এই ৰাজ্যত বন্ধ হ’ব অ’লা, উবেৰ, ৰেপিড’ সেৱা, উচ্চ ন্যায়ালয়ৰ নিৰ্দেশ…

অ’লা, উবেৰ, ৰেপিড’ ব্যৱহাৰকাৰীসকলৰ বাবে বেয়া খবৰ। কিয়নো ন্যায়ালয়ে আৰোপ কৰিছে নিষেধাজ্ঞা। কৰ্ণাটক উচ্চ ন্যায়ালয়ে বুধবাৰে এপ ভিত্তিক ৰাইড-হেলিং চাৰ্ভিছেচক বাইক আৰু টেক্সি সেৱা বন্ধ কৰাৰ নিৰ্দেশ জাৰি কৰে। তেওঁলোকে যাতে নিজৰ সেৱা সম্পূৰ্ণৰূপে বন্ধ কৰিব পাৰে তাৰ বাবে ৬ সপ্তাহৰ সময় বান্ধি দিয়ে। ন্যায়ালয়ৰ এই সিদ্ধান্তৰ পাছতেই বাইক-টেক্সি সেৱাৰ বিষয়াসকলে জানিবলৈ দিয়ে যে তেওঁলোকে এই সিদ্ধান্তৰ বিৰুদ্ধে আবেদন দাখিল কৰিব।

ন্যায়াধীশ বি এম শ্যাম প্ৰসাদে কয় যে, যেতিয়ালৈকে ৰাজ্য চৰকাৰে মটৰ বাহন আইন ১৯৮৮ৰ ৯৩ নং ধাৰাত নিয়ম প্ৰণয়ন নকৰে তেতিয়ালৈকে বাইক-টেক্সি চলিব নোৱাৰিব। উল্লেখ কৰা প্ৰয়োজন যে, ৰেপিড’, উবেৰ, অ’লাই  চৰকাৰক এগ্ৰিগেটৰ লাইচেন্স জাৰি আৰু বাইক-টেক্সিক পৰিবহন সেৱাত পঞ্জীয়ন কৰাৰ দাবী কৰিছিল। এই সন্দৰ্ভত তেওঁলোকে দাখিল কৰা আবেদনৰ ভিত্তিত এই নিৰ্দেশ দিয়া হৈছে।

২০২১ চনৰ জুলাই মাহত কৰ্ণাটক চৰকাৰে বাইক টেক্সি সেৱাত নিষেধাজ্ঞা আৰোপ কৰি এক নিৰ্দেশনা জাৰি কৰিছিল। পৰৱৰ্তী সময়ত ইয়াৰ বিৰুদ্ধে ৰেপিড’, উবেৰ আৰু অ’লাই উচ্চ ন্যায়ালয়ত আবেদন দাখিল কৰিছিল। শুনানিৰ সময়ত উচ্চ ন্যায়ালয়ে অস্থায়ী ৰূপে চৰকাৰক এই প্লেটফৰ্মৰ ওপৰত তদন্ত কৰাত বাধা আৰোপ কৰিছিল।

বুধবাৰে ন্যায়াধীশ শ্যাম প্ৰসাদে ছয় সপ্তাহৰ ভিতৰত প্লেটফৰ্মসমূহৰ কাম-কাজ বন্ধ কৰিবলৈ নিৰ্দেশ দিয়ে। ন্যায়ালয়ে এই নিৰ্ধাৰিত সময়ত ভিতৰত তেওঁলোকৰ সকলো কাম সম্পূৰ্ণ ৰূপে বন্ধ কৰিবলৈ ৰাজ্য চৰকাৰক নিৰ্দেশ জাৰি কৰে।  কৰ্ণাটক উচ্চ ন্যায়ালয়ৰ এই সিদ্ধান্তক আদৰণি জনাইছে ৰাজ্যখনৰ পৰিবহণ মন্ত্ৰী ৰামালিংগা ৰেড্ডীয়ে। তেওঁ কয় যে চৰকাৰক উপযুক্ত নিয়ম প্ৰণয়নৰ বাবে তিনি মাহৰ সময় দিয়া হৈছে। তেওঁ কয় যে এপ ভিত্তিক প্লেটফৰ্মসমূহ কোনো নিয়ম অবিহনে চলি আছে, যাৰ ফলত এই সেৱাসমূহ ব্যৱহাৰ কৰা লোকসকলৰ সুৰক্ষাৰ প্ৰতি উদ্বেগ প্ৰকাশ পাইছে।

ইয়াৰ বিপৰীতে ৰাইড-হেলিং কোম্পানী এটাৰ এজন জ্যেষ্ঠ বিষয়াই কয় যে – “আমি এই আদেশৰ বিৰুদ্ধে আবেদন কৰিম। ইতিমধ্যে কেন্দ্ৰীয় চৰকাৰে স্পষ্ট কৰি দিছে যে মটৰ চাইকেল ঠিকাভিত্তিক গাড়ীৰ সংজ্ঞাৰ অন্তৰ্গত, যি মটৰ গাড়ী আইনৰ অধীনত বৈধ”। যদিও কেন্দ্ৰীয় চৰকাৰে বাইক টেক্সিৰ অনুমতি দিয়ে, তথাপিও পৰিবহণ ৰাজ্যৰ বিষয় আৰু ইয়াৰ আইনী মৰ্যাদা নিৰ্ণয় কৰাৰ অধিকাৰ ৰাজ্য চৰকাৰৰ।