লোকসভাত গৃহীত হ’ল ৱাকফ সংশোধনী বিধেয়ক, আজি ৰাজ্যসভাত হ’ব অগ্নিপৰীক্ষা

বুধবাৰে লোকসভাত গৃহীত হৈছে ৱাকফ সংশোধনী বিধেয়ক। প্ৰথমে সংশোধনীৰ ওপৰত এজন এজনকৈ ব্যক্তিগত সদস্যৰ দ্বাৰা ভোটদান কৰা হৈছিল। য’ত সকলো বিৰোধী নেতাৰ সংশোধনী নাকচ কৰিছিল। একে সময়তে সংশোধিত ৱাকফ বিধেয়কখনৰ সপক্ষে মুঠ ২৮৮টা ভোট লাভ কৰাৰ বিপৰীতে বিৰোধীভাৱে ২৩২টা ভোট লাভ কৰে। এতিয়া বৃহস্পতিবাৰে সংসদৰ উচ্চ সদনত (ৰাজ্যসভা) এই বিধেয়কখন উপস্থাপন কৰা হ’ব। জেপিচিত দীৰ্ঘদিনীয়া আলোচনা আৰু মতামত সমীক্ষাৰ অন্তত বুধবাৰে সংসদৰ নিম্ন সদনত এই বিধেয়কখন উত্থাপন কৰা হয়, যাৰ ওপৰত দীৰ্ঘদিনীয়া আলোচনা আৰু হুলস্থুলৰ সৃষ্টি হয়। বিৰোধীয়ে বিধেয়কখন অসাংবিধানিক বুলি ঘোষণা কৰে। আনকি এআইএমআইএমৰ মুৰব্বী তথা সাংসদ আছাদুদ্দিন ওৱেইছিয়ে প্ৰতিবাদত সদনত বিধেয়কখনৰ প্ৰতিলিপিও ফালি পেলায়। ইয়াৰ পূৰ্বে সদনত ভাষণ দি থকাৰ সময়তে গৃহমন্ত্ৰী অমিত শ্বাহে বিৰোধীক লক্ষ্য কৰি লৈছিল। এই বিধেয়কখনৰ সন্দৰ্ভত শাসকীয় দল আৰু বিৰোধীয়ে কি ক’লে জানক…

1. কেন্দ্ৰীয় সংখ্যালঘু পৰিক্ৰমা মন্ত্ৰী কিৰেন ৰিজিজুৱে লোকসভাত উত্থাপন কৰে ৱাকফ সংশোধনী বিধেয়ক-২০২৫। তেওঁ কয়, “এই বিধেয়কখন মুছলমানৰ বিৰুদ্ধে নহয়। বিধেয়কখনত দৰিদ্ৰ মুছলমানসকলৰ বিশেষ যত্ন লোৱা হৈছে। আলোচনাৰ সময়ত একাংশ সদস্যই অযুক্তিকৰ বিষয় উত্থাপন কৰে। এই বিধেয়কখন কেনেকৈ অসাংবিধানিক হৈ পৰিল? যদি বিধেয়কখন অসাংবিধানিক আছিল তেন্তে আপুনি কিয় আদালতলৈ যোৱা নাছিল। বিধেয়কখনৰ লক্ষ্য হৈছে ৱাকফৰ সম্পত্তিৰ কাম-কাজ উন্নত কৰা, জটিলতা আঁতৰোৱা আৰু স্বচ্ছতা অনা।”
2. সমাজবাদী পাৰ্টিৰ সাংসদ অখিলেশ যাদৱে কয়, “এই চৰকাৰে নিজৰ ব্যৰ্থতাক ঢাকি ৰাখিবলৈ এই বিধেয়কখন আনিছে। এয়া বিজেপিৰ ৰাজনৈতিক হঠকাৰীতা আৰু ইয়াৰ সাম্প্ৰদায়িক ৰাজনীতিৰ এক নতুন ৰূপ। ৱাকফৰ সৈতে জড়িত বিষয়সমূহক ইয়াত গুৰুত্ব দিয়া হোৱা নাই। ৱাকফৰ মাটিতকৈও ডাঙৰ বিষয়টো হ’ল চীনে যি মাটিত নিজৰ গাঁও স্থাপন কৰিছে। কোনেও যাতে ইয়াক লৈ প্ৰশ্ন উত্থাপন নকৰে, সেইবাবে এই বিধেয়কখন এনেদৰে অনা হৈছে।”
3. ৱাকফ (সংশোধনী) বিধেয়ক-২০২৫ক লৈ চৰকাৰক আক্ৰমণ কৰে এআইএমআইএমৰ মুৰব্বী তথা সাংসদ আছাদুদ্দিন ওৱাইছিয়ে। তেওঁ কয়, “দেশৰ সংখ্যালঘুৰ ওপৰত এইটোৱেই আটাইতকৈ ডাঙৰ আক্ৰমণ। মই বিধেয়কখনৰ বিৰোধিতা কৰিছোঁ। মাদ্ৰাছাক লক্ষ্য কৰি লোৱা হৈছে। এই সময়ত তেওঁ বিলখনৰ কপি ফালি পেলায়।”
