তুৰষ্কৰ পৰা টকা আহিছিল বংগলৈ! উচ্চ ন্যায়ালয়ত ভয়ংকৰ অভিযোগ অধিবক্তাৰ

প্ৰতীকী ছবি

ইটোৰ পিছত জ্বলিছে সিটো ঘৰ । বেটবোনা, জাফনাবাদৰ দৰে গাঁওবোৰ চকুৰ সমুখতে যেন নোহোৱা হৈ পৰিছে । বহুতৰে এতিয়াও ঘৰলৈ উভতি যোৱাৰ সাহস হোৱা নাই । মুৰ্শিদাবাদৰ হিংসাৰ সন্দৰ্ভত কলিকতা উচ্চ ন্যায়ালয়ত চাৰিটা গোচৰ ৰুজু হৈছিল । বৃহস্পতিবাৰে ন্যায়াধীশ সৌমেন সেন আৰু ন্যায়াধীশ ৰাজা বসু চৌধুৰীৰ বিচাৰপীঠে শুনানি গ্ৰহণ কৰে ।

শুনানিৰ সময়ত ৰাজ্যৰ আৰক্ষীৰ ব্যৰ্থতাকে ধৰি ইটোৰ পিছত সিটো অভিযোগ উত্থাপন হৈছিল চৰকাৰৰ বিৰুদ্ধে । কেন্দ্ৰীয় সংস্থা এন আই এৰ জৰিয়তেও এই বিষয়টোৰ তদন্ত কৰিবলৈ দাবী জনোৱা হৈছে আদালতক । সকলো ফটো আৰু ভিডিঅ’ উচ্চ ন্যায়ালয়ত জমা দিয়া হৈছে । কেন্দ্ৰৰ প্ৰতিবেদনো দাখিল কৰা হৈছে ।

অধিবক্তাৰ ভাষ্য-

সংবাদ মাধ্যমৰ কোনো লোকক ৰেহাই দিয়া হোৱা নাছিল বুলি দাবী কৰিছে অধিবক্তাগৰাকীয়ে । ইউএপিএ আইন কাৰ্যকৰী কৰাটো প্ৰয়োজন । অধিবক্তাগৰাকীয়ে লগতে উল্লেখ কৰে যে সংস্থাটোৱে জানিব পাৰিছে যে বাংলাদেশী অপৰাধীয়ে এই আক্ৰমণ সংঘটিত কৰিছে । আন এক গুৰুত্বপূৰ্ণ অভিযোগ অনুসৰি, ‘তুৰ্কিৰ পৰা বংগলৈ টকা আহিছিল ।’

ইমামসকলৰ এনে কেতবোৰ ভিডিঅ’ দেখা গৈছে, য’ত তেওঁলোকে মুকলিকৈ আন্দোলন অব্যাহত ৰখাৰ কথা কৈছে আৰু ভাবুকি দিছে বুলি অভিযোগ অধিবক্তাৰ । শান্তিপূৰ্ণ প্ৰতিবাদৰ নামত প্ৰতিবাৰেই এই কাম চলি থাকিব নোৱাৰে বুলি উল্লেখ কৰি অধিবক্তাই কয় ৰাজ্য চৰকাৰে কোনো ধৰণৰ গতিবিধিৰ অনুমতি দিব নালাগে, কেন্দ্ৰীয় বাহিনী মোতায়েন কৰিব লাগে । অধিবক্তা অনিন্দ্য সুন্দৰ দাসে কয় যে, ইয়াৰ পূৰ্বেও একেই কাণ্ড সংঘটিত হৈছে । ৰাষ্ট্ৰপতিৰ শাসন আৰোপ কৰি লাগে ।

কেন্দ্ৰৰ দাবী কি?

কেন্দ্ৰৰ প্ৰতিবেদন আদালতত দাখিল কৰা হয় । অতিৰিক্ত চ’লিচিটৰ জেনেৰেল অশোক চক্ৰৱৰ্তীয়ে কেন্দ্ৰীয় বাহিনী নিয়োগৰ সময়সীমা বৃদ্ধি কৰিবলৈ দাবী জনায় । তেওঁ আৰু কয়, “কোনো ধৰণৰ বোমা বিস্ফোৰণ হ’লে গৃহ মন্ত্ৰালয়ৰ হাতত এন আই এৰ তদন্তৰ নিৰ্দেশ দিয়াৰ ক্ষমতা আছে । সেই অনুসৰি আমাক অনুমতি দিয়া উচিত ।”

মুৰ্ছিদাবাদকে ধৰি আন ঠাইতো একেধৰণৰ আক্ৰমণৰ ভাবুকি আছে বুলি দাবী কৰি কেন্দ্ৰই অশান্ত অঞ্চলত বাহিনী নিয়োগ কৰাৰ কৰ্তৃত্ব থকা বুলি উল্লেখ কৰিছে । ন্যায়াধীশ সৌমেন সেনে কয় যে ৰাজ্য চৰকাৰৰ সৈতে সহযোগিতাৰ অৰ্থ এইটো নহয় যে বি এছ এফৰ ক্ষমতা হ্ৰাস পাইছে । এন আই এয়ে কয়, “আমাক নিৰ্দেশ দিলে প্ৰথম অৱস্থাত প্ৰতিবেদন দিব পাৰো । কেন্দ্ৰ বা আদালতৰ অনুমতি অবিহনে আমি নিজাববীয়াকৈ একো কৰিব নোৱাৰোঁ ।”

ৰাজ্য চৰকাৰে কি কয়?

উৰাবাতৰিৰ প্ৰচাৰ বন্ধ কৰিবলৈ ইণ্টাৰনেট সেৱা বন্ধ কৰি দিয়া বুলি চৰকাৰী পক্ষই কয় । জংগীপুৰত আৰক্ষী নিয়োগ কৰাৰ দুদিন পিছতো কোনো সমস্যা হোৱা নাছিল বুলিও চৰকাৰী পক্ষই জানিবলৈ দিয়ে । ইমামসকলৰ সৈতে এখন বৈঠক অনুষ্ঠিত কৰি শান্তি বজাই ৰাখিবলৈ আহ্বান জনোৱা হৈছে । ৰাজ্যিক পক্ষৰ অধিবক্তাগৰাকীয়ে আৰু কয় যে ৰাজ্যৰ কৰ্তব্য পালন কৰা হৈছে ।

ৰাজনৈতিক নেতাই উচটনিমূলক বক্তব্য দিয়া বুলি অভিযোগ উত্থাপন কৰিছে ৰাজ্যিক পক্ষৰ অধিবক্তাই । অৱশ্যে তেওঁৰ প্ৰশ্ন হ’ল যেতিয়া কেন্দ্ৰীয় আইনৰ বিৰুদ্ধে আন্দোলন হ’ব তেতিয়া তেওঁলোকে কিয় আহি নিয়ন্ত্ৰণ কৰিব ? এয়া বেআইনী নহয় নেকি ?