অগ্নিগৰ্ভা বাংলাদেশ এৰি ভাৰতলৈ উভতিল ৩০০ ৰো অধিক ছাত্ৰ-ছাত্ৰী

বাংলাদেশৰ সংৰক্ষণ বিৰোধী আন্দোলনে অতি হিংসাত্মক ৰূপ ধাৰণ কৰিছে । ইয়াৰ পৰিপ্ৰেক্ষিত জাৰি কৰা হৈছে কাৰ্ফিউ, বন্ধ হৈ পৰিছে ইণ্টাৰনেট সেৱা । প্ৰকাশিত খবৰ অনুসৰি, এতিয়ালৈকে এই আন্দোলনত প্ৰায় ১০৫ জন লোকে প্ৰাণ হেৰুৱাইছে । এই আন্দোলনৰ ফলস্বৰূপে ছাত্ৰ-ছাত্ৰীৰ লগতে সাধাৰণ লোকৰ মাজত আতংকই বিৰাজ কৰিছে ।

উল্লেখ্য যে, শিক্ষা গ্ৰহণৰ উদ্দেশ্যে বহু ভাৰতীয় ছাত্ৰ-ছাত্ৰী এতিয়াও বাংলাদেশত আছে আৰু এই ছাত্ৰ-ছাত্ৰী সকলে এই সময়ছোৱাত নিৰাপত্তাহীনতাত ভুগিছে বুলি খবৰ প্ৰকাশ পাইছে । দেশখনৰ এই বিশৃংখল পৰিস্থিতিৰ পৰা হাত সাৰিবলৈ যিকোনো প্ৰকাৰে দেশলৈ উভতি আহিবলৈ বাধ্য হৈছে ছাত্ৰ-ছাত্ৰী সকল । প্ৰকাশিত খবৰৰ অনুসৰি, যোৱা শুকুৰবাৰে ৩০০ৰো অধিক ভাৰতীয় ছাত্ৰ-ছাত্ৰীয়ে উত্তৰ-পূব সীমান্ত পাৰ হৈ ভাৰতত উপস্থিত হৈছে ।

বাংলাদেশত অব্যাহত থকা সংৰক্ষণ বিৰোধী আন্দোলনত ছাত্ৰ-ছাত্ৰীৰ লগতে সাধাৰণ মানুহে যোগদান কৰিছে । ইফালে এই আন্দোলনৰ সময়ত সৃষ্টি হোৱা বিশৃংখলতা ৰোধ কৰিবলৈ বাংলাদেশ চৰকাৰে সেনাবাহিনী মোতায়েন কৰিবলৈ বাধ্য হৈছে । সমান্তৰালভাৱে নিৰাপত্তাৰক্ষীৰ লগত প্ৰতিবাদকাৰীৰ সংঘৰ্ষত নিহত লোকৰ সংখ্যা বৃদ্ধি পাবলৈ ধৰিছে ।

প্ৰকাশিত খবৰ অনুসৰি, সংৰক্ষণ ব্যৱস্থা বিৰোধ কৰি ঢাকা বিশ্ববিদ্যালয়ত এক উত্তপ্ত পৰিস্থিতি সৃষ্টি হৈছিল । ইয়াৰ পাছতে আৰক্ষীৰ গুলীত ৬ জন লোক নিহত হয় । এই ঘটনা কেন্দ্ৰ কৰি চৰকাৰে দেশখনৰ সকলো শিক্ষানুষ্ঠান বন্ধ কৰাৰ নিৰ্দেশ দিয়ে। শুকুৰবাৰে হাছিনাৰ চৰকাৰে সমগ্ৰ দেশতে সান্ধ্য আইন জাৰি কৰে আৰু বন্ধ কৰে ইণ্টাৰনেট সেৱা । ইয়াৰ সমান্তৰালভাৱে মোতায়েন কৰা হৈছে সেনা বাহিনী ।

উল্লেখ্য যে, শিক্ষাগ্ৰহণৰ বাবে বাংলাদেশলৈ যোৱা ভাৰতৰ অধিকাংশ ছাত্ৰ-ছাত্ৰীয়ে চিকিৎসা বিজ্ঞানৰ বুলি জানিব পৰা গৈছে । জানিব পৰা মতে, বাংলাদেশৰ পৰা ত্ৰিপুৰাৰ সীমান্ত আৰু মেঘালয়ৰ সীমান্তৰে ভাৰতলৈ উভতি আহিছে ছাত্ৰ-ছাত্ৰীসকল। বাংলাদেশত চিকিৎসা বিজ্ঞানৰ শিক্ষাগ্ৰহণৰ বাবে যোৱা এই ছাত্ৰ-ছাত্ৰী সকল মূলতঃ উত্তৰ প্ৰদেশ, হাৰিয়ানা, মেঘালয়, জম্মু-কাশ্মীৰৰ ।