4. ৱাকফ সংশোধনী বিধেয়কৰ ওপৰত গঠিত জেপিচিৰ অধ্যক্ষ জগদাম্বিকা পালে ৱাকফে সংবিধান উলংঘা কৰা বুলি মন্তব্য কৰে। দুয়োখন সদনত চৰকাৰৰ সংখ্যাগৰিষ্ঠতা আছে আৰু ইয়াক পোনপটীয়াকৈ গৃহীত কৰিব পৰা গ’লহেঁতেন যদিও ইয়াৰ বাবে বিতৰ্ক কৰোৱা হৈছে। আলোচনাৰ অন্তত ইয়াক উপস্থাপন কৰা হয়। বিৰোধী দলক জেপিচিত ভাষণ দিবলৈ সুযোগ দিয়া হৈছিল। ৱাকফ সম্পৰ্কীয় সকলো পৰামৰ্শ জেপিচিয়ে গ্ৰহণ কৰিলে। ওৱাইছিক লক্ষ্য কৰি তেওঁ কয় যে, ওৱাইছিয়ে বিধেয়কখন ফালি অসাংবিধানিক কাম কৰিছিল।
5. ইয়াৰ পূৰ্বে গৃহমন্ত্ৰী অমিত শ্বাহে সদনত কৈছিল, “আমি ভোট বেংকৰ বাবে কোনো আইন অনা নাই। আইন ন্যায় আৰু কল্যাণৰ বাবে। সকলোৱে সংসদৰ আইন মানি চলিব লাগিব। আইন মানি নচলাৰ বাবে হুংকাৰ দিছে বিৰোধীয়ে। সকলোৱে ভাৰত চৰকাৰৰ আইন মানি চলিব লাগিব। মাটিৰ মালিকীস্বত্ব নিৰ্ধাৰণ কৰাৰ অধিকাৰ সংগ্ৰাহকৰ আছে। মাটিৰ পৰীক্ষণ সংগ্ৰাহকে কৰিব লাগিব। ভেৰিফিকেচনৰ প্ৰয়োজন। যদি সংগ্ৰাহকে ৱাকফৰ সম্পত্তি পৰীক্ষা কৰে তাত আপত্তি কিয়?”
6. অমিত শ্বাহে কয়, “ৱাকফ সংশোধনী বিধেয়ক-২০২৫ সন্দৰ্ভত ভুল ধাৰণা বিয়পি পৰিছে। মই স্পষ্টকৈ ক’ব বিচাৰো যে, ৱাকফ হৈছে মুছলমান ভাইসকলৰ ধৰ্মীয় কাম-কাজ আৰু তেওঁলোকৰ দ্বাৰা দিয়া অনুদানৰ ওপৰত ভিত্তি কৰি গঢ়ি উঠা এটা ট্ৰাষ্ট। চৰকাৰে ইয়াত হস্তক্ষেপ কৰিব নিবিচাৰে। ইয়াত মুতাৱাল্লীও তেওঁলোকৰ হ’ব, ৱাকিফো তেওঁলোকৰ হ’ব, ৱাকফো তেওঁলোকৰ হ’ব।”
7. কংগ্ৰেছৰ সাংসদ গৌৰৱ গগৈয়ে এই বিধেয়ক সন্দৰ্ভত কেন্দ্ৰীয় চৰকাৰক তীব্ৰ আক্ৰমণ কৰে। তেওঁ কয়, “ৱাকফ সংশোধনী বিধেয়ক সংবিধানৰ বিৰুধী। চৰকাৰে ধৰ্মৰ ভিত্তিত মানুহক বিভাজিত কৰিছে। এই চৰকাৰখনে কেনেধৰণৰ আইন বনাইছে? এয়া কেনেকুৱা ন্যায়? তেওঁলোকে বিচাৰে ৱাকফ ব’ৰ্ড দুৰ্বল হওক।”
8. বিজেপিৰ সাংসদ অনুৰাগ ঠাকুৰে কয় যে, এই বিধেয়কখনে কংগ্ৰেছৰ তুষ্টিকৰণৰ ৰাজনীতিক দাহ কৰিব। এই বিধেয়কখনে দেশখন সংবিধান অনুসৰি চলিব পৰাকৈ নিশ্চিত কৰিব। তেওঁ ৱাকফ ব’ৰ্ডক দুৰ্নীতি আৰু অত্যাচাৰৰ গুহা বুলি অভিহিত কৰি কয় যে, এতিয়া ইয়াক সলনি কৰাৰ সময় আহি পৰিছে। কংগ্ৰেছ আৰু ইয়াৰ মিত্ৰ দলসমূহে নিজৰ ভোট বেংকৰ বাবে এটিএম হিচাপে ৱাকফৰ সম্পত্তি ব্যৱহাৰ কৰিছে ।”