আজি লোকসভাত উত্থাপন কৰা হ’ব ৱাকফ সংশোধনী বিধেয়ক, হুইপ জাৰি শাসক-বিৰোধীৰ

আজি লোকসভা উত্থাপন কৰা হ’ব ৱাকফ সংশোধনী বিধেয়ক । এইলৈ বুধবাৰৰ দিনটোত সংসদত ৱাকফ সংশোধনী বিধেয়কক লৈ হুলস্থুল হোৱাৰ সম্ভাৱনা আছে। ৱাকফ সংশোধনী বিধেয়কখন গৃহীত কৰাৰ বাবে আজি লোকসভাত উত্থাপন কৰা হ’ব । এই বিধেয়কখনক লৈ শাসক আৰু বিৰোধী দুয়োটাৰে মাজত তুমুল বিতৰ্ক হোৱাৰ সম্ভাৱনা আছে । বৃহস্পতিবাৰে ৰাজ্যসভাত ইয়াৰ ওপৰত আলোচনা হোৱাৰ সম্ভাৱনা আছে। প্ৰস্তাৱিত আইন সম্পৰ্কে আলোচনা কৰিবলৈ দুয়োটা সদনতে আঠ ঘণ্টাকৈ সময় নিৰ্ধাৰণ কৰা হৈছে।

ইফালে, ৱাকফ বিধেয়কৰ বিৰোধিতা কৰি একত্ৰিত হৈছে বিৰোধী। একে সময়তে ৱাকফ সংশোধনী বিধেয়ক গৃহীত কৰিবলৈ সকলো সাংসদক সদনত উপস্থিত থাকিবলৈ হুইপ জাৰি কৰিছে বিজেপিয়ে । মঙলবাৰে লোকসভাৰ অধ্যক্ষ ওম বিৰলাই ব্যৱসায়িক পৰামৰ্শদাতা সমিতিৰ বৈঠক আহ্বান কৰি ৱাকফ বিধেয়ক সন্দৰ্ভত আলোচনা কৰে। তাতে বিৰোধীয়ে ৱাকফ বিধেয়ক সন্দৰ্ভত ১২ ঘণ্টীয়া আলোচনাৰ দাবী জনায়। চৰকাৰী পক্ষই আঠ ঘণ্টাৰ আলোচনাৰ পোষকতা কৰে। বিএচিৰ বৈঠকত বিৰোধীয়ে আধাৰ কাৰ্ডৰ এপিক নম্বৰ আৰু মণিপুৰ বিষয়কলৈ সংসদত আলোচনাৰ দাবী উত্থাপন কৰে। অৱশ্যে তেওঁলোকৰ কোনো দাবী পূৰণ নহ’ল বুলি অভিযোগ উত্থাপন কৰে বিৰোধীয়ে।

বুধবাৰে লোকসভাত ৱাকফ সংশোধনী বিধেয়ক উত্থাপন কৰা হ’ব বুলি কেন্দ্ৰই ঘোষণা কৰে। আৰু ইয়াৰ ওপৰত ৮ ঘণ্টা আলোচনা কৰা হ’ব। ইয়াৰ পিছতে ইণ্ডিয়া ব্লকৰ অংশীদাৰসকলে এখন বৈঠকত মিলিত হয় । বিৰোধী মিত্ৰজোঁটে ৱাকফ বিধেয়কৰ বিৰোধিতা কৰাৰ সিদ্ধান্ত লৈছে। বিজেপিৰ পক্ষৰ দৰে আজি লোকসভাত সাংসদসকলক উপস্থিত থাকিবলৈ কংগ্ৰেছে হুইপ জাৰি কৰিছে। কেৱল বুধবাৰেই নহয়, বৃহস্পতিবাৰ আৰু শুকুৰবাৰেও সকলো সাংসদ উপস্থিত থাকিব বিৰোধী সকলো সাংসদ।

ৱাকফ বিধেয়কখন গৃহীত কৰিবলৈও বিজেপিয়ে দীৰ্ঘদিন ধৰি চেষ্টা চলাই আহিছে । ইফালে, এন ডি এৰ অংশীদাৰসকলে এই বিধেয়কখন সমৰ্থন কৰিব নে নকৰে সেই সন্দৰ্ভত জল্পনা-কল্পনাৰ আৰম্ভ হৈছে । ইতিমধ্যে নীতিশ কুমাৰৰ জনতা দল ইউনাইটেডে স্পষ্ট কৰি দিছে যে, তেওঁলোকে ৱাকফ সংশোধনী বিধেয়কক সমৰ্থন কৰিব। মুঠৰ ওপৰত আজি লোকসভাৰ অধিৱেশন উত্তপ্ত হ’ব পাৰে।

উল্লেখ্য যে, আজি যদি লোকসভাত ৱাকফ বিধেয়ক গৃহীত হয়, তেন্তে কাইলৈ ​​ৰাজ্যসভাত দাখিল কৰিব পৰা যাব পাৰে ৱাকফ বিধেয়ক। সেইবাবেই বৃহস্পতিবাৰে ৰাজ্যসভাত উপস্থিত থাকিবলৈ দলৰ সাংসদসকলক নিৰ্দেশ দিছে বিজেপিয়ে।

সংসদৰ দ্বিতীয় পৰ্যায়ৰ বাজেট অধিৱেশনৰ অন্ত পৰিব অহা ৪ এপ্ৰিলত। তাৰ পূৰ্বে কেন্দ্ৰৰ শাসকীয় দলে লোকসভা আৰু ৰাজ্যসভাত ৱাকফ বিধেয়ক গৃহীত কৰিব বিচাৰিছে। ইফালে, দিল্লী আৰক্ষীয়ে আজি ৰাজধানীৰ বিভিন্ন প্ৰান্তত নিৰাপত্তা ব্যৱস্থা আৰু অধিক বৃদ্ধি কৰিছে। এজন বিষয়াই জনোৱা মতে, বিভিন্ন স্পৰ্শকাতৰ অঞ্চলত অতিৰিক্ত আৰক্ষী মোতায়েন কৰা হৈছে।