বাংলাদেশত আৱদ্ধ হাজাৰ হাজাৰ কাশ্মীৰী ছাত্ৰ-ছাত্ৰী ! নিৰাপদে উদ্ধাৰ কৰিবলৈ বৈদেশিক মন্ত্ৰীক কাতৰ আহ্বান পৰিয়ালৰ

বাংলাদেশৰ প্ৰতিবাদ(প্ৰতীকী ফটো)

জ্বলি আছে বাংলাদেশৰ সংৰক্ষণ বিৰোধী জুই ! মনকৰিবলগীয়া বাংলাদেশৰ এই পৰিস্থিতিৰ মাজতে জম্মু-কাশ্মীৰৰ বহু ছাত্ৰ-ছাত্ৰীয়ে সাংঘাতিক ধৰণে বিপদৰ সন্মুখীন হৈছে । প্ৰকাশিত খবৰ বাংলাদেশলৈ পঢ়িবলৈ যোৱা বহু ছাত্ৰ-ছাত্ৰী ভাৰতলৈ ঘূৰি আহিছে যদিও এতিয়াও বহু ছাত্ৰ-ছাত্ৰী সেই দেশতে আছে ।

এনে পৰিস্থিতিত জম্মু-কাশ্মিৰৰ বহু পৰিয়ালে তেওঁলোকৰ সন্তান সকলক বাংলাদেশৰ পৰা নিৰাপদে উদ্ধাৰ কৰিবৰ বাবে বৈদেশিক মন্ত্ৰীক অনুৰোধ জনাইছে । প্ৰকাশিত খবৰ অনুসৰি বাংলাদেশৰ সংৰক্ষণ বিৰোধী প্ৰতিবাদত এতিয়ালৈকে ১০৫ জন লোক প্ৰাণ হেৰুৱাইছে । এই খবৰে সাংঘাতিক ধৰণে অশান্তি দিছে জম্মু-কাশ্মীৰৰ অভিভাৱক সকল।

জম্মু-কাশ্মীৰৰ বহু ছাত্ৰ-ছাত্ৰী ভাৰতলৈ উভতি আহিছে যদিও বহু ছাত্ৰ-ছাত্ৰী এতিয়াও বাংলাদেশতে আছে । এই ছাত্ৰ-ছাত্ৰী সকলৰ মাজৰ অধিকাংশই চিকিৎসা বিজ্ঞানৰ শিক্ষাৰ্থী বুলি জানিব পৰা গৈছে ।

আন্তঃৰাষ্ট্ৰীয় শান্তি আন্দোলনৰ সভাপতি ফৈয়াজ ভাটে কয় যে, বাংলাদেশৰ জম্মু-কাশ্মীৰৰ ছাত্ৰ-ছাত্ৰীৰ পৰা বহু সংখ্যক ফোন আহি আছে। তেওঁ কয় যে, দেশখনৰ পৰিস্থিতি অতি ভয়াৱহ আৰু বহু ছাত্ৰ-ছাত্ৰীৰ ইণ্টাৰনেট সংযোগ নাই । কাশ্মীৰত থকা পিতৃ-মাতৃৰ সৈতে কথা পাতিব পৰা নাই ছাত্ৰ-ছাত্ৰী সকলে । লগতে বিদেশ মন্ত্ৰী জয়শংকৰক ছাত্ৰ-ছাত্ৰীসকলৰ বাবে বিমানৰ ব্যৱস্থা কৰিবলৈ তেওঁ আহ্বান জনায়।

প্ৰকাশিত খবৰ অনুসৰি,বাংলাদেশত ৩৫০০ৰো অধিক কাশ্মীৰী ছাত্ৰ-ছাত্ৰীয়ে বিভিন্ন পাঠ্যক্ৰমত অধ্যয়ন কৰি আছে। লগতে সমগ্ৰ জম্মু-কাশ্মীৰৰ পৰা ৮০০০ৰো অধিক ছাত্ৰ-ছাত্ৰী বাংলাদেশত আছে। কিন্তু এই ঘটনাৰ বাবে পিতৃ-মাতৃয়ে তাত থকা নিজৰ সন্তানক লৈ চিন্তিত হৈ পৰিছে। অভিভাৱক সকলে ভাৰত চৰকাৰক কাশ্মীৰৰ ছাত্ৰ-ছাত্ৰীৰ সুৰক্ষা সুনিশ্চিত কৰিবলৈ আহ্বান জনাইছে।

জম্মু কাশ্মীৰ ছাত্ৰ সন্থাই কেন্দ্ৰীয় বৈদেশিক পৰিক্ৰমা মন্ত্ৰী ড০ এছ জয়শংকৰলৈ পত্ৰ প্ৰেৰণ কৰি কাশ্মীৰৰ  লগতে ভাৰতীৰ হাজাৰ হাজাৰ ছাত্ৰ-ছাত্ৰীৰ সুৰক্ষা নিশ্চিত কৰিবলৈ আহ্বান জনাইছে । এজন ছাত্ৰৰ অভিভাৱক তৌছিফ আহমেদে কয় যে, কঠিন পৰিস্থিতিত তাত আবদ্ধ হৈ থকা সকলো ছাত্ৰ-ছাত্ৰীক চৰকাৰে উদ্ধাৰ কৰাটো অতি প্ৰয়োজন।