ভাৰতৰ বাবে বন্ধ পাকিস্তানৰ আকাশমাৰ্গ, কোন পথেৰে বিদেশলৈ যাব ভাৰতীয় বিমান, কি প্ৰভাৱ পৰিব বিমান সেৱাত?

জম্মু-কাশ্মীৰৰ পহলগামত নিৰীহ পৰ্যটকৰ ওপৰত সন্ত্ৰাসবাদী আক্ৰমণৰ পিছত ভাৰত আৰু পাকিস্তানৰ মাজত উত্তেজনা ক্ৰমাগতভাৱে বৃদ্ধি পাইছে । ভাৰতে সাময়িকভাৱে স্থগিত ৰাখিলে সিন্ধু জল চুক্তি । ভাৰতত থকা পাকিস্তানী নাগৰিকক দেশ এৰিবলৈ দিয়া হৈছে নিৰ্দেশ । পাকিস্তানো মনে মনে বহি থকা নাই । যুদ্ধৰ বাবে যেন সাজু হৈছে পাক বাহিনী । সাজু ভাৰতো । এতিয়া পাকিস্তান চৰকাৰে ভাৰতীয় বিমান সংস্থাৰ বাবে নিজৰ আকাশমাৰ্গ বন্ধ কৰি দিছে । পাকিস্তানৰ আকাশমাৰ্গৰ মাজেৰে পাৰ হৈ যোৱা ভাৰতীয় বিমান কোনবোৰ দেশলৈ যায়? এতিয়া এই বিমানবোৰ ক’ৰ পৰা যাব? দূৰত্ব কিমান বাঢ়িব আৰু ভাড়া কিমান বাঢ়িব?

এয়া চৌদি আৰৱৰ বাবে এটা বিকল্প হ’ব পাৰে
পাকিস্তানৰ আকাশমাৰ্গ বন্ধ হোৱাৰ বাবে ভাৰতৰ পৰা অন্য দেশলৈ যোৱা বিমানে এতিয়া আন এটা পথ ব্যৱহাৰ কৰিব লাগিব, যিটো অধিক দীঘলীয়া হ’ব । চৌদি আৰব, ইউ এ ই, ওমান আৰু কাটাৰৰ দৰে উপসাগৰীয় দেশসমূহৰ বাবে পাকিস্তানৰ মাজেৰে যোৱা বিমান পথটো চুটি । পাকিস্তানে নিজৰ আকাশমাৰ্গ বন্ধ কৰাৰ বাবে এয়াৰ ইণ্ডিয়া, ইণ্ডিগ’ৰ দৰে সকলো ভাৰতীয় বিমান সংস্থাই উত্তৰ আমেৰিকা, ব্ৰিটেইন, ইউৰোপ, আৰু মধ্যপ্ৰাচ্যলৈ দীঘলীয়া পথৰে বিমান সেৱা আগবঢ়াব লাগিব । অৰ্থাৎ বিমানক অধিক ইন্ধনৰ প্ৰয়োজন হ’ব । বিমানৰ ক্ৰুৱে অধিক সময় কাম কৰিব লাগিব ।

যদি কোনো ভাৰতীয় বিমান ভাৰতৰ পৰা চৌদি আৰবলৈ উৰা মাৰে তেন্তে পাকিস্তান হৈ কম সময়তে তাত উপস্থিত হয় । পাকিস্তানৰ আকাশমাৰ্গ বন্ধ হোৱাৰ বাবে ভাৰতীয় বিমান এতিয়া অন্য এটা পথেৰে চৌদি আৰৱলৈ যাব লাগিব । ইয়াৰ বাবে যথেষ্ট ব্যয়বহুল হ’ব পাৰে বিমান যাত্ৰা, কিয়নো বিমানখনে বহু দূৰ যাত্ৰা কৰিব লাগিব । ইয়াৰ বাবে এটা বিকল্প হ’ল ভাৰতীয় বিমান এতিয়া আৰব সাগৰৰ মাজেৰে মুম্বাইৰ পৰা চৌদি আৰৱলৈ উৰা মাৰিব লাগিব ।

ইৰাণ হৈ আফগানিস্তানলৈ উৰা মাৰিব পাৰিব
যদি কোনো ভাৰতীয় বিমান আফগানিস্তানৰ কাবুলৰ পৰা দিল্লীলৈ উৰা মাৰে, তেন্তে এতিয়া সেইখনো পাকিস্তান হৈ নাযায় । সেই বিমানখনে কাবুলৰ পৰা ইৰাণলৈ আৰু তাৰ পিছত আৰব সাগৰৰ ওপৰেৰে দিল্লীলৈ যাব লাগিব । এইটো স্পষ্ট যে আপুনি যদি অধিক দূৰত্ব যাত্ৰা কৰে তেন্তে বিমান সংস্থাসমূহৰ খৰচ বৃদ্ধিয়েই নহয়, বিমান যাত্ৰাৰ সময়ো বৃদ্ধি পাব ।

