দিল্লীৰ তৃতীয়গৰাকী মহিলা মুখ্যমন্ত্ৰী হিচাপে শপত গ্ৰহণ কৰা আতিশী কোন? জানক সবিশেষ

আতিশী কোন?

আম আদমী পাৰ্টিৰ (আপ) নেত্ৰী আতিশীয়ে শনিবাৰে সন্ধিয়া মুখ্যমন্ত্ৰী হিচাপে শপত গ্ৰহণ কৰে। লেফটেনেণ্ট গৱৰ্ণৰ ভি কে চাক্সেনাই ৰাজভৱনত আতিশীক শপতবাক্য পাঠ কৰাই। ইয়াৰ পাছত তেওঁ কংগ্ৰেছ নেত্ৰী শীলা দীক্ষিত আৰু বিজেপি নেত্ৰী সুষমা স্বৰাজৰ পাছত দিল্লীৰ তৃতীয়গৰাকী মহিলা মুখ্যমন্ত্ৰী হয়। দিল্লীৰ মুখ্যমন্ত্ৰী অৰবিন্দ কেজৰিৱালে সুৰানীতিৰ গোচৰৰ সন্দৰ্ভত কাৰাগাৰৰ পৰা মুকলি হোৱাৰ পাছত মুখ্যমন্ত্ৰীপদৰ পৰা পদত্যাগ কৰাৰ কথা ঘোষণা কৰে। শুকুৰবাৰে নিশা তেওঁৰ পদত্যাগ পত্ৰ গ্ৰহণ কৰা হৈছিল। ইয়াৰ পাছতে আতিশীক মুখ্যমন্ত্ৰী পদত নিযুক্তি দিয়া হয়।
আতিশীক প্ৰাক্তন মুখ্যমন্ত্ৰী অৰবিন্দ কেজৰিৱালৰ অতি বিশ্বাসী বুলি কোৱা হয়।

ইয়াৰ পূৰ্বে আপৰ বৈঠকত আতিশী বিধায়িনী দলৰ নেতা হিচাপে নিৰ্বাচিত হৈছিল। বিধায়িনী দলৰ নেতা হিচাপে নিৰ্বাচিত হোৱাৰ পাছত আতিশীয়ে লেফটেনেণ্ট গভৰ্ণৰক মুখ্যমন্ত্ৰীৰ শপত গ্ৰহণৰ দিনটো ঠিক কৰিবলৈ আহ্বান জনাইছিল।

২০২৩ চনত দিল্লীৰ উপ-মুখ্যমন্ত্ৰী মনীষ ছিছ’দিয়াক সুৰানীতিৰ গোচৰত কাৰাগাৰলৈ নিয়াৰ পাছত আতিশীয়ে শিক্ষামন্ত্ৰীৰ দায়িত্ব গ্ৰহণ কৰে। তেওঁ দিল্লী কেবিনেটত মন্ত্ৰী হিচাপে বিত্ত, ৰাজহ, পিডব্লিউডি, শক্তি, সেৱা, মহিলা আৰু শিশু বিকাশ বিভাগো পৰিচালনা কৰিছে।

জন্ম

১৯৮১ চনৰ ৮ জুনত আতিশীৰ জন্ম হৈছিল। তেওঁৰ জন্ম দিল্লী বিশ্ববিদ্যালয়ৰ অধ্যাপক বিজয় সিং আৰু ত্ৰিপ্তা ৱাহিৰ ঘৰত হৈছিল। তেওঁ দিল্লীত জন্মগ্ৰহণ কৰিছিল আৰু ডাঙৰ দীঘল হৈছিল।
স্প্ৰিংডেলছ স্কুলৰ পৰা স্কুলীয়া শিক্ষা গ্ৰহণ কৰাৰ পাছত আতিশীয়ে দিল্লী বিশ্ববিদ্যালয়ৰ ছেইণ্ট ষ্টিফেনছ কলেজৰ পৰা স্নাতক ডিগ্ৰী লাভ কৰে। পাছত তেওঁ অক্সফৰ্ডৰ পৰা ইতিহাসত স্নাতকোত্তৰ ডিগ্ৰী অৰ্জন কৰে। তেওঁৰ পিতৃ-মাতৃ মাৰ্ক্সৰ দ্বাৰা প্ৰভাৱিত হৈছিল। এই কাৰণে তেওঁৰ মাজৰ নাম ৰখা হৈছিল ‘মাৰ্লেনা’। যি মাৰ্ক্স আৰু লেনিনৰ সংমিশ্ৰণ। কিন্তু আতিশীয়ে ২০১৯ৰ লোকসভা নিৰ্বাচনৰ আগতে তেওঁৰ নামৰ পৰা ‘মাৰ্লেনা’ আঁতৰাই দিছিল।

