Christmas 2024 : বিশ্বৰ কোনসমূহ দেশত পালন কৰা নহয় বৰদিন তথা খ্ৰীষ্টমাছ…?

বৰদিনলৈ মাজত মাত্ৰ এটা দিন । এই দিনটোৰ পাছতে ২৫ ডিচেম্বৰ বুধবাৰে সমগ্ৰ বিশ্ববাসীয়ে উদযাপন কৰিব বৰদিন । যীশুখ্ৰীষ্টৰ জন্মদিনৰ উপলক্ষে এই দিনটোত খ্ৰীষ্টান ধৰ্মৰ লোকসকলে পালন কৰে তেওঁলোকৰ ধৰ্মীয় উৎসৱ খ্ৰীষ্টমাছ । ভাৰতৰ লগতে বিশ্বৰ সকলো দেশৰ খ্ৰীষ্টান লোকসকলে অতি আনন্দৰে পালন কৰে বৰদিন তথা খ্ৰীষ্টমাছ । ইতিমধ্যে সমগ্ৰ বিশ্বতে বৰদিনৰ প্ৰস্তুতি চলি আছে ।

কিন্তু এইখন বিশ্বৰে কেইখনমান দেশ আছে যিকেইখন দেশে পালন নকৰে খ্ৰীষ্টমাছ তথা বৰদিন । কিছুমান দেশত কম সংখ্য়ক লোকে বৰদিন পালন কৰে যদিও সেই দেশৰ বাবে খ্ৰীষ্টমাছ চৰকাৰী উৎসৱ তালিকাত নপৰে । কিছুমান দেশত বৰদিন উদযাপন কৰা নহয় বা বৰদিন দিৱসক ৰাষ্ট্ৰীয় বন্ধ হিচাপে ঘোষণা কৰা নহয়। গতিকে বিশ্বৰ কোনকেইখন দেশে বৰদিন পালন নকৰে চাওঁ আহক ।

মংগোলিয়া

বৰদিনৰ বিশেষ প্ৰভাৱ নথকা এখন দেশ হৈছে মংগোলিয়া । আনুষ্ঠানিকভাৱে মংগোলিয়াক বৌদ্ধ দেশ বুলি কোৱা হয় । বৰদিন এই দেশৰ চৰকাৰী উৎসৱৰ তালিকাত নপৰে । বিশ্বৰ অন্যান্য দেশত বৰদিনৰ দিনটোত যিধৰণৰ পৰিৱেশ দেখা যায় সেই পৰিৱেশ ২৫ ডিচেম্বৰৰ দিনটোত মংগোলিয়াত দেখা নাযায় ।

মৰক্কো

মুছলমান লোকে বাস কৰা মৰক্কোত দেখা নাযায় বৰদিনৰ বিশেষ প্ৰভাৱ । বৰদিন এই দেশৰ চৰকাৰী উৎসৱৰ তালিকাত ধৰা নহয় । ধাৰণা কৰা হয় যে, এই দেশৰ লোকসকল ইছলাম ধৰ্মীয় হোৱাৰ বাবে বৰদিনৰ বিশেষ প্ৰভাৱ দেখা নাযায় ।

ভূটান

বৰদিন পালন নকৰা আন এখন দেশ হৈছে ভাৰতৰে চুবুৰীয়া দেশ ভূটান । ধৰ্মীয় ফালৰ পৰা এই দেশখনত অধিক সংখ্যক লোকে বৌদ্ধ ধৰ্ম পালন কৰে । জনসংখ্যাৰ ফালৰ দেশখনত খ্ৰীষ্টান ধৰ্মীয় লোকৰ সংখ্য়া অতি কম । ভূটানতো বিশেষভাৱে পালন কৰা নহয় বৰদিন ।

থাইলেণ্ড

থাইলেণ্ডৰ জনসংখ্যাৰ অধিকাংশই বৌদ্ধ ধৰ্মাৱলম্বী। যাৰ বাবে থাইলেণ্ডতো বৰদিনৰ প্ৰভাৱ দেখা নাযায় । ৰাষ্ট্ৰখনে বৰদিনৰ দিনটোক উৎসৱৰ দিন হিচাপে এতিয়ালৈকে স্বীকৃতি দিয়া নাই । থাইলেণ্ডলৈ অধিক পৰ্যটক আহে যদিও চহৰসমূহত বৰদিনৰ বিশেষ পৰিৱেশ দেখা নাযায় ।

চীন

ভাৰতৰ আন এখন চুবুৰীয়া ৰাষ্ট্ৰ হৈছে চীন । প্ৰকাশিত তথ্য় অনুসৰি, চুবুৰীয়া চীন দেশতো পালন কৰা নহয় বৰদিন । বৰদিনৰ দিনটোৰ বিশেষ প্ৰভাৱ দেখা নাযায় চীনত । কোৱা হয় যে, চীনত মুঠ জনসংখ্যাৰ ১ শতাংশহে খ্ৰীষ্টান ধৰ্মীয় লোক আছে ।

পাকিস্তান

ভাৰত চুবুৰীয়া পাকিস্তানত পালন কৰা নহয় বৰদিন । চুবুৰীয়া দেশখনত ২৫ ডিচেম্বৰ দিনটো দেশৰ প্ৰতিষ্ঠাপক নেতা মহম্মদ আলী জিন্নাক সন্মান জনোৱাৰ দিন হিচাপে পালন কৰা হয় । দেশখনৰ চহৰসমূহত দেখা নাযায় বৰদিনৰ বিশেষ প্ৰভাৱ ।

টিউনিছিয়া

টিউনিছিয়াতো বৰদিন পালন কৰা দেখা নাযায় । টিউনিছিয়াৰ বাবে এইদিনটো সাধাৰণ কৰ্মদিনৰ দৰে । সেই দেশৰ খ্ৰীষ্টান লোকসকলে খ্ৰীষ্টমাছ পালন কৰে যদিও এই দিনটোৰ আনন্দ তেওঁলোকৰ মাজতে থাকে ।

আফগানিস্তান

বৰদিন পালন নকৰা বা এই দিনটোত চৰকাৰী বন্ধ দিন হিচাপে ঘোষণা নকৰাৰ দেশসমূহৰ ভিতৰত আছে আফগানিস্তান । এই দেশখনে বৰদিনৰ দিনটো পালন নকৰে বা এই দিনটো ৰাজহুৱা বন্ধ হিচাপে ঘোষণা কৰা নাই । এই দেশখনত ধৰ্মীয় ফালৰ পৰা বেছি সংখ্যক ইছলাম ধৰ্মীয় লোক থকাৰ বাবেই বৰদিন পালন নকৰে বুলি ধাৰণা কৰা হয় । দেশখনত থকা কম সংখ্যক খ্ৰীষ্টান ধৰ্মীয় লোকে নিজৰ মাজতে বৰদিনৰ অনুষ্ঠান আয়োজন কৰে বা পালন কৰে ।