আজি উচ্চতম ন্যায়ালয়ত ৱাকফ আইনৰ শুনানি, সপক্ষে কোন? বিপক্ষত কাৰ কি যুক্তি? সবিশেষ জানক…

আজি অৰ্থাৎ ১৬ মাৰ্চ বুধবাৰে সমগ্ৰ দেশৰ চকু থাকিব উচ্চতম ন্যায়ালয়ৰ ওপৰত। শেহতীয়াকৈ সংসদত গৃহীত হোৱা ৱাকফ সংশোধনী আইনক প্ৰত্যাহ্বান জনোৱা আবেদনৰ শুনানি গ্ৰহণ কৰিব মুখ্য ন্যায়াধীশ সঞ্জীৱ খান্না, ন্যায়াধীশ পিভি সঞ্জয় কুমাৰ আৰু ন্যায়াধীশ কেভি বিশ্বনাথনৰ বিচাৰপীঠে। আল্লাহৰ নামত দান কৰা সম্পত্তিকে ৱাকফ বুলি কোৱা হয়। সমগ্ৰ দেশতে উপস্থিত থকা প্ৰায় ৮ লাখ ৭০ হাজাৰ এনে সম্পত্তিক নতুন ধৰণে পৰিচালনা কৰিবলৈ ৱাকফ সংশোধনী আইনখন প্ৰৱৰ্তন কৰিছে কেন্দ্ৰীয় চৰকাৰে। যিটো সমগ্ৰ দেশতে বিতৰ্কৰ বিষয় হৈ পৰিছে। এই সম্পত্তিসমূহৰ মুঠ মূল্য ১ লাখ কোটিতকৈও অধিক হ’ব বুলি অনুমান কৰা হৈছে। যি ৯.৫ লাখ একৰ মাটিত বিস্তৃত।

এই আইনৰ বিৰোধী কোন?

ৱাকফ সংশোধনী আইনখনৰ সাংবিধানিকতাক প্ৰত্যাহ্বান জনাই আবেদন দাখিল কৰা শীৰ্ষ সংগঠনসমূহৰ ভিতৰত অল ইণ্ডিয়া মুছলিম পাৰ্চনেল ল ব’ৰ্ড, জমিয়ত উলেমা-ই-হিন্দৰ দৰে মুছলমান সংগঠন অন্যতম। এইবোৰৰ উপৰিও কেইবা ডজনো দল-সংগঠনেও আদালতত এই আইনৰ মুকলি বিৰোধিতা কৰিছে। ৰাজনৈতিক দল আৰু নেতাৰ হৈ আছাদুদ্দিন ওৱেছিয়ে আদালতত আইনৰ বিৰুদ্ধে মাত মাতিছে।

ওৱাইছিৰ উপৰিও যিসকলৰ আবেদন আদালতৰ শুনানিৰ বাবে তালিকাভুক্ত হৈছে তেওঁলোকৰ ভিতৰত আছে আম আদমি পাৰ্টিৰ বিধায়ক অমনাতুল্লাহ খান, এছ’চিয়েশ্যন ফৰ প্ৰটেকচন অৱ চিভিল ৰাইটছ, আৰ্ছাদ ডানি, সমস্ত কেৰালা জমিয়াতুল উলেমা, অঞ্জুম কাদ্ৰী, তাইব খান ছালমানী, মহম্মদ শ্বাফি, মহম্মদ ফজলুৰ ৰহিম আৰু ৰাষ্ট্ৰীয় জনতা দলৰ নেতা মনোজ ঝা।

অন্ধ্ৰ প্ৰদেশৰ প্ৰাক্তন মুখ্যমন্ত্ৰী জগন মোহন ৰেড্ডীৰ নেতৃত্বত ৱাই এছ আৰ চি পিয়ে ৱাকফ সংশোধনী আইনখনৰ সাংবিধানিকতাক লৈ উচ্চতম ন্যায়ালয়ৰ কাষ চাপিছে। ৱাই এছ আৰ চি পিৰ পূৰ্বে ভাৰতীয় কমিউনিষ্ট পাৰ্টিয়ে ইয়াৰ সাধাৰণ সম্পাদক ডি ৰাজাৰ নেতৃত্বত উচ্চতম ন্যায়ালয়ৰ কাষ চাপিছিল। ৰাজনীতিবিদ-অভিনেতা তথা তামিলনাডুৰ ৰাজনৈতিক দল টিভিকেৰ মুৰব্বী বিজয়েও এই সংশোধনীৰ বিৰুদ্ধে উচ্চতম ন্যায়ালয়ৰ কাষ চাপিছে। এইসকলৰ বাহিৰেও আদালতত উপস্থিত হৈছে সমাজবাদী পাৰ্টীৰ নেতা জিয়াউৰ ৰহমান বৰ্ক। জম্মু-কাশ্মীৰৰ প্ৰায় সকলো আঞ্চলিক দলেই এই আইনৰ বিৰোধী। যেনে – পিডিপি আৰু নেশ্যনেল কনফাৰেন্সে আইনৰ বিৰোধিতা কৰাৰ কথা কৈছে৷ যিহেতু মিৰৱাইজ উমৰ ফাৰুক আদালতত সৰ্বভাৰতীয় ব্যক্তিগত ব’ৰ্ডক সমৰ্থন কৰাৰ সিদ্ধান্ত লৈছে।

