গাড়ী চালকলৈ আহিল ৩.৬৮ কোটি টকাৰ আয়কৰ জাননীঃ মূৰে কপালে হাত দিছে পৰিয়ালে

সাধাৰণ এখন বাহন চলাই পেটে ভাতে খাই থকা এগৰাকী যুৱক, বাহন চালক হিচাপে আৰ্জিত উপাৰ্জনৰ জৰিয়তেই নিজৰ লগতে পৰিয়ালটোকো পোহপাল দি আছিল যুৱকজনে। পিছে হঠাতে অহা এখন জাননীয়ে এই যুৱকজনৰ লগতে তেওঁৰ পৰিয়ালটোৰ অৱস্থা এতিয়া পানীত হাঁহ নচৰা কৰি তুলিছে। গাড়ী চালক এই যুৱকজনলৈ আহিছে ৩ কোটি টকাতকৈও অধিক পৰিমাণৰ আয়কৰ জাননী। নিজে গাড়ী চালক এই যুৱকজনৰ পিতৃও এগৰাকী সাধাৰণ কৃষক। তেনেস্থলত আয়কৰ বিভাগৰ এই জাননী দেখি এতিয়া পৰিয়ালটো আতংকিত হৈ উঠিছে।

এই ঘটনা ঘটিছে উত্তৰ প্ৰদেশৰ কনৌজ জিলাত। প্ৰকাশিত তথ্য অনুসৰি কনৌজৰ ছিব্ৰমৌ অঞ্চলৰ অৱনেন্দ্ৰ কুমাৰ নামৰ এই যুৱকজনে পিতৃ আৰু তিনি ভাতৃৰ সৈতে বাস কৰে। গাড়ী চালক হিচাপে জীৱন নিৰ্বাহ কৰি থকা অৱনেন্দ্ৰৰ পিতৃ ৰামলাল এজন খেতিয়ক। ভুক্তভোগী অৱনেন্দ্ৰই জনোৱা মতে, যোৱা ২৪ মাৰ্চত আয়কৰ বিভাগৰ পৰা ৩ কোটি ৬৮ লাখ ৩ হাজাৰ ৬১৯ টকাৰ কৰ পৰিশোধ কৰাৰ নিৰ্দেশেৰে তেওঁৰ ঘৰলৈ এখন জাননী আহিছিল।

আয়কৰ বিভাগৰ পৰা জাননী পোৱাৰ পিছত তেওঁ স্তম্ভিত হৈ পৰে। ইয়াৰ পিছতে তেওঁ জিলাখনৰ শীৰ্ষ বিষয়াসকলক সাক্ষাৎ কৰাৰ লগতে আয়কৰ কাৰ্যালয়তো উপস্থিত হয় যদিও বিভাগীয় বিষয়াসকলৰ পৰা তেওঁ কেৱল মৌখিক আশ্বাসহে লাভ কৰে। অৱনেন্দ্ৰই জানিবলৈ দিয়া মতে কেইবছৰমান পূৰ্বেও তেওঁ আয়কৰ বিভাগৰ পৰা ৭৫ লাখ টকাৰ আন এখন জাননী লাভ কৰিছিল। এতিয়া পুনৰ এই জাননী লাভ কৰাত তেওঁ চিন্তিত হৈ পৰে।

ইয়াৰ পিছতে তেওঁ জিলা দণ্ডাধীশ আৰু আৰক্ষী অধীক্ষকক সাক্ষাৎ কৰি এই সমস্যাৰ বিষয়ে জানিবলৈ দিয়ে। ইয়াৰ পিছত অৱনেন্দ্ৰই আয়কৰ বিভাগৰ কাৰ্যালয়ত উপস্থিত হৈ সমগ্ৰ বিষয়টো বিষয়াসকলৰ আগত অৱগত কৰে। অৱনেন্দ্ৰৰ পৰা এই অভিযোগ লাভ কৰাৰ পিছতে বিষয়াসকলে তদন্ত কৰে। বিভাগীয় তদন্তত দিল্লী আৰু গুৰুগ্ৰামৰ কোনো বৃহৎ প্ৰতিষ্ঠানে অৱনেন্দ্ৰৰ পেন কাৰ্ড ব্যৱহাৰ কৰি থকাৰ তথ্য পোহৰলৈ আহে।

এনে পৰিস্থিতিত অৱনেন্দ্ৰই এতিয়া কোনো বৃহৎ ষড়যন্ত্ৰৰ বলি হোৱাৰ আশংকা প্ৰকাশ কৰিছে। বিভাগে এতিয়া কোনো বৃহৎ ছিণ্ডিকেট চক্ৰই নিৰীহ লোকৰ নথি-পত্ৰ ব্যৱহাৰ কৰি কৰ ফাঁকি আৰু ডাঙৰ ডাঙৰ জালিয়াতি চলাই আছে বুলিও সন্দেহ প্ৰকাশ পাইছে। যুৱকজনৰ পেন কেনেকৈ আৰু কি পৰিস্থিতিত এই চক্ৰৰ হাতত পৰিছিল আৰু কেতিয়াৰ পৰা এনেদৰে ব্যৱহাৰ কৰি আহিছে, সেই সন্দৰ্ভত তদন্ত অব্যাহত ৰাখিছে আয়কৰ বিভাগে।