বৃদ্ধি পাব পাৰে অমৃতপাল সিঙৰ বন্দিত্বৰ সময় সীমা

অমৃতপাল সিং (ফাইল ফটো)

পঞ্জাৱ চৰকাৰে ৰাষ্ট্ৰীয় নিৰাপত্তা আইনৰ অধীনত কাৰাবন্দী তথা খাদূৰ চাহেবৰ সাংসদ অমৃতপাল সিঙৰ বন্দিত্ব এবছৰ বৃদ্ধি কৰাৰ সিদ্ধান্ত লোৱা বুলি শুকুৰবাৰে সূত্ৰৰ পৰা জানিব পৰা গৈছে । বৰ্তমান অসমৰ ডিব্ৰুগড়ৰ কাৰাগাৰত বন্দী হৈ থকা অমৃতপাল সিঙক ২০২৩ চনৰ ২৩ এপ্ৰিলত গ্ৰেপ্তাৰ কৰাৰ পিছত ৰাষ্ট্ৰীয় নিৰাপত্তা আইন (এন এছ এ)ৰ অধীনত বন্দী কৰি ৰখা হৈছিল ।

ইয়াৰ পূৰ্বে ডিব্ৰুগড় কাৰাগাৰৰ পৰা পঞ্জাৱলৈ ঘূৰাই অনা সিঙৰ ৯ জন সহযোগীক ৰাজ্য চৰকাৰে বন্দী কৰাৰ সময় বৃদ্ধি কৰা নাছিল । ২০২৩ চনৰ আজনালা আৰক্ষী থানাৰ আক্ৰমণৰ সৈতে জড়িত এই ৯ জন সহায়কক এন এছ এৰ অধীনত বন্দিত্ব অন্ত পৰাৰ পিছত পুনৰ পঞ্জাৱলৈ অনা হৈছিল ।

তেওঁলোক হৈছে বসন্ত সিং, ভগৱন্ত সিং ওৰফে প্ৰধান মন্ত্ৰী বাজেকে, গুৰমীত সিং গিল ওৰফে গুৰমীত বুক্কানৱালা, সৰবজিত সিং কালসী ওৰফে দলজীত সিং কালসী, গুৰিন্দৰপাল সিং আউজলা ওৰফে গুৰি আউজলা, হৰজীত সিং ওৰফে চাচা, কুলৱন্ত সিং ধলিৱাল ওৰফে কুলৱন্ত সিং, বৰিন্দৰ জোহল আৰু পপ্পলপ্ৰীত সিং ।

‘ৱাৰিছ পঞ্জাব দে’ নামৰ সংগঠনটোৰ মুৰব্বী অমৃতপাল সিঙে ২০২৪ চনৰ লোকসভা নিৰ্বাচনত তৰ্ণ তৰণ জিলাৰ খাদূৰ চাহেবৰ পৰা নিৰ্দলীয় হিচাপে প্ৰতিদ্বন্দ্বিতা কৰি সাংসদ নিৰ্বাচিত হৈছিল ।

নিহত খালিস্তানী উগ্ৰপন্থী জৰ্নাইল সিং ভিন্দ্ৰনৱালেৰ নামেৰে নিজকে পৰিচয় দিয়া উগ্ৰ প্ৰচাৰকগৰাকীক ২০২৩ চনৰ ২৩ এপ্ৰিলত মোগা জিলাৰ ৰ’ড গাঁৱৰ পৰা গ্ৰেপ্তাৰ কৰা হৈছিল । এমাহৰো অধিক সময় ধৰি তেওঁক বিচাৰি অভিযান চলাইছিল আৰক্ষীয়ে ।

যোৱা ১৮ মাৰ্চত জলন্ধৰ জিলাত বাহন সলনি কৰি ছদ্মবেশেৰে আৰক্ষীৰ জালৰ পৰা পলায়ন কৰে খালিস্তানী সমৰ্থকজনে । ২০২৩ চনৰ ২৩ ফেব্ৰুৱাৰীত অজনলা কাণ্ডৰ পিছতে পঞ্জাৱ আৰক্ষীয়ে এক অভিযান আৰম্ভ কৰে, য’ত অমৃতপাল আৰু তেওঁৰ সমৰ্থকসকলৰ বিৰুদ্ধে থানাত আক্ৰমণৰ অভিযোগ উত্থাপন হয় । ইয়াৰে কিছুমানে তৰোৱাল আৰু বন্দুক লৈ বেৰিকেড ভাঙি অমৃতসৰৰ বাহিৰৰ থানাত সোমাই সহযোগীসকলক মুকলি কৰি দিয়াৰ বাবে পুলিচৰ সৈতে সংঘৰ্ষত লিপ্ত হোৱাৰ অভিযোগ উত্থাপন হয় ।

অমৃতপাল আৰু তেওঁৰ সহায়কসকলৰ বিৰুদ্ধে সমাজত হিংসা বিয়পোৱা, হত্যাৰ চেষ্টা, আৰক্ষী জোৱানক আক্ৰমণ আৰু ৰাজহুৱা সেৱকৰ দ্বাৰা বৈধভাৱে কৰ্তব্য পালনত বাধা সৃষ্টি কৰাৰ অভিযোগত গোচৰ ৰুজু কৰা হৈছিল ।