মণিপুৰত ৰাষ্ট্ৰপতিৰ শাসন বলৱত কৰাত সংসদৰ অনুমোদন, অমিত শ্বাহে ক’লে-শান্তি প্ৰতিষ্ঠা কৰাটোৱেই চৰকাৰৰ প্ৰথম চিন্তা
ৱাকফ বিধেয়ক গৃহীত হোৱাৰ পিছতে মণিপুৰত ৰাষ্ট্ৰপতিৰ শাসন বলৱতৰ কথা নিশ্চিত কৰি কেন্দ্ৰীয় গৃহমন্ত্ৰী অমিত শ্বাহে লোকসভাত বিধিগত প্ৰস্তাৱ দাখিল কৰে। লোকসভাত সৰ্বসন্মতিক্ৰমে এই প্ৰস্তাৱত অনুমোদন জনোৱা হয়। অমিত শ্বাহে কয় যে, মণিপুৰত শান্তি প্ৰতিষ্ঠা কৰাটোৱেই চৰকাৰৰ প্ৰথম চিন্তা।
বুধবাৰে সন্ধিয়া মণিপুৰত ৰাষ্ট্ৰপতিৰ শাসন বলৱৎ হোৱাৰ কথা নিশ্চিত কৰি লোকসভাত গৃহীত হয় বিধিগত প্ৰস্তাৱ । ৱাকফ বিধেয়ক গৃহীত হোৱাৰ লগে লগে কেন্দ্ৰীয় গৃহমন্ত্ৰী অমিত শ্বাহে লোকসভাত এই প্ৰস্তাৱ দাখিল কৰে। যিখন বিধেয়ক সকলো সাংসদৰ সহযোগত অনুমোদন জনোৱা হয়। উচ্চতম ন্যায়ালয়ৰ সিদ্ধান্ত অনুসৰি দুমাহৰ ভিতৰত এই সন্দৰ্ভত সদনৰ অনুমোদনৰ বাবে বিধিগত প্ৰস্তাৱ আনিছে বুলি উল্লেখ কৰে শ্বাহে।
অমিত শ্বাহে লোকসভাত কয় যে, ১৩ ফেব্ৰুৱাৰীত মণিপুৰত ৰাষ্ট্ৰপতিৰ শাসন বলৱৎ কৰা হৈছিল। মণিপুৰৰ মুখ্যমন্ত্ৰীগৰাকীয়ে পদত্যাগ কৰাৰ পিছতে ৰাজ্যপালে বিধায়কসকলৰ সৈতে আলোচনাত মিলিত হয় আৰু সংখ্যাগৰিষ্ঠ সদস্যসকলে চৰকাৰ গঠনৰ স্থিতিত নাই বুলি উল্লেখ কৰে। ইয়াৰ পিছত কেবিনেটে ৰাষ্ট্ৰপতিৰ শাসনৰ পৰামৰ্শ দিয়ে, যিটো ৰাষ্ট্ৰপতিয়ে গ্ৰহণ কৰে। মণিপুৰত শান্তি প্ৰতিষ্ঠা কৰাটোৱেই চৰকাৰৰ প্ৰথম চিন্তা বুলিও তেওঁ কয়।
কেন্দ্ৰীয় গৃহমন্ত্ৰী অমিত শ্বাহে লগতে কয়,” উচ্চ ন্যায়ালয়ৰ সিদ্ধান্তৰ পাছত মণিপুৰৰ দুটা জনগোষ্ঠীৰ মাজত সংৰক্ষণ সন্দৰ্ভত বিবাদৰ সৃষ্টি হৈছিল। যিয়ে পাছৰ পৰ্যায়ত জাতিগত হিংসাৰ ৰূপ লয়। সকলো সদস্যই এই সন্দৰ্ভত গভীৰ উদ্বেগ প্ৰকাশ কৰিছে।” তেওঁ কয় , “পুনৰ্বাসনৰ বাবে পদক্ষেপ লোৱা উচিত। গোচৰসমূহৰ ন্যায়িক তদন্ত হ’ব লাগে আৰু তেওঁলোকে সহ্য কৰিবলগীয়া হোৱা দুখ-কষ্টৰ ক্ষতিপূৰণ দিব লাগে।” শ্বাহে কয় যে, চৰকাৰে শান্তি প্ৰতিষ্ঠা কৰিবলৈ চেষ্টা চলাইছে।
#WATCH | Union Home Minister Amit Shah moves statutory resolution regarding President’s Rule in Manipur, in Lok Sabha
Speaking over the same, Union Home Minister Amit Shah says, “For the past four months, there has been no violence in Manipur…I will not say the situation in… pic.twitter.com/yHdiEM9GJO
— ANI (@ANI) April 2, 2025
তেওঁ কয়, “যোৱা চাৰিমাহ ধৰি মণিপুৰত কোনো ধৰণৰ হিংসাত্মক ঘটনা সংঘটিত হোৱা নাই। খাদ্য-পানীয়ৰ কথা ক’বলৈ গ’লে ইয়াৰ ব্যৱস্থা ইতিমধ্যে নিশ্চিত কৰা হৈছে। খাদ্য আৰু ঔষধৰ সুবিধাৰ লগতে পঢ়া-শুনাৰ অনলাইন ব্যৱস্থা কৰা হৈছে।” তেওঁ আৰু কয়, “জাতিগত হিংসা যেতিয়া সংঘটিত হয়, তেতিয়া এই সকলোবোৰ প্ৰশ্নৰ উত্থান ঘটে। কিন্তু ইয়াক দলৰ লগত সংযুক্ত কৰা উচিত নহয়। আপোনাৰ শাসনকালত হিংসা বেছি আছিল আৰু আমাৰ সময়ত কম বুলি মই ক’ব নোৱাৰো, কিন্তু হিংসা একেবাৰেই হ’ব নালাগে।”
কেন্দ্ৰীয় মন্ত্ৰীগৰাকীয়ে কয়, “ইয়াৰ পূৰ্বেও মণিপুৰত বহু বৃহৎ জাতিগত হিংসা সংঘটিত হৈছিল। কিন্তু এনে এখন ছবি সৃষ্টি হৈছে যে. বিজেপিৰ বাবেই এনেকুৱা হৈছে। কংগ্ৰেছৰ দিনত মণিপুৰত তিনিটা বৃহৎ হিংসা সংঘটিত হৈছিল যদিও তেওঁলোকৰ প্ৰধানমন্ত্ৰীয়ে কেতিয়াও ৰাজ্য ভ্ৰমণ কৰা নাছিল। বিজেপি চৰকাৰ অহাৰ আগতে ২১২ দিন মণিপুৰ বন্ধ হৈ আছিল যদিও আমাৰ শাসন কালত এনে হোৱা নাছিল।” তেওঁ কয়, “মণিপুৰৰ পৰিস্থিতি সন্তোষজনক বুলি নকওঁ, কিন্তু নিয়ন্ত্ৰণত আছে। উত্তৰ-পূব ৰাজ্যখনত স্থায়ী সমাধানৰ বাবে অতি সোনকালে দুয়োটা সম্প্ৰদায়ৰ বৈঠক আহ্বান কৰিব মন্ত্ৰালয়ে।”
