জম্মু-কাশ্মীৰত পুনৰ সন্ত্ৰাসবাদীৰ নৰসংহাৰ! বাসগৃহৰ ভিতৰতে সমাজকৰ্মীক গুলীয়াই হত্যা
পাকিস্তানে চলাই থকা নৃশংস কাৰ্যকলাপৰ বাবে সতৰ্ক হৈ আছে ভাৰতীয় সেনা। কুপৱাৰাত সংঘটিত গুলীচালনাৰ ঘটনাত সন্ত্ৰাসবাদীয়ে সমাজকৰ্মীজনকো ৰেহাই দিয়া নাছিল। ৪৫ বছৰীয়া গুলাম ৰছুল মাগ্ৰেক লক্ষ্য কৰি লোৱা হৈছিল। সন্ত্ৰাসবাদীৰ এই গুলীচালনাত তেওঁ আহত হয় আৰু চিকিৎসালয়তে মৃত্যু হয়।
বৰ্তমানো মাৰ যোৱা নাই জম্মু-কাশ্মীৰৰ পহলগামত সংঘটিত আক্ৰমণৰ চাঞ্চল্য। ইমানবোৰৰ পিছতো থমকি ৰোৱা নাই সন্ত্ৰাসবাদীৰ নৃশংস কাৰ্যকলাপ। জানিব পৰা মতে জম্মু-কাশ্মীৰৰ কুপৱাৰা জিলাত পুনৰ গুলীচালনা কৰে সন্দেহযুক্ত উগ্ৰপন্থীয়ে। এই আক্ৰমণত এজন ৪৫ বছৰীয়া সমাজ কৰ্মী আহত হয়। লগে লগে তেওঁক চিকিৎসালয়ত ভৰ্তি কৰোৱা হয় যদি মৃত্যুক সাৱটি লয় ব্যক্তিজনে।
বিষয়াসকলে জনোৱা মতে, শনিবাৰে নিশা কান্দি খাছৰ বাসগৃহৰ ভিতৰত সমাজ কৰ্মী গুলাম ৰছুল মাগ্ৰেৰ ওপৰত সন্ত্ৰাসবাদীয়ে গুলীচালনা কৰে। গুলীচালনাত গুলাম ৰছুল মাগ্ৰে আহত হয়, তাৰ পিছত তেওঁক লগে লগে চিকিৎসালয়লৈ লৈ যোৱা হয়, য’ত তেওঁৰ মৃত্যু হয়। কিন্তু সন্ত্ৰাসবাদীয়ে কিয় সামাজিক কৰ্মীজনক লক্ষ্য কৰি লৈছিল সেয়া এতিয়াও জানিব পৰা হোৱা নাই।
শেহতীয়াকৈ ২২ এপ্ৰিলত জম্মু-কাশ্মীৰৰ পহলগামত সংঘটিত হৈছিল ভয়ংকৰ আক্ৰমণ। এই আক্ৰমণত ২ জন বিদেশী পৰ্যটককে ধৰি ২৬ জন লোকে প্ৰাণ হেৰুৱালে। ইয়াৰ পিছত ভাৰতে পাকিস্তানৰ বিৰুদ্ধে ব্যৱস্থা গ্ৰহণ কৰিছে, য’ত এফালে ভিছা বাতিল কৰা হৈছে। আনহাতে, বহু সন্ত্ৰাসবাদীৰ ঘৰো ভাঙি পেলোৱা হৈছে। ইফালে পহলগাম সন্ত্ৰাসবাদী আক্ৰমণৰ পৰিপ্ৰেক্ষিতত উগ্ৰপন্থী আৰু তেওঁলোকৰ সমৰ্থকৰ বিৰুদ্ধে ব্যাপক অভিযান চলাইছে ভাৰতে। এই সমছোৱাত ভাঙি পেলোৱা হৈছে উগ্ৰপন্থীৰ ঘৰ , আত্মগোপন কৰা স্থানতো অভিযান চলোৱা হৈছে আৰু শ শ আণ্ডাৰগ্ৰাউণ্ড শ্ৰমিকক সোধা-পোছাৰ বাবে আটক কৰা হৈছে বুলি বিষয়াসকলে জনায়।
বিগত ৪৮ ঘণ্টাৰ ভিতৰত সন্ত্ৰাসবাদী বা তেওঁলোকৰ সহযোগীৰ ৬টা ঘৰ ভাঙি পেলোৱা হৈছে। সন্ত্ৰাসবাদী কাৰ্যকলাপৰ সৈতে জড়িত আন লোকৰ বিৰুদ্ধেও একেধৰণৰ ব্যৱস্থা গ্ৰহণ কৰা হ’ব বুলি সকীয়াই দিছে বিষয়াসকলে। বিষয়াসকলৰ মতে, ভাঙি পেলোৱা ঘৰবোৰৰ ভিতৰত ২০১৮ চনত পাকিস্তানত প্ৰশিক্ষণ লোৱা আৰু শেহতীয়াকৈ উপত্যকাত অনুপ্ৰৱেশ কৰা পুলৱামাৰ আহছান উল হকৰ ঘৰো আছে। শ্বোপিয়ানৰ লস্কৰ-ই-তৈবাৰ (লেট)ৰ জ্যেষ্ঠ অধিনায়ক শ্বাহিদ আহমদ কুট্টাই বছৰ বছৰ ধৰি ৰাষ্ট্ৰীয় বিৰোধী কাৰ্যকলাপত জড়িত আছিল আৰু কুলগামৰ জাকিৰ আহমদ ঘানীক সন্ত্ৰাসবাদী সম্পৰ্ক থকাৰ অভিযোগত ২০২৩ চনৰ পৰা চোৰাংচোৱাগিৰি কৰা হৈছে। এই আটাইকেইজন লোকৰ ঘৰত ব্যৱস্থা গ্ৰহণ কৰা হৈছে।
কুপৱাৰাৰ কালাৰুছ অঞ্চলৰ ফাৰুক আহমেদ টেডভা আৰু মিছকিন আহমেদ টেডভাৰ বাসগৃহৰ ক্ষেত্ৰটো উচিত ব্যৱস্থা গ্ৰহণ কৰা হৈছে বুলি বিষয়াসকলে জনায়। ইয়াৰ সমান্তৰালকৈ এলাৰ্ট মোডত আছে ভাৰতীয় সেনা। প্ৰতিমুহূৰ্ততে পাকিস্তানে চলাই থকা আক্রমণৰ প্ৰত্যুত্তৰ জনাইছে সেনাই৷
