একেদিনাই এটা নিৰ্দেশত চাকৰি গ’ল প্ৰায় ২৬০০০ শিক্ষকৰ, এজনৰহে বাচিল চাকৰি

SSC গোচৰক লৈ ডাঙৰ ৰায়দান দিয়ে উচ্চতম ন্যায়ালয়ে। ২০১৬ চনৰ শিক্ষকৰ নিযুক্তি পৰীক্ষাৰ কেলেংকাৰিক লৈ কলিকতা উচ্চ ন্যায়ালয়ৰ ৰায়ক সম্পূৰ্ণৰূপে সমৰ্থন জনালে উচ্চতম ন্যায়ালয়ে। ৰায়দানত দুই এটা সালসলনি কৰা হয় যদিও ২৬ হাজাৰ শিক্ষক-কৰ্মচাৰীৰ নিযুক্তি বাতিল কৰাৰ সিদ্ধান্ত গ্ৰহণ কৰে উচ্চতম ন্যায়ালয়ে। এই ৰায়ৰ পাছত সম্পূৰ্ণৰূপে বাতিল কৰা হয় ২০১৬ চনৰ নিযুক্তি পেনেল। এতিয়া  প্ৰশ্ন হৈছে এই ২৬ হাজাৰ শিক্ষক-কৰ্মচাৰীৰ কি হ’ব?

২০১৬ চনত অনুষ্ঠিত নৱম-দ্বাদশ শ্ৰেণীৰ শিক্ষকৰ নিযুক্তি পৰীক্ষাত অৱতীৰ্ণ হৈছিল সোমা দাস। ফলাফল ঘোষণাৰ পাছত তেওঁৰ অভিযোগ আছিল যে, নিযুক্তিৰ মেধা তালিকাত নাম থকাৰ পিছতো তেওঁক চাকৰি দিয়া হোৱা নাছিল। ইয়াৰ পিছত সেই অভিযোগৰ ভিত্তিত উচ্চ ন্যায়ালয়ত গোচৰ ৰুজু কৰা হয়। ২০১৯ চনত তেওঁৰ কৰ্কট ৰোগ ধৰা পৰিছিল।বীৰভূমিৰ নলহাটীৰ কন্যা সোমা সেই বছৰৰ ফেব্ৰুৱাৰী মাহৰ পৰা তেজৰ কৰ্কট ৰোগত আক্ৰান্ত হৈ আছে। কিন্তু তাৰ পাছতো তেওঁ যুঁজখন এৰি দিয়া নাছিল। অসুস্থ সোমাই চাকৰিৰ দাবীত দিনৰ পিছত দিন কলকাতাৰ ৰাজপথত ধৰ্ণাত যোগদান কৰিছিল।

ইয়াৰ পিছত দুৰ্নীতিৰ অভিযোগত কলিকতা উচ্চ ন্যায়ালয়ৰ নিৰ্দেশত এই ২৬ হাজাৰৰ চাকৰি বাতিল কৰা হয়। কিন্তু মানৱীয় কাৰণত সোমাৰ চাকৰি বাহাল ৰখা হয়। ইয়াৰ পিছতে উচ্চ ন্যায়ালয়ৰ নিৰ্দেশক প্ৰত্যাহ্বান জনাই উচ্চতম ন্যায়ালয়ত গোচৰ ৰুজু কৰা হয়। অৱশ্যে উচ্চ ন্যায়ালয়ৰ ৰায়ক সমৰ্থন কৰে উচ্চতম ন্যায়ালয়ে। কেৱল মানৱীয় কাৰণতহে সোমা দাসৰ চাকৰি বাহাল ৰখা হৈছিল। উকীল ফিৰদৌছ ছামিমে কয়, ” সোমা দাসে চাকৰি কৰিব বুলি শুনিছো।” উচ্চতম ন্যায়ালয়ে কৈছে যে, সোমাৰ বাহিৰে বিশেষভাৱে সক্ষম লোকৰ বাবে কোনো অতিৰিক্ত সুবিধা নাই। ইয়াৰো পৰীক্ষা কৰা হ’ব।

উচ্চতম ন্যায়ালয়ে কয় যে, ইয়াৰ ভিতৰত যোগ্য প্ৰাৰ্থীসকলে যিটো বিভাগত কাম কৰি আছিল, সেই বিভাগত কাম কৰিব পাৰিব। যিসকল আপাত দৃষ্টিত যোগ্যতাসম্পন্ন তেওঁলোকক ৰাজ্য চৰকাৰৰ বিভিন্ন বিভাগত নিযুক্তি দিয়া হ’ব। কিন্তু সেয়া নতুন বাছনি প্ৰক্ৰিয়ালৈকে চলিব। আদালতে নতুনকৈ নিযুক্তি প্ৰক্ৰিয়াৰ ব্যৱস্থা কৰিবলৈ আদেশ প্ৰদান কৰে। এই অনুসৰি প্ৰাৰ্থীসকলে পুনৰ এই বাছনি পৰীক্ষাত অৱতীৰ্ণ হ’ব লাগিব। তেতিয়ালৈকে বৈধ প্ৰাৰ্থীয়ে আপাততঃ নিজ নিজ বিভাগত কাম কৰিব পাৰিব। এই প্ৰক্ৰিয়া তিনি মাহৰ ভিতৰত সম্পূৰ্ণ হ’ব।