বহু সময় মোবাইল ব্যৱহাৰ কৰিলে চকুৰে ধোঁৱা ধোঁৱা দেখে নেকি? তেন্তে কৰক এই কাম…

চকুৰ ব্যায়াম

বৰ্তমান ডিজিটেলৰ যুগ। এই সময়চোৱাত বিভিন্নজনৰ চকুৰ দৃষ্টিশক্তি দুৰ্বল হোৱাও দেখা যায়। মোবাইল, কম্পিউটাৰ, টিভি, লেপটপ আদিৰ অত্যাধিক ব্যৱহাৰে চকুত হেঁচা প্ৰয়োগ কৰে। যাৰ ফলত চকুৰ বিষ, দৃষ্টিশক্তি ম্লান, ভাগৰুৱা অনুভৱ, মূৰৰ বিষ আদি সমস্যাৰ সৃষ্টি হয়। বিশেষকৈ যিসকলে বিভিন্ন সময়ত ফোন, লেপটপ আদি ব্যৱহাৰ কৰি থাকে তেওঁলোকে চকুৰ ওপৰত গুৰুত্ব দিয়া অতি আৱশ্যক।

যদি আপোনাৰো দৃষ্টিশক্তি ম্লান হৈছে বা চকুৰে ধোঁৱা ধোঁৱা দেখিছে তেন্তে শংকিত হোৱাৰ প্ৰয়োজন নাই। আপুনি দৈনন্দিন জীৱনত অলপ সময় উলিয়াই চকুৰ কেইটামান সাধাৰণ ব্যায়াম কৰিলে চকুৰ পেশীবোৰ শক্তিশালী হোৱাৰ লগতে ৰক্ত সঞ্চালন উন্নত হয়। ইয়াৰ ফলত দৃষ্টিশক্তি উন্নত হয়। গতিকে এনে  সমস্যাৰ পৰা পৰিত্ৰাণ পাবলৈ এই লেখাটোত চকুৰ কেইটামান বিশেষ ব্যায়াম উল্লেখ কৰা হল, যি কৰিলে আপুনি বহু ভাল অনুভৱ কৰিব।

১/ পামিং – চকু শিথিল কৰিবলৈ

প্ৰথমে শান্ত ঠাই এডোখৰত বহি লওক। পাছত দুই হাতৰ তলুৱা পিহি গৰম কৰি লওক। পাছত লাহে লাহে চকুত ৰাখিব। কিন্তু চকুত বেছি হেঁচা প্ৰয়োগ নকৰিব। কেই ছেকেণ্ডমান এনেকৈ থাকি এই ব্যায়াম পুনৰাবৃত্তি কৰক। ২-৩ মিনিট এনে কৰিলে আপোনাৰ চকুৰ ভাগৰুৱা অনুভৱ বহুখিনি কমি যাব। এনে কৰিলে বহু সময় পৰ্দালৈ চোৱাৰ পিছত চকুত তৎক্ষণাত সকাহ পোৱা যায়।

২) চকু টিপিয়াই থকা- চকুত আৰ্দ্ৰতা বজাই ৰাখিবলৈ

১০-১৫ ছেকেণ্ডৰ বাবে দ্ৰুতগতিত চকু টিপিয়াই দিব। তাৰ পিছত চকু দুটা মুদি কেইছেকেণ্ডমান জিৰণি লওক। এই প্ৰক্ৰিয়াটো ৪-৫ বাৰ পুনৰাবৃত্তি কৰক। চকু টিপিয়াই থকা ব্যায়ামে চকু আৰ্দ্ৰ কৰি ৰখাত সহায় কৰে আৰু ড্ৰাই আই চিনড্ৰম প্ৰতিৰোধ কৰে। পৰ্দাত বহু সময় কটোৱাসকলৰ বাবে এইটো অতি উপকাৰী।

৩/ মনোযোগ পৰিৱৰ্তন – দৃষ্টিশক্তি চোকা কৰিবলৈ

হাতত কলম বা আঙুলি এটা চকুৰ আগত ৰাখক। পাছত লাহে লাহে নাকৰ ফালে আনক আৰু পাছত আকৌ উভতাই নিয়ক। এই সময়চোৱাত আপুনি চকু কলমটোৰ ওপৰত কেন্দ্ৰীভূত কৰিব। এই প্ৰক্ৰিয়াটো ৫-১০ বাৰ পুনৰাবৃত্তি কৰক। এই ব্যায়ামে চকুৰ মনোনিৱেশ ক্ষমতা বৃদ্ধি কৰে আৰু দৃষ্টিশক্তি ম্লান হোৱাৰ সমস্যা দূৰ কৰাত সহায় কৰে।

৪) আই ৰোলিং- চকুৰ পেশী শক্তিশালী কৰিবলৈ

প্ৰথমে চকু দুটা সোঁফালে আৰু তাৰ পিছত বাওঁফালে ঘূৰাই দিব। তাৰ পিছত ইয়াক ওপৰলৈ তললৈ ঘূৰাই দিব। এই প্ৰক্ৰিয়াটো ৫-৫ বাৰ পুনৰাবৃত্তি কৰক। এই ব্যায়ামে চকুৰ পেশী শক্তিশালী কৰে আৰু ইয়াৰ কাৰ্যক্ষমতা বৃদ্ধি কৰে।

৫)৮টা আকৃতিৰ ব্যায়াম – চকুৰ গতিবিধিৰ বাবে

সন্মুখত এটা কাল্পনিক সংখ্যা ৮ বনাই চকুৰে ট্ৰেচ কৰক। প্ৰথমে ৮ টা এটা দিশত চাওক, তাৰ পিছত আনটো দিশত চাওক। এই প্ৰক্ৰিয়াটো আপুনি ৪-৫ বাৰ পুনৰাবৃত্তি কৰিব লাগিব। এই ব্যায়ামবোৰে চকুৰ গতিবিধি উন্নত কৰে।