কোনসকল ৱাকফৰ সমৰ্থনত আছে?

নিশ্চিতভাৱে প্ৰথমে এই আইনখনৰ সমৰ্থনত চৰকাৰ আৰু ইয়াৰ অধিবক্তাৰ এটা গোটেই পেনেল থাকিব। ইয়াৰ বাহিৰেও ৱাকফ সংশোধনী আইনৰ শুনানিৰ পূৰ্বে দেশৰ ৬খন ৰাজ্য চৰকাৰে এই বিষয়ত হস্তক্ষেপ আবেদন দাখিল কৰিছে। অসম, ৰাজস্থান, ছত্তীশগড়, উত্তৰাখণ্ড, হাৰিয়ানা আৰু মহাৰাষ্ট্ৰ চৰকাৰে কেন্দ্ৰই অনা নতুন আইনখনক সমৰ্থন কৰি উচ্চতম ন্যায়ালয়ত আবেদন দাখিল কৰিছে। এই ক্ষেত্ৰত সাক্ষী হ’ব বিচাৰিছে ৰাজস্থান চৰকাৰ। তেওঁলোকে আদালতত কয় যে আইনখনৰ বিৰোধিতা কৰাসকলে নিশ্চিতভাৱে কিছুমান সাংবিধানিক উদ্বেগৰ প্ৰতি আদালতৰ দৃষ্টি আকৰ্ষণ কৰিছে, কিন্তু এই আবেদনসমূহে ৰাজ্য চৰকাৰসমূহে সন্মুখীন হোৱা উদ্বেগ বা ভিত্তিগত বাস্তৱতাক উত্থাপন কৰাত ব্যৰ্থ হৈছে।

আইনৰ বিৰুদ্ধে কি কি যুক্তি আছে?

এফালে চৰকাৰে কৈছে যে ৱাকফৰ সম্পত্তিৰ উন্নত ব্যৱস্থাপনা, জবাবদিহিতা আৰু স্বচ্ছতাৰ বাবে নতুন আইনখন প্ৰয়োজনীয়। চৰকাৰে কয় যে, ইয়াৰ ফলত ৱাকফৰ সম্পত্তিৰ উন্নত ব্যৱহাৰ হ’ব। কিন্তু আইনখনৰ বিৰোধিতা কৰাসকলে ইয়াক ধৰ্মীয় স্বাধীনতা আৰু সমতাৰ অধিকাৰ উলংঘা বুলি অভিহিত কৰিছে।

দিল্লীত চুলতানৰ সময়ৰ পৰা আৰম্ভ হোৱা ৱাকফৰ আজি সমগ্ৰ দেশতে উপস্থিত সম্পত্তি পৰিচালনাৰ বাবে সংসদত ভোটদান অনুষ্ঠিত হোৱাৰ সময়ত লোকসভাত সপক্ষে ২৮৮টা আৰু বিপক্ষে ২৩২টা ভোটদান কৰা হৈছিল। একে সময়তে ৰাজ্যসভাত এই বিধেয়কখনৰ সপক্ষে ১৩২টা আৰু বিৰোধীতাৰে ৯৫টা ভোট দিয়া হয়। বিৰোধী দলসমূহে এই আইনখনৰ বিৰোধিতা কৰিছে। ৱাকফ সংশোধনীৰ বিৰোধিতা কৰাসকলে ইয়াক সংবিধানৰ ১৪, ১৫, ২১, ২৫, ২৬, ২৯, ৩০ আৰু ৩০০-এ অনুচ্ছেদ উলংঘা বুলি অভিহিত কৰিছে।