লক্ষ্য লৈ আহক, উচ্চাকাংক্ষা নহয়, ভাল মানুহক ৰাজনীতিত যোগ দিবলৈ আহ্বান প্ৰধানমন্ত্ৰী মোদীৰ

প'ডকাষ্টত নৰেন্দ্ৰ মোদী

জিৰোধাৰ সহ-প্ৰতিষ্ঠাপক নিখিল কামাথৰ প’ডকাষ্ট ছিৰিজ “পিপল বাই ডব্লিউ টি এফ”ত শুকুৰবাৰে অতিথি হিচাপে উপস্থিত থাকে প্ৰধানমন্ত্ৰী নৰেন্দ্ৰ মোদী । দিনৰ ১.৩০ বজাত এই খণ্ডটো সম্প্ৰচাৰ কৰা হয় । প্ৰধানমন্ত্ৰীৰ সৈতে হোৱা এক আকৰ্ষণীয় বাৰ্তালাপ শুনাৰ সুবিধা লাভ কৰে শ্ৰোতাসকলে ।

এই সাক্ষাতৰ সময়ত প্ৰধানমন্ত্ৰীয়ে উল্লেখ কৰে যে দেশৰ স্বাধীনতাৰ বাবে যুঁজ দিয়া সকলোৱেই দেশৰ স্বাধীনতাৰ পিছত ৰাজনীতিত যোগদান কৰা নাছিল । আন্দোলনটো দেশপ্ৰেমৰ দ্বাৰা অনুপ্ৰাণিত বুলি আঙুলিয়াই দি প্ৰধানমন্ত্ৰীয়ে উল্লেখ কৰে যে স্বাধীনতাৰ পিছত শিক্ষাৰ ক্ষেত্ৰত আৰু ভাৰতৰ খাদী উন্নয়নৰ বাবে কাম কৰা লোকো আছে ।

‘ৰাজনীতিৰ লক্ষ্য সদায় উচ্চাকাংক্ষাতকৈ ওপৰত হ’ব লাগে’

‘‘মই বিশ্বাস কৰোঁ যে ভাল মানুহ সদায় ৰাজনীতিলৈ আহিব লাগে । উচ্চাকাংক্ষা নহয় লক্ষ্য লৈ আহিব লাগে । যদি লক্ষ্য লৈ আহে তেন্তে ক’ৰবাত স্থান পাব । কিন্তু লক্ষ্য সদায় উচ্চাকাংক্ষাতকৈ ওপৰত হ’ব লাগে ।” প্ৰধানমন্ত্ৰীয়ে কয় ।

তেওঁ লগতে কয়, ‘‘ৰাজনীতিবিদ হোৱাটো এটা অংশ । ৰাজনীতিত সফল হোৱাটো আনটো অংশ ৷ মই বিশ্বাস কৰোঁ যে ইয়াৰ বাবে আপোনাৰ নিষ্ঠাৰ লগতে প্ৰতিশ্ৰুতিও প্ৰয়োজনীয় । ৰাজনীতিত অহা নেতাসকলে তেওঁলোকৰ আনন্দ-দুখত ৰাইজৰ সৈতে, মানুহৰ সৈতে থিয় দিব লাগিব । তেওঁলোকো এজন ভাল দলীয় খেলুৱৈ হ’ব লাগিব । আপুনি হয়তো ৰাজনীতিত উজলি উঠিব । আপুনি হয়তো নিৰ্বাচনত জয়ী হ’ব পাৰে, কিন্তু আপুনি যে এজন সফল ৰাজনীতিবিদ হ’ব তাৰ কোনো নিশ্চয়তা নাই ।”

মহাত্মা গান্ধীৰ জীৱন-ধাৰণৰ পদ্ধতিয়ে তেওঁক ইমান ডাঙৰ নেতা কৰি তুলিছিল: প্ৰধানমন্ত্ৰী মোদী

