Indian Army Day 2025: ৰাষ্ট্ৰপতি, প্ৰধানমন্ত্ৰীৰ লগতে বিভিন্নজনে সুঁৱৰিলে ভাৰতীয় সেনাৰ বীৰত্বৰ ইতিহাস

ভাৰতীয় সেনা দিৱস

আজি ভাৰতীয় সেনা দিৱস । প্ৰতিবছৰে জানুৱাৰী মাহৰ ১৫ তাৰিখে এই দিৱস পালন কৰা হয় । ১৯৪৯ চনত জেনেৰেল (পিছলৈ ফিল্ড মাৰ্শ্বাল) কে এম কেৰিয়াপ্পাই শেষৰ গৰাকী ব্ৰিটিছ কমাণ্ডাৰ ইন চীফ জেনেৰেল ফ্ৰেন্সিছ ৰয় বুচাৰৰ পৰা সেনাবাহিনীৰ বাঘজৰী চমজি লোৱাৰ দিনটোৰ স্মৃতিত প্ৰতি বছৰে ১৫ জানুৱাৰীক সেনা দিৱস হিচাপে পালন কৰা হয় । এইদৰে স্বাধীনতাৰ পিছত প্ৰথম ভাৰতীয় মুখ্য সেনাধ্যক্ষ হিচাপে পৰিগণিত হয় কে এম কেৰিয়াপ্পা । আজিৰ দিনটোত ৰাষ্ট্ৰপতিৰ পৰা প্ৰধানমন্ত্ৰী, বিৰোধী নেতালৈকে বিভিন্নজনে ভাৰতীয় সেনা বাহিনীৰ কৰ্তব্যনিষ্ঠা আৰু ত্যাগক সন্মান জনাইছে ।

ৰাষ্ট্ৰপতি দ্ৰৌপদী মুৰ্মুৰ শুভেচ্ছাবাণী

দেশৰ সশস্ত্ৰ বাহিনীৰ সৰ্বোচ্চ সেনাধ্যক্ষ ৰাষ্ট্ৰপতি দ্ৰৌপদী মুৰ্মুৱে ৭৭ সংখ্যক সেনা দিৱস উপলক্ষে ভাৰতীয় সেনাবাহিনীৰ ৰাষ্ট্ৰীয় নিৰাপত্তাৰ ক্ষেত্ৰত অতুলনীয় অৱদান, সন্ত্ৰাসবাদৰ বিৰুদ্ধে যুঁজ দিয়াৰ দায়বদ্ধতা, দেশৰ শান্তি আৰু সমৃদ্ধিৰ বাবে সমৰ্পিত মনোভাৱেৰে দায়িত্ব পালন কৰাৰ বাবে ভাৰতীয় সেনাক প্ৰশংসা কৰে ।

ভাৰতীয় সেনাক উদ্দেশ্যি দিয়া ভাষণত ৰাষ্ট্ৰপতিগৰাকীয়ে কয়, “২০২৫ চনৰ সেনা দিৱস উপলক্ষে ভাৰতীয় সেনালৈ মোৰ উষ্ম অভিনন্দন জ্ঞাপন কৰিছোঁ । ৰাষ্ট্ৰীয় নিৰাপত্তা নিশ্চিত কৰাৰ ক্ষেত্ৰত ভাৰতীয় সেনাই গুৰুত্বপূৰ্ণ ভূমিকা পালন কৰে । দেশৰ প্ৰগতি আৰু সমৃদ্ধিৰ বাবে দেশত শান্তিপূৰ্ণ পৰিৱেশ গঢ়ি তোলাত আমাৰ জোৱানসকলে অৰিহণা যোগায়। সাহসী সেনা জোৱানসকলে আমাৰ সীমান্ত ৰক্ষাৰ ক্ষেত্ৰত ধাৰাবাহিকভাৱে অসাধাৰণ সাহস আৰু উচ্চ মানদণ্ডৰ পেছাদাৰিত্ব প্ৰদৰ্শন কৰিছে । ভাৰতীয় সেনাই সন্ত্ৰাসবাদ বিৰোধী অভিযানত জড়িত হৈ আহিছে আৰু সন্ত্ৰাসবাদ নিয়ন্ত্ৰণত যথেষ্ট সহায় কৰিছে ।”

