মণিপুৰৰ শান্তি পুনৰুদ্ধাৰৰ প্ৰচেষ্টা! দিল্লীত মেইটেই, কুকি আৰু নগা সম্প্ৰদায়ৰ গুৰুত্বপূৰ্ণ বৈঠক সম্পন্ন

দিল্লীত মেইটেই, কুকি আৰু নগা সম্প্ৰদায়ৰ গুৰুত্বপূৰ্ণ বৈঠক সম্পন্ন

প্ৰায় ১৭ মাহ পূৰ্বে জাতিগত হিংসাৰ সূত্ৰপাত হোৱাৰ পাছত মণিপুৰত শান্তি পুনৰুদ্ধাৰৰ প্ৰচেষ্টা তীব্ৰতৰ কৰা হৈছে। প্ৰথমবাৰৰ বাবে গৃহ মন্ত্ৰালয়ৰ আবেদনত মেইটেই, কুকি আৰু নাগা সম্প্ৰদায়ৰ বিধায়কসকল মিলিত হৈছে দিল্লীত। গৃহ মন্ত্ৰালয়ৰ মধ্যস্থতাকাৰী এ.কে. মিশ্ৰ আৰু অন্যান্য জ্যেষ্ঠ বিষয়াসকলও গুৰুত্বপূৰ্ণ বৈঠকত উপস্থিত আছিল। হিংসাত্মক পৰিস্থিতিৰ পাছত প্ৰথমবাৰৰ বাবে মিলিত হৈছে বৈঠকত।

প্ৰায় চাৰি ঘণ্টা ধৰি চলি থকা এই বৈঠকৰ ফলাফল সম্পৰ্কে এতিয়ালৈকে কোনো স্পষ্ট তথ্য প্ৰকাশ কৰা নাই। বৈঠকত বিজেপি নেতা সম্বিত পাত্ৰও উপস্থিত আছিল।

গৃহমন্ত্ৰীৰ সৈতে আলোচনা

সূত্ৰৰ পৰা পোৱা তথ্য অনুসৰি, গৃহ মন্ত্ৰালয়ে সকলো বিধায়ক আৰু মন্ত্ৰীক পত্ৰ আৰু টেলিফোন কলৰ জৰিয়তে বৈঠকত উপস্থিত থাকিবলৈ আমন্ত্ৰণ জনাইছিল। গৃহমন্ত্ৰী অমিত শ্বাহে মণিপুৰত শান্তি স্থাপনৰ বাবে মেইটেই আৰু কুকি সম্প্ৰদায়ৰ মাজত আলোচনাৰ প্ৰয়োজন বুলি কোৱাৰ প্ৰায় এমাহ পাছত লোৱা হৈছে এই পদক্ষেপ । তেওঁ আশ্বাস দিছিল যে কেন্দ্ৰীয় চৰকাৰে দুয়োটা গোটৰ সৈতে আলোচনা কৰি আছে। এই মন্তব্যৰ পাছতে এই বৈঠক অনুষ্ঠিত কৰা হৈছে।

এতিয়ালৈকে ২২০ৰো অধিক লোক নিহত

যোৱা বছৰ মে’ মাহত মণিপুৰত জাতিগত হিংসাৰ সূত্ৰপাত হৈছিল যেতিয়া কুকি সম্প্ৰদায়ে মেইটেই সম্প্ৰদায়ক অনুসূচীত জনজাতিৰ মৰ্যাদা প্ৰদানৰ বিৰুদ্ধে প্ৰতিবাদ কৰিবলৈ ৰাজ্যখনৰ পাহাৰীয়া অঞ্চলসমূহত জনজাতীয় একতা সমদল উলিয়াইছিল। তেতিয়াৰ পৰা এই সময়লৈ চলি থকা হিংসাত্মক ঘটনাত নিৰাপত্তাকৰ্মী আৰু কুকি আৰু মেইটেই সম্প্ৰদায়কে ধৰি ২২০ জনৰো অধিক লোক নিহত হৈছে। কুকি বিধায়কসকলে বৈঠকত মণিপুৰৰ জনজাতীয় লোকসকলৰ বাবে পৃথক প্ৰশাসন বা কেন্দ্ৰীয় শাসিত অঞ্চলৰ দাবী সম্পৰ্কে দোহাৰে। শেহতীয়াকৈ অনুষ্ঠিত বিধানসভা অধিৱেশনত বিজেপিৰ ৭জনকে ধৰি ১০জন কুকি বিধায়ক উপস্থিত নাছিল।