কাৰ-পৰিছন্নতা সন্দৰ্ভত পৌৰসভাই চলাইছিল অভিযান । সেই অভিযানত পঞ্জাবৰ এটা ম’ম’ প্ৰস্তুত কৰা উদ্যোগত উদ্ধাৰ হৈছে কুকুৰৰ মূৰ । মোহালিৰ মাট্টুৰৰ এখন ফাষ্ট ফুডৰ দোকানত চলিছিল এই তালাচী । কিন্তু উদ্যোগটোৰ ফ্ৰীজ খুলি আচৰিত হয় অভিযানকাৰী দল । কিয়নো ফ্ৰীজৰ ভিতৰত উদ্ধাৰ কুকুৰৰ মূৰৰ লগতে নষ্ট হৈ যোৱা খাদ্যৰ পেকেট ।

ম’ম’ (প্ৰতীকী ছবি)

স্থানীয় একাংশ লোকে অভিযোগ দাখিল কৰিছিল পৌৰ সভাত । তাৰ পাছতেই ফাষ্ট ফুডৰ দোকানখনত চলে অভিযান । ম’ম’ত চিকেনৰ নামত যে তাত কুকুৰৰ মাংস ব্যৱহাৰ কৰা হৈছিল সেয়া জনা নাছিল কোনেও । মূলতঃ পৰিস্কাৰ-পৰিছন্নতাৰ বিষয়তেই দিয়া হৈছিল অভিযোগ । অপৰিষ্কাৰ পানী, আৰু পচা পাচলিৰ ভিডিঅ’ পোষ্ট কৰিছিল লোকসকলে । এই অভিযোগৰ পিছত মেডিকেল টিমে প্ৰতিষ্ঠানখনত অভিযান চলায় ।

অভিযানকালত পচা আৰু নিম্নমানৰ খাদ্য আৰু মাংস উদ্ধাৰ কৰা হয় । ফ্ৰীজ খোলাৰ লগে লগেই অভিযানকাৰী দল আচৰিত হৈ পৰে । কিয়নো ফ্ৰীজত পাগ প্ৰজাতিৰ এটা কুকুৰৰ মূৰ উদ্ধাৰ হয় । প্ৰতিষ্ঠানটোৰ কৰ্মীসকলে দাবী কৰা মতে সেই মাংস ম’ম’ত ব্যৱহাৰ কৰা নহয় । যিহেতু প্ৰতিষ্ঠানটোত বহুকেইজন নেপালী লোকে কাম কৰে, তেওঁলোকেহে কুকুৰ মাংস ভক্ষণ কৰে ।

ম’ম’ (প্ৰতীকী ছবি)

জানিব পৰা মতে সেই প্ৰতিষ্ঠানৰ পৰা ম’ম’ আৰু ৰোল চণ্ডীগড়, পঞ্চকুলা আৰু কালকায়লৈ যোগান ধৰা হয় । উদ্যোগটোত যথেষ্ট মাংস উদ্ধাৰ কৰা হয় । ব্যৱহৃত তেলো উদ্ধাৰ কৰা হয় । মাংসখিনি ইতিমধ্যে পৰীক্ষণৰ বাবে প্ৰেৰণ কৰা হৈছে পৰীক্ষাগাৰলৈ । পৰীক্ষাৰ প্ৰতিবেদন আহিলেই জানিব পৰা যাব, সেই ম’ম’ত প্ৰকৃততে কি মাংস ব্যৱহাৰ কৰা হৈছিল ।