গাহৰি মাংসৰ সৈতে মাটি মাহ, জানক সহজ অসমীয়া ৰন্ধন পদ্ধতি…

গাহৰি মাংস আৰু মাটি মাহৰ ৰেছিপি

প্ৰতিজন অসমীয়াৰ বাবে গাহৰি মাংস অতি প্ৰিয় । আমাৰ অসমীয়া সমাজত গাহৰি মাংস ৰন্ধাৰ বিভিন্ন পদ্ধতি আছে । ইফালে অসমৰ জনগোষ্ঠীৰ লোকসকলৰ মাজত গাহৰি মাংস ৰন্ধাৰ নিজ নিজ পৰম্পৰাগত পদ্ধতিও আছে । আপুনি গাহৰি মাংসৰ লগত মাটি মাহৰ জুতি লৈ পাইছে ? গাহৰি মাংস আৰু মাটি মাহ অসমীয়া সমাজৰ পৰম্পৰাগত ৰন্ধন পদ্ধতিৰ ভিতৰতে পৰে ।

যিহেতু অসমীয়া লোকসকলে ৰন্ধন পদ্ধতিত বেছি মচলা ব্যৱহাৰ নকৰে, সেহেয়ে এই পদ্ধতিত গাহৰি মাংস ৰান্ধিবলৈ মচলাৰ প্ৰয়োজন নহয় । অতি সহজ উপায়ৰে ঘৰতে মাটি মাহৰ সৈতে গাহৰি মাংস ৰান্ধি আপুনি এক সুকীয়া জুতি ল’ব পাৰে । মাটি মাহ আৰু গাহৰি মাংস ৰান্ধিবলৈ আপুনি বিশেষ কষ্ট কৰাৰ প্ৰয়োজন নাই ।

মাটি মাহ আৰু গাহৰি মাংসৰ জুতি ল’বলৈ অনুসৰণ কৰক এই পদ্ধতি

• প্ৰথমে আপোনাৰ প্ৰয়োজন অনুসৰি গাহৰি মাংসখিনি সুৰু সুৰুকৈ কাটি ল’ব । ৰন্ধন পদ্ধতি সহজ কৰিবৰ বাবে প্ৰায় ১৫ পৰা ২০ মিনিট সময় মাংসখিনি বইল কৰিব । বইল কৰাৰ সময়ত অলপ নিমখ দিব পাৰে আৰু বইল কৰাৰ পাছত পানীখিনি পেলাই দিব ।
• ১৫ ৰ পৰা ২০ মিনিট সময় গাহৰি মাংসখিনি বইল হয় মানে বাকী কামখিনি কৰিব পাৰে । ১ কেজি গাহৰি মাংসৰ বাবে আধা বাতি মাটি মাহ ল’ব পাৰে । মাংসৰ ওপৰত ভিত্তি কৰি মাটি মাহ ল’ব । মাটি মাহ খিনি আগতীয়াকৈ তিয়াই থলে অতি ভাল নতুবা অকমান সময় গৰম পানীত তিয়াই মাহখিনি কোকাৰত বইল কৰিব পাৰে ।
• ইয়াৰ পাছতে আদা-নহৰুৰ পেষ্ট তৈয়াৰ কৰিব আৰু লগত সেউজীয়া জলকীয়া দিব । জলকীয়া আপুনি প্ৰয়োজন অনুসৰি ল’ব । ইয়াৰ পাছত পিঁয়াজখিনি সৰু সৰু কৈ কাটি ল’ব । মনকৰিব যে, এই পদ্ধতিৰে গাহৰি মাংস ৰান্ধিবলৈ তেল ব্যৱহাৰ কৰিব ।
• মাটি মাহ আৰু গাহৰি মাংস ৰান্ধিবলৈ অকমান কলখাৰ ল’ব পাৰে । কলখাৰ দিলে আঞ্জাৰ সোৱাদেই সুকীয়া হয় । কল খাৰখিনি অকমান তিয়াই থব আৰু তাৰ পানীখিনি আঞ্জাত ব্যৱহাৰ কৰিব ।
• ইয়াৰ পাছতে এখম কেৰাহীখন গৰম কৰিব । বইল কৰা গাৰহিখিনি কেৰাহীত দিব । ইয়াৰ পাছতে জুই কমকৈ দি ৰাখিব । চাব মাংসৰ পৰা তেল ওলাবলৈ আৰম্ভ কৰিছে । ইয়াৰ পাছতে মাংসৰ পৰা ওলোৱা তেলতে মাংসখিনি অলপ সময় ভাজিব । মাংসখিনি অলপ ৰঙা ৰঙা হোৱাৰ সময়তে কাটি থোৱা পিঁয়াজখিনি দিব । পিঁয়াজৰ সৈতে মাংসখিনি আৰু অকমান সময় ভাজিব ।
• ইয়াৰ পাছতে প্ৰয়োজন অনুসৰি নিমখ আৰু হালধি দিব । হালধি নিদিয়াকৈ এই পদ্ধতিত গাহৰি মাংস ৰান্ধিব পাৰে । ইয়াৰ পাছতে আদা-নহৰু আৰু জলকীয়া পেষ্ট দিব । অলপ সময় গৰম পানী দি মাংসখিনি সিজিবলৈ দিব । গৰম পানী নিদিলে কৰখাৰ দিব ।
• অলপ সময় সিজোৱাৰ পাছত বইল কৰা মাটি মাহখিনি দিব । ইয়াৰ পাছত প্ৰায় ২০ ৰ পৰা ৩০ মিনিট সময় মাংসখিনি কম জুইত সিজিবলৈ দিব । ইয়াৰ লগে লগে আপোনাৰ মাটি মাহ আৰু গাহৰি মাংস আঞ্জাৰ সম্পূৰ্ণ হ’ব । সোৱাদৰ বাবে ধনীয়া পাত দিব পাৰে ।