আতিশী/শীলা দীক্ষিত

বিবাহ

২০০৬ চনত আতিশীয়ে পাঞ্জাৱী ৰাজপুত পৰিয়ালৰ প্ৰবীণ সিঙৰ সৈতে বিবাহ পাশত আৱদ্ধ হৈছিল। প্ৰবীণ সম্ভাৱনা ইনষ্টিটিউট অৱ পাব্লিক পলিচী এণ্ড পলিটিক্সত গৱেষণা আৰু শিক্ষকতাৰ সৈতে জড়িত। আইআইটি দিল্লী আৰু আইআইএম আহমেদাবাদৰ পৰা স্নাতক হোৱাৰ পাছত প্ৰায় ৮ বছৰ ধৰি তেওঁ কৰ্পোৰেট খণ্ডত ভাৰত আৰু আমেৰিকাৰ পৰামৰ্শদাতা প্ৰতিষ্ঠানসমূহত কাম কৰিছে।
তেওঁ সমাজ সেৱাৰ সৈতেও জড়িত। অৱশ্যে ৰাজহুৱা জীৱনত তেওঁক খুব কম দেখা যায়।

ৰাজনীতি

আতিশীয়ে ২০১৩ চনত আম আদমী পাৰ্টিত যোগদান কৰিছিল আৰু ৰাজনীতিত প্ৰৱেশ কৰিছিল আৰু তেওঁক ইস্তাহাৰ খচৰা সমিতিৰ সদস্যৰ দায়িত্ব দিয়া হৈছিল। ২০১৫-২০১৮লৈ তেওঁ দিল্লীৰ প্ৰাক্তন উপ-মুখ্যমন্ত্ৰী মনীষ ছিছ’দিয়াৰ উপদেষ্টা হিচাপে কাম কৰিছিল। তাৰ পাছত তেওঁ সক্ৰিয় ৰাজনীতিত ভৰি দিছিল। তেওঁ মধ্য প্ৰদেশৰ খাণ্ডৱা জিলাত জল সত্যাগ্ৰহ আন্দোলনত অংশগ্ৰহণ কৰিছিল।

২০১৯ৰ লোকসভা নিৰ্বাচনত আতিশীয়ে পূব দিল্লী সমষ্টিৰ পৰা প্ৰতিদ্বন্দিতা কৰিছিল। কিন্তু প্ৰাক্তন বিজেপি নেতা গৌতম গম্ভীৰৰ হাতত পৰাজিত হৈছিল। ২০২০ চনৰ নিৰ্বাচনৰ পাছত আতিশীক আপৰ গোৱা গোটৰ দায়িত্ব দিয়া হৈছিল। ২০২০ চনত তেওঁ দিল্লীৰ কালকাজী বিধানসভা কেন্দ্ৰৰ পৰা বিজয়ী হৈছিল। তেওঁ বিজেপি নেতা ধৰমবীৰ সিঙক ১,০০,০০০তকৈও অধিক ভোটৰ ব্যৱধানত পৰাজিত কৰিছিল। ইয়াৰ ফলত দিল্লীৰ ৰাজনীতিত আতিশীৰ উত্থান ঘটিছিল।

দিল্লীৰ প্ৰাক্তন উপ-মুখ্যমন্ত্ৰী মনীষ ছিছ”দিয়া আৰু দিল্লীৰ প্ৰাক্তন স্বাস্থ্যমন্ত্ৰী সতীন্দৰ জৈনৰ পদত্যাগৰ পাছত অৰবিন্দ কেজৰিৱালে তেওঁলোকক মন্ত্ৰীসভাত অন্তৰ্ভুক্ত কৰে। দিল্লী কেবিনেটৰ মন্ত্ৰী হিচাপে তেওঁ বিত্ত, পিডব্লিউডি, শক্তি, সেৱা, ৰাজহ, মহিলা আৰু শিশু বিকাশ আৰু শিক্ষাকে ধৰি বিভিন্ন দপ্তৰ পৰিচালনা কৰিছিল।

২০১৯ চনত লোকসভা নিৰ্বাচনৰ সময়ত আতিশীয়ে তেওঁৰ সম্পত্তিৰ শপতনামা দাখিল কৰিছিল। এই অনুসৰি তেওঁৰ ১ কোটি ৪১ লাখ টকাৰ স্থাৱৰ আৰু অস্থাৱৰ সম্পত্তি আছে। অৱশ্যে আতিশীৰ কাৰ আৰু গহনাৰ দৰে কোনো সম্পত্তি নাই।