মহাত্মা গান্ধীৰ উদাহৰণ দি প্ৰধানমন্ত্ৰীগৰাকীয়ে আৰু কয়, ‘‘আজিৰ ৰাজনীতিত আপুনি যি সংজ্ঞা দেখিব, মহাত্মা গান্ধী ক’ত খাপ খাই পৰে ? ব্যক্তিত্বৰ ফালৰ পৰা তেওঁৰ শাৰীৰিক গঠন আছিল অতি পাতল । তেওঁ বক্তা নাছিল । গতিকে এনেদৰে চালে তেওঁ নেতা হ’ব নোৱাৰিলেহেঁতেন । কিন্তু কি কাৰণ আছিল যিয়ে তেওঁক ইমান ডাঙৰ নেতা কৰি তুলিছিল ? সেয়া আছিল তেওঁৰ জীৱনশৈলী । ইয়াৰ ফলত তেওঁ দেশৰ নেতা হৈ পৰিল আৰু সকলোৱে তেওঁৰ ওচৰত থিয় হ’ল ।”
আলোচনাৰ সময়ত প্ৰধানমন্ত্ৰী মোদীয়ে প্ৰধানমন্ত্ৰী হিচাপে কাৰ্যভাৰ গ্ৰহণ কৰাৰ কিছু দিন পিছৰ ২০১৪ চনৰ এটা মনোমোহা কাহিনী ব্যক্ত কৰে । তেওঁ চীনৰ ৰাষ্ট্ৰপতি জি জিনপিঙৰ সৈতে হোৱা কথা-বতৰাৰ বিষয়ে কয়, যিয়ে সৌজন্যতামূলক আহ্বান জনাইছিল আৰু ভাৰত ভ্ৰমণৰ ইচ্ছা প্ৰকাশ কৰিছিল ।

চীনৰ ৰাষ্ট্ৰপতিৰ সৈতে প্ৰধানমন্ত্ৰী মোদীৰ বিশেষ বাৰ্তালাপ

প্ৰধানমন্ত্ৰী মোদীয়ে কয়, ‘‘২০১৪ চনত মই প্ৰধানমন্ত্ৰী হোৱাৰ সময়ত চীনৰ ৰাষ্ট্ৰপতি জি জিনপিঙে মোক ফোন কৰি ভাৰত ভ্ৰমণ কৰিব বিচৰা বুলি কৈছিল । মই তেওঁক ক’লোঁ, ‘নিশ্চয়, আপোনাক ভ্ৰমণ কৰিবলৈ আদৰণি জনোৱা হৈছে ।’”

ইয়াৰ পিছতে ৰাষ্ট্ৰপতি জিয়ে গুজৰাট আৰু বিশেষকৈ মোদীৰ গৃহ চহৰ বদনগৰ ভ্ৰমণৰ বাবে এক অনন্য অনুৰোধ জনায় । ‘‘ৰাষ্ট্ৰপতি জিয়ে কয় যে তেওঁ গুজৰাট, বিশেষকৈ মোৰ গাঁও বদনগৰ ভ্ৰমণ কৰিব বিচাৰে। তেওঁ উল্লেখ কৰে যে তেওঁ মোৰ আৰু মোৰ গৃহ চহৰৰ সৈতে এক বিশেষ সংযোগ অনুভৱ কৰিছিল।’’-এইদৰে কয় প্ৰধানমন্ত্ৰী মোদীয়ে।

চীনৰ ৰাষ্ট্ৰপতি জিনপিঙক প্ৰধানমন্ত্ৰী মোদীয়ে প্ৰশ্ন কৰে যে এই সংযোগ কি ? ‘‘ৰাষ্ট্ৰপতিগৰাকীয়ে বুজাই দিলে যে তেওঁৰ লগত যোৱা এজন চীনা দাৰ্শনিকে বদনগৰত উল্লেখযোগ্য সময় কটায়। আমোদজনক কথাটো হ’ল, যেতিয়া দাৰ্শনিকগৰাকী চীনলৈ উভতি আহিছিল, তেতিয়া তেওঁ ৰাষ্ট্ৰপতি জিৰ গৃহ চহৰতে আছিল ।’’-এইদৰে কয় প্ৰধানমন্ত্ৰী মোদীয়ে ।

ভাৰত আৰু চীনৰ মাজৰ সম্পৰ্কৰ ওপৰত আলোকপাত প্ৰধানমন্ত্ৰী মোদীৰ

প্ৰধানমন্ত্ৰীয়ে এই সাংস্কৃতিক সংযোগক ভাৰত আৰু চীনৰ মাজত গভীৰ শিপাই থকা ঐতিহাসিক সম্পৰ্কৰ প্ৰতিফলন বুলি অভিহিত কৰে । প্ৰধানমন্ত্ৰী মোদীয়ে কয়, ‘তেওঁ ক’লে যে এয়া আমাৰ সংযোগ ।

ইয়াৰ পূৰ্বে প’ডকাষ্টৰ এটা ট্ৰেইলাৰ কামাথে ছ’চিয়েল মিডিয়াত শ্বেয়াৰ কৰাত প্ৰধানমন্ত্ৰী মোদীয়ে ৰিটুইট কৰি এই খণ্ডটোৰ বাবে উৎকণ্ঠাৰ সৃষ্টি কৰিছিল ।