প্ৰধানমন্ত্ৰী মোদীৰ শুভকামনা ভাৰতীয় সেনাক

৭৭ সংখ্যক সেনা দিৱস উপলক্ষে প্ৰধানমন্ত্ৰী নৰেন্দ্ৰ মোদীয়ে ভাৰতীয় সেনালৈ শুভেচ্ছা জ্ঞাপন কৰে । ২০২৫ চনৰ সেনা দিৱস উপলক্ষে জোৱানসকললৈ প্ৰেৰণ কৰা বাৰ্তাত প্ৰধানমন্ত্ৰী নৰেন্দ্ৰ মোদীয়ে সাহসী সৈনিকক ধন্যবাদ জ্ঞাপন কৰি কয় যে দেশে তেওঁলোকৰ “অদম্য সাহস আৰু ত্যাগ”ৰ বাবে গৌৰৱান্বিত।
“ভাৰতীয় সেনাৰ বীৰ জোৱান, প্ৰাক্তন সৈনিক, বীৰ মহিলা আৰু পৰিয়ালৰ সদস্যলৈ সেনা দিৱসৰ আন্তৰিক শুভেচ্ছা । দেশৰ প্ৰতি নিজৰ জোৱানসকলৰ অদম্য সাহস, ত্যাগ আৰু অতুলনীয় সমৰ্পণৰ বাবে দেশ গৌৰৱান্বিত।”

“ভাৰতীয় সেনাৰ নিষ্ঠা আৰু পেছাগতভাৱে বিভিন্ন প্ৰত্যাহ্বানৰ সন্মুখীন হোৱাৰ ক্ষমতাই সেৱাৰ উচ্চ মানদণ্ড নিৰ্ধাৰণ কৰিছে । দেশৰ দুৰ্গম সীমা, দুৰ্যোগৰ পৰিস্থিতি আৰু আভ্যন্তৰীণ অসুবিধাৰ সৈতে মোকাবিলা কৰাৰ আমাৰ সেনাৰ গৌৰৱময় ইতিহাস আছে। এক সংগঠিত, অনুশাসিত আৰু শক্তিশালী শক্তি হিচাপে, ভাৰতীয় সেনাই বিশ্বত এক অনন্য পৰিচয় প্ৰতিষ্ঠা কৰিছে ।” বাৰ্তাটোত লগতে কয় প্ৰধানমন্ত্ৰীয়ে ।

“ভাৰত মাতৃৰ সেৱাৰ বাবে আমাৰ জোৱানসকলৰ সাহস, ত্যাগ আৰু বীৰত্বক দেশে কৃতজ্ঞতাৰে স্মৰণ কৰে । সেনা দিৱসৰ গুৰুত্বপূৰ্ণ উপলক্ষে সকলো দেশবাসীৰ হৈ বীৰ শ্বহীদ, সাহসী মহিলা আৰু প্ৰাক্তন সেনাকক প্ৰণাম জনাইছো ।” শ্বহীদবৰণ কৰা বীৰ সৈনিকক স্মৰণ কৰি এইদৰে কয় প্ৰধানমন্ত্ৰীয়ে ।

কেন্দ্ৰীয় প্ৰতিৰক্ষামন্ত্ৰী ৰাজনাথ সিঙৰ শুভেচ্ছা বাৰ্তা

বুধবাৰে ৭৭ সংখ্যক সেনা দিৱস উপলক্ষে ভাৰতীয় সেনাৰ বীৰ জোৱান, বিষয়া, পৰিয়াললৈ আন্তৰিক শুভেচ্ছা জ্ঞাপন কৰে প্ৰতিৰক্ষা মন্ত্ৰী ৰাজনাথ সিঙে । নিজৰ বাৰ্তাত সিঙে সৈনিকসকলৰ অদম্য সাহস, বীৰত্ব আৰু নিস্বাৰ্থ সেৱাক প্ৰণাম জনাই কেৱল দেশৰ সীমা সুৰক্ষিত কৰাই নহয়, দুৰ্যোগ ব্যৱস্থাপনা, শান্তি ৰক্ষা আৰু মানৱীয় প্ৰচেষ্টাতো সেনাবাহিনীৰ গুৰুত্বপূৰ্ণ ভূমিকাক আলোকপাত কৰে ।

