MP Salary Hike: অধিসূচনা জাৰি, এবাৰতে ২৪ হাজাৰ টকা বৃৃদ্ধি পালে সাংসদৰ মহিলী দৰমহা, বাঢ়িল পেঞ্চন…

বৃদ্ধি পালে সাংসদসকলৰ দৰমহা । ইয়াৰ সমান্তৰালভাৱে বৃদ্ধি পালে সাংসদসকলৰ পেঞ্চন আৰু দৈনিক ভাট্টাও । সোমবাৰে সংসদীয় পৰিক্ৰমা মন্ত্ৰালয়ে জাৰি কৰা অধিসূচনা অনুসৰি, ২০২৩ চনৰ ১ এপ্ৰিলৰ পৰা কাৰ্যকৰী হোৱাকৈ কেন্দ্ৰই সংসদৰ সদস্যসকলৰ দৰমহা, ভাট্টা আৰু পেঞ্চন বৃদ্ধি কৰিছে।

লোকসভা আৰু ৰাজ্যসভাৰ সদস্যৰ দৰমহা বৰ্তমান ১ লাখ টকাৰ পৰা প্ৰতিমাহে ১.২৪ লাখ টকালৈ বৃদ্ধি কৰাৰ বিপৰীতে দৈনিক ভাট্টা পূৰ্বৰ ২০০০ টকাৰ পৰা ২৫০০ টকালৈ বৃদ্ধি কৰা হৈছে বুলি অধিসূচনাত উল্লেখ কৰা হৈছে। প্ৰাক্তন সাংসদসকলক প্ৰদান কৰা পেঞ্চনও বৰ্তমান ২৫ হাজাৰ টকাৰ পৰা মাহে ৩১ হাজাৰ টকালৈ বৃদ্ধি কৰা হৈছে বুলি অধিসূচনাত উল্লেখ কৰা হৈছে।

পাঁচ বছৰতকৈ অধিক সময় সেৱা আগবঢ়োৱা প্ৰতিগৰাকীৰ সাংসদৰ প্ৰতিটো বছৰৰ বাবে অতিৰিক্ত পেঞ্চন পূৰ্বৰ ২০০০ টকাৰ পৰা ২৫০০ টকালৈ বৃদ্ধি কৰা হৈছে বুলি অধিসূচনাত উল্লেখ কৰা হৈছে। সংসদৰ চলিত বাজেট অধিৱেশনৰ মাজতে সাংসদসকলৰ দৰমহা, ভাট্টা আৰু পেঞ্চনৰ পুনৰীক্ষণৰ কথা ঘোষণা কৰা হৈছে। বৰ্তমান আৰু প্ৰাক্তন সাংসদসকলক প্ৰদান কৰা দৰমহা আৰু ভাট্টাসমূহৰ পূৰ্বৰ পুনৰীক্ষণ ২০১৮ চনৰ এপ্ৰিল মাহত ঘোষণা কৰা হৈছিল। ২০১৮ চনত পুনৰীক্ষণত ঘোষণা কৰা এজন সাংসদৰ দৰমহা আছিল ১,০০,০০০ টকা।

২০১৮ চনৰ সংশোধনী অনুসৰি সাংসদসকলে সমষ্টি ভাট্টা হিচাপে ৭০ হাজাৰ টকাৰ ভাট্টা লাভ কৰে। ইয়াৰ উপৰিও সংসদীয় অধিৱেশনৰ সময়ত তেওঁলোকে প্ৰতিমাহে ৬০ হাজাৰ টকা আৰু দৈনিক ভাট্টা হিচাপে ২০০০ টকা লাভ কৰে। এই ভাট্টাও এতিয়া বৃদ্ধি কৰা হ’ব।

ইয়াৰ উপৰিও সাংসদসকলে বছৰি ফোন আৰু ইণ্টাৰনেট ব্যৱহাৰৰ বাবেও ভাট্টা লাভ কৰে। তেওঁলোকে নিজৰ আৰু পৰিয়ালৰ বাবে বছৰি ৩৪খন বিনামূলীয়া ঘৰুৱা বিমান সেৱা লাভ কৰে আৰু পেছাদাৰী আৰু ব্যক্তিগত ব্যৱহাৰৰ বাবে যিকোনো সময়তে প্ৰথম শ্ৰেণীৰ ৰে’ল সেৱা লাভ কৰে। সাংসদসকলে বছৰি ৫০ হাজাৰ বিনামূলীয়া ইউনিট বিদ্যুৎ আৰু ৪ হাজাৰ কিলোলিটাৰ পানীৰ সুবিধা লাভ কৰে।

তেওঁলোকৰ বাসগৃহ আৰু থকাৰ ব্যৱস্থাও চৰকাৰে চোৱাচিতা কৰে । পাঁচ বছৰীয়া কাৰ্যকালত সাংসদসকলক নতুন দিল্লীত ভাড়াবিহীন গৃহৰ ব্যৱস্থা কৰা হয়।