RJDৰ নেতা লালু প্ৰসাদ যাদৱৰ স্বাস্থ্যৰ অৱনতি, সংকটজনক অৱস্থাত পাটনাৰ পৰাস হাস্পতালত ভৰ্তি
বিহাৰৰ প্ৰাক্তন মুখ্যমন্ত্ৰী তথা ৰাষ্ট্ৰীয় জনতা দলৰ নেতা লালু প্ৰসাদ যাদৱৰ স্বাস্থ্যৰ হঠাৎ অৱনতি ঘটিছে। পাটনাৰ পৰাস হাস্পতালত ভৰ্তি কৰোৱা হৈছে। তেওঁৰ ৰক্তচাপ অতি কম লগতে ৪০০ৰ ওপৰলৈ উঠিছে চুগাৰৰ মাত্ৰা।তেওঁৰ অৱস্থাৰ ওপৰত দৃষ্টি ৰাখিছে চিকিৎসকৰ দলটোৱে । ইফালে জ্যেষ্ঠ নেতাগৰাকীক এয়াৰ এম্বুলেন্সেৰে দিল্লীলৈ অনাৰ প্ৰস্তুতি চলোৱা হৈছে।
স্বাস্থ্যৰ অধিক অৱনতি ঘটিছে ৰাষ্ট্ৰীয় জনতা দলৰ নেতা তথা বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱৰ। দিল্লী এইমছত চিকিৎসাৰ পৰামৰ্শ প্ৰদান কৰে চিকিৎসৰ এটা দলে পাটনাৰ ৰাবৰি বাসগৃহত তেওঁৰ প্ৰাৰম্ভিক চিকিৎসা আৰম্ভ কৰে। লালুক ৪ বজাত দিল্লী অভিমুখে ৰাওনা হয়। তেওঁৰ সৈতে আছে পৰিয়ালৰ লোকে । এই সময়ছোৱাত যেতিয়া তেওঁৰ স্বাস্থ্যৰ অৱনতি ঘটে, তেতিয়া তেওঁক পাটনাৰ পৰাস চিকিৎসালয়ত ভৰ্তি কৰা হয়। লালুৰ ৰক্তচাপ যথেষ্ট হ্ৰাস পাইছে। সেই সময়ত বিমানেৰে লৈ যোৱাৰ অৱস্থাত নাছিল তেওঁ। সেই বাবে তেওঁক ততাতৈয়াকৈ পাৰসক চিকিৎসালয়লৈ লৈ যোৱা হয়। এতিয়া তেওঁক এয়াৰ এম্বুলেন্সেৰে দিল্লীলৈ অনাৰ প্ৰস্তুতি চলোৱা হৈছে।
দলীয় সূত্ৰৰ পৰা জানিব পৰা মতে, অৱস্থাৰ উন্নতি হ’লে লালু যাদৱক দিল্লীলৈ লৈ যোৱা হ’ব । বৰ্তমান চিকিৎসকৰ দলটোৱে বিপি আৰু চুগাৰ নিয়ন্ত্ৰণৰ চেষ্টা চলাইছে। সূত্ৰই জনোৱা মতে, RJDৰ নেতাগৰাকীৰ BP নিয়ন্ত্ৰণলৈ অহা নাই। চুগাৰ ৪০০ ৰ ওপৰত আছে বুলি জানিব পৰা গৈছে। ইয়াৰ উপৰিও ২৫ শতাংশতকৈ কমকৈ কাম কৰিছে কিডনিয়ে।
কোৱা হৈছে যে, এতিয়া লালু যাদৱক এয়াৰ এম্বুলেন্সেৰে দিল্লীলৈ অনাৰ প্ৰস্তুতি চলোৱা হৈছে। পূৰ্বে তেওঁ স্বাভাৱিক বিমানেৰে অহাৰ কথা আছিল যদিও তেওঁৰ সংকটজনক অৱস্থাৰ প্ৰতি লক্ষ্য ৰাখি এই সিদ্ধান্ত লোৱা হৈছে। সন্ধিয়া অথবা নিশালৈ এয়াৰ এম্বুলেন্সেৰে দিল্লীলৈ যাব পাৰিব লালু। প্ৰাক্তন মুখ্যমন্ত্ৰী লালু প্ৰসাদ যাদৱে বিগত কেইবছৰমানৰ পৰা গুৰুতৰ স্বাস্থ্যজনিত সমস্যাত ভুগি আছে। বৃক্ক সংৰোপণ আৰু অন্যান্য স্বাস্থ্যজনিত কাৰণত তেওঁক কেইবাবাৰো চিকিৎসালয়ত ভৰ্তি কৰোৱা হৈছিল।
কিডনী ট্ৰান্সপ্লাণ্ট: কন্যাই দিছিল নতুন জীৱন
২০২২ চনত লালুৱে বৃক্কৰ গুৰুতৰ সমস্যাৰ সন্মুখীন হ’বলগীয়া হৈছিল। চিকিৎসকৰ পৰীক্ষাত দেখা গৈছিল যে মাত্ৰ ২৫% বৃক্কই কাম কৰি আছে। এই পিছত কিডনী ট্ৰান্সপ্লাণ্টৰ পৰামৰ্শ দিয়া হৈছিল। তেওঁৰ কন্যা ৰোহিনী আচাৰ্যই তেওঁৰ এটা বৃক্ক দান কৰে। ২০২২ চনৰ ৫ ডিচেম্বৰত ছিংগাপুৰত বৃক্কৰ সফল প্ৰতিস্থাপন কৰা হৈছিল।
কেৱল ইমানে নহয় হৃদৰোগত আক্ৰান্ত লালু যাদৱ। ২০২১ চনত ৰাঁচীৰ বীৰছা মুণ্ডা কেন্দ্ৰীয় কাৰাগাৰত থকা সময়ত তেওঁৰ হৃদযন্ত্ৰৰ অৱস্থা ধৰা পৰিছিল। চিকিৎসকে বিশেষজ্ঞৰ পৰা চিকিৎসা ল’বলৈ পৰামৰ্শ দিয়ে। ইয়াৰ পিছত ২০২৩ চনৰ ছেপ্টেম্বৰ মাহত মুম্বাইৰ এখন চিকিৎসালয়ত তেওঁৰ এঞ্জিওপ্লাষ্টি কৰা হয়।