স্পষ্টভাৱে বিমান সংস্থাসমূহে যাত্ৰীসকলৰ ওপৰত এই বোজা জাপি দিব । একেদৰে ভাৰতৰ পৰা ইউৰোপলৈ যোৱা বিমানসমূহেও অধিক দূৰত্ব অতিক্ৰম কৰিব লাগিব আৰু বিমানৰ দূৰত্ব ৯১৩ কিলোমিটাৰ বৃদ্ধি পাব । এনে পৰিস্থিতিত ইউৰোপ পোৱাৰ সময়ো দুঘণ্টা বৃদ্ধি পাব ।

উত্তৰ ভাৰতৰ পৰা পশ্চিমীয়া দেশলৈ বিমান সেৱাত অধিক প্ৰভাৱ
বিশেষজ্ঞসকলে কয় যে পাকিস্তানৰ আকাশমাৰ্গ বন্ধ হোৱাৰ ফলত উত্তৰ ভাৰতৰ পৰা পশ্চিম দিশলৈ বিশেষকৈ পশ্চিমীয়া দেশলৈ বিমান সেৱাৰ ক্ষেত্ৰত সৰ্বাধিক প্ৰভাৱ পৰিব । দিল্লী, জয়পুৰ, লক্ষ্ণৌ, চণ্ডীগড়, অমৃতসৰৰ দৰে বহু চহৰৰ পৰা আমেৰিকা, ইউৰোপ আৰু পশ্চিম এছিয়ালৈ বিমান সেৱাত প্ৰভাৱ পৰিব । ইয়াৰ পৰা যাত্ৰা কৰা বিমানসমূহে এতিয়া প্ৰথমে গুজৰাট বা মহাৰাষ্ট্ৰৰ ফালে ঘূৰি তাৰ পিছত আৰব সাগৰৰ ওপৰেৰে উৰা মাৰিব লাগিব । ইয়াৰ বাবে বিমান যাত্ৰাৰ সময় ৭০ৰ পৰা ৮০ মিনিট বৃদ্ধি পাব ।

কেৱল ভাৰতেই নহয়, পাকিস্তানো লোকচানৰ সন্মুখীন হ’ব
২০১৯ চনত যেতিয়া ভাৰতে কাশ্মীৰৰ পৰা ৩৭০ অনুচ্ছেদ আঁতৰাইছিল, তেতিয়াও পাকিস্তানে নিজৰ আকাশমাৰ্গ বন্ধ কৰি দিছিল । এক হিচাপ অনুসৰি সেই সময়ত ইণ্ডিয়ান এয়াৰলাইন্সৰ লোকচান হৈছিল প্ৰায় ৭০০ কোটি টকা । ইয়াৰ বাবে যাত্ৰীসকলে অধিক দামত টিকট কিনিবলগীয়া হৈছিল । ইণ্ডিয়ান এক্সপ্ৰেছত প্ৰকাশিত এক প্ৰতিবেদন অনুসৰি পাকিস্তানে জাৰি কৰা নিষেধাজ্ঞাৰ বাবেই ভাৰতীয় বিমান সংস্থাসমূহৰ ভিতৰত এয়াৰ ইণ্ডিয়া আটাইতকৈ প্ৰভাৱিত হয় । কিন্তু এনে নিষেধাজ্ঞাই ভাৰততকৈ পাকিস্তানৰ নিজৰেই বেছি ক্ষতি কৰে । অনুমান কৰা হৈছে যে যোৱাবাৰ পাকিস্তানৰ আকাশমাৰ্গ বন্ধ হোৱাৰ বাবে পাকিস্তানে প্ৰায় ৪০০ কোটি টকা লোকচানৰ সন্মুখীন হৈছিল । ইতিমধ্যে আৰ্থিক সংকটৰ সন্মুখীন হোৱা পাকিস্তানৰ বাবে এইটো আছিল এক ডাঙৰ আঘাত ।

এই বিমান সংস্থাসমূহ লোকচানৰ সন্মুখীন হ’ব
এয়াৰ ইণ্ডিয়াৰ বহু আন্তঃৰাষ্ট্ৰীয় দীৰ্ঘ দূৰত্বৰ বিমান পাকিস্তানৰ আকাশমাৰ্গৰ মাজেৰে উৰে । এই সিদ্ধান্তৰ ফলত আটাইতকৈ বেছি প্ৰভাৱিত হ’ব এয়াৰ ইণ্ডিয়া । অৱশ্যে কোম্পানীটোৱে কিছুমান বিমানৰ বিকল্প পথ ঘোষণা কৰিছে । মধ্যপ্ৰাচ্য আৰু অন্যান্য পশ্চিমীয়া দেশলৈ যোৱা ইণ্ডিগ’ আৰু স্পাইচজেটৰ লগতে অন্যান্য ব্যক্তিগত বিমান সংস্থাসমূহৰ বিমান প্ৰভাৱগ্ৰস্ত হ’ব । পৰিচালনা ব্যয় বৃদ্ধিৰ বাবে মানুহে ভ্ৰমণৰ বাবে অধিক খৰচ কৰিব লাগিব ।