‘‘সেনা দিৱসৰ শুভক্ষণত ভাৰতীয় সেনাবাহিনীৰ সকলো বীৰ জোৱান, বিষয়া, আৰু তেওঁলোকৰ পৰিয়াললৈ আন্তৰিক শুভেচ্ছা জ্ঞাপন কৰিছোঁ । আমাৰ জাতিৰ নিৰাপত্তা আৰু অখণ্ডতাৰ প্ৰতি তেওঁলোকৰ অদম্য সাহস, সাহস, আৰু নিস্বাৰ্থ সেৱাক প্ৰণাম জনোৱাৰ সুযোগ এই দিনটোৱে প্ৰদান কৰে । ভাৰতীয় সেনাই কেৱল দেশৰ সীমা ৰক্ষাৰ ক্ষেত্ৰত অগ্ৰণী ভূমিকা গ্ৰহণ কৰাই নহয়, দুৰ্যোগ ব্যৱস্থাপনা, শান্তি ৰক্ষা, মানৱীয় সাহায্যৰ ক্ষেত্ৰতো ব্যতিক্ৰমী অৱদান আগবঢ়ায়। ই প্ৰতিজন ভাৰতীয়ৰ বাবে গৌৰৱ আৰু বিশ্বাসৰ প্ৰতীক ।’’ প্ৰতিৰক্ষামন্ত্ৰীগৰাকীয়ে কয় ।

‘‘মই আনন্দিত যে ভাৰতীয় সেনাই সকলোধৰণৰ পৰম্পৰাগত আৰু অগতানুগতিক ভাবুকিৰ সৈতে মোকাবিলা কৰিবলৈ সদায় সাজু হোৱাই নহয়, দেশখনক উন্নত ৰাষ্ট্ৰ হিচাপে প্ৰতিষ্ঠা কৰাত সহায় কৰাৰ ক্ষেত্ৰতো গুৰুত্বপূৰ্ণ ভূমিকা পালন কৰে । পৰিৱৰ্তন আৰু আধুনিক প্ৰযুক্তি গ্ৰহণ, আত্মনিৰ্ভৰশীলতাক প্ৰসাৰিত কৰা আৰু থলুৱা প্ৰযুক্তিৰ ব্যৱহাৰ বৃদ্ধিৰ ক্ষেত্ৰতো সেনাই দ্ৰুতগতিত আগবাঢ়িছে ।’’

ভাৰতীয় সেনাৰ মুৰব্বী জেনেৰেল উপেন্দ্ৰ দ্বিবেদীৰ শুভেচ্ছাবাণী

সেনাবাহিনীৰ মুৰব্বী জেনেৰেল উপেন্দ্ৰ দ্বিবেদীয়েও সেনাবাহিনীলৈ শুভেচ্ছা জ্ঞাপন কৰে । তেওঁৰ বাৰ্তাত জেনেৰেল দ্বিবেদীয়ে জোৰ দি কয় যে ভাৰতীয় সেনাই নিজৰ কল্পিত লক্ষ্য বিকশিত ভাৰতৰ দিশত দেশখনৰ নিৰৱচ্ছিন্ন প্ৰগতিৰ বাবে অপৰিহাৰ্য সুস্থিৰ আৰু সুৰক্ষিত পৰিৱেশ সুনিশ্চিত কৰাৰ ক্ষেত্ৰত গুৰুত্বপূৰ্ণ ভূমিকা পালন কৰে ।

“সেইটোৰ প্ৰতি আমাৰ দায়বদ্ধতা অটল হৈয়েই আছে । নিৰাপত্তাজনিত প্ৰত্যাহ্বানৰ সন্মুখীন হোৱাত ভাৰতীয় সেনাৰ প্ৰতিজন সৈনিকে দৃঢ়তাৰে থিয় দিছে, সেয়া আমাৰ সীমান্ততেই হওক বা অন্তৰ্দেশতেই হওক। অসামৰিক কৰ্তৃপক্ষক সহায় কৰা, মানৱীয় সাহায্য প্ৰদান কৰা, দুৰ্যোগৰ সময়ত সাহায্য প্ৰদান কৰা আৰু ৰাষ্ট্ৰ নিৰ্মাণৰ পদক্ষেপত অৰিহণা যোগোৱাৰ আমাৰ বাধ্যবাধকতাত আমি সদায় অটল হৈ আছোঁ আৰু থাকিম ।’’

ৰাহুল গান্ধী আৰু কংগ্ৰেছৰ সভাপতি মল্লিকাৰ্জুন খাৰ্গেৰ শুভেচ্ছা বাৰ্তা

বুধবাৰে ৭৭ সংখ্যক সেনা দিৱস উপলক্ষে লোকসভাৰ বিৰোধী দলপতি ৰাহুল গান্ধীয়ে শ্ৰদ্ধাঞ্জলি আৰু শুভেচ্ছা জ্ঞাপন কৰে ভাৰতীয় সেনাক ।
এক্সত এটা পোষ্টত ৰাহুলে কয়, “নিজৰ অটল নিষ্ঠা আৰু সাহসেৰে ভাৰতীয় সীমান্তক দিনে-নিশাই সুৰক্ষা প্ৰদান কৰা সাহসী সৈনিক, প্ৰাক্তন সেনা আৰু তেওঁলোকৰ পৰিয়াললৈ সেনা দিৱসৰ শুভেচ্ছা জনালোঁ ।” তেওঁ লগতে কয়, “আপোনালোকৰ অদম্য সাহস আৰু ত্যাগক প্ৰতিজন ভাৰতীয়ই প্ৰণাম জনাইছোঁ । জয় হিন্দ, জয় ভাৰত ।”

কংগ্ৰেছৰ সভাপতি মল্লিকাৰ্জুন খাৰ্গেয়ো এই উপলক্ষে সেনাবাহিনীৰ জোৱানসকলৰ প্ৰতি কৃতজ্ঞতা জ্ঞাপন কৰে । “ভাৰতীয় সেনা দিৱস উপলক্ষে আমি বীৰ জোৱান, প্ৰবীণ সৈনিক, প্ৰাক্তন সেনা জোৱান আৰু তেওঁলোকৰ পৰিয়াললৈ আমাৰ গভীৰ কৃতজ্ঞতা আৰু শ্ৰদ্ধা জনাইছোঁ । ভাৰতৰ সেনাবাহিনীয়ে ভাৰতৰ ৰাষ্ট্ৰীয় নিৰাপত্তাৰ মূল শিলাস্তৰ হিচাপে থিয় দিছে, ভয়ংকৰ আৰু প্ৰত্যাহ্বানমূলক সীমা অতিক্ৰম কৰি সাহসেৰে আমাৰ সীমান্ত ৰক্ষা কৰি আছে । বাহ্যিক নিৰাপত্তা বজাই ৰখাৰ ক্ষেত্ৰত নিজৰ গুৰুত্বপূৰ্ণ ভূমিকাৰ বাহিৰেও সেনাই ধাৰাবাহিকভাৱে আভ্যন্তৰীণ নিৰাপত্তাৰ প্ৰত্যাহ্বান আৰু প্ৰাকৃতিক দুৰ্যোগৰ সময়ত অমূল্য সহায় আগবঢ়াই আহিছে ।”

ভাৰতীয় সেনাই আজি ৭৭ সংখ্যক সেনা দিৱস উদযাপন কৰিছে । ২০২৩ চনত ভাৰতীয় সেনাই “প্ৰযুক্তি শোষণৰ বছৰ” ঘোষণা কৰিছিল আৰু এতিয়া প্ৰতিৰক্ষা মন্ত্ৰণালয়ে ২০২৫ চনক ‘সংস্কাৰৰ বছৰ’ ঘোষণা কৰাৰ সৈতে সংগতি ৰাখি এই পদক্ষেপ আৰু এটা বছৰৰ বাবে বৃদ্ধি কৰিছে । এই প্ৰচেষ্টাসমূহ ভাৰতৰ প্ৰতিৰক্ষা ক্ষমতাক পুনৰ সংজ্ঞায়িত কৰাৰ লক্ষ্যৰে বহল “পৰিৱৰ্তনৰ দশক” (২০২৩-২০৩২)ৰ